Амондджын æмæ арфæйаг у уыцы адæймаг, йæ дзыллæйы цин æмæ мастæй чи цæры, сæ наукон, сфæлдыстадон, фольклорон бынтæ бабæстон кæныныл чи архайы, фидæны фæлтæртæн ахуырадон бынтæ ныууадзынмæ чи тырны…

Зындгонд ахуыргонд æмæ æхсæнадон архайæг Цыбырты Людвиг Хуссар Ирыстоны фыццаг Президент æппындæр куынæ уыдаид, уæддæр уый йæхицæн æнæмæлгæ мæсыг самадта йæ æгæрон зонадон бынтæй. Йæ хæлар, зындгонд фыссæг Дзасохты Музаферы загъдау: «Стыр у йæ бавæрæн Цыбырты Лæдвигæн наукæмæ. Æхсæнадæн ахсджиаг сты йæ дæсгай чингуытæ æмæ монографитæ. Бирæ бæрнон бынæттæ ахста — уыд деканаты сæргълæууæг, институты ректор, Хуссар Ирыстоны Сæйраг Советы Сæрдар, фыццаг Президент… Фæлæ нæ фæрæдидзынæн, афтæ куы зæгъон, Людвиг фыццаджыдæр у ахуыргонд, зæгъгæ, уæд».

Ууыл уыд сæ ныхас, ацы бонты ахуыргонды 90 азы юбилейы фæдыл цы кадджын мадзал æрцыд арæзт, уый архайджытæн. Людвигæн арфæ ракæнынмæ уыййас адæм æрбацыд æмæ ирон театры залы къухбакæнæн нæ уыд. Уым уыдысты хицауады уæнгтæ, æхсæнадон æмæ политикон архайджытæ, наукæ æмæ культурæйы минæвæрттæ, делегацитæ сыхаг республикæтæй, Мæскуыйæ, Петербургæй…

Фыццагдæр арфæйы ныхас республикæйы Сæргълæууæг Сергей Меняйлойы номæй загъта Хицауады Сæрдар Дзанайты Барис:

«Фæнды мæ стыр бузныг зæгъын дæ алывæрсыг архайды тыххæй. Ды дæ дæ адæмы æцæг патриот, кæцыйы уарзынц æмæ йын аргъ кæнынц. Бирæ дзурæн ис дæ политикон архайды тыххæй. Ды 90-æм уæззау азты разамынд лæвæрдтай нырма Хуссар Ирыстоны паддзахадон институтæн, стæй та республикæйæн æмæ сæ фæцудын нæ бауагътай. Уæдæ дæ наукон бынтыл дзурынæн иу бон фаг нæу. Мæ зæрдæ дын зæгъы æнæниздзинад, фæрныгад æмæ æнтыстытæ».

Уый фæстæ Хицауады Сæрдар Цыбырты Людвигы схорзæхджын кодта Цæгат Ирыстоны иууыл стырдæр хæрзиуæг «Ирыстоны Намыс»-æй.

Юбилярæн арфæтæ ракодтой Хуссар Ирыстоны Президент Гаглойты Алан, республикæйы Парламенты Сæрдар Тускъаты Таймураз, Дзæуджыхъæуы бынæттон администрацийы минæвæрттæ Милдзыхты Вячеслав æмæ Сæлбиты Зитæ, ахуырад æмæ наукæйы министр Алыбегты Эллæ… Мидисджын уыд физикон-математикон наукæты доктор Къусраты Анатолийы раныхас: «Не стыр цæдис куы фехæлд, уæд Хуссар Ирыстоны хъысмæт скъуыддзаг уыд: хъуамæ фесæфтаид. Хъуыд дзы тыхджын æмæ зондджын разамонæг. Ахæм разынд Цыбырты Людвиг. Уый 1993-2001 фыд азты æрбаиу кодта ирон адæмы, йæхи æнгом сбаста Уæрæсеимæ. Бындур сæвæрдта фидæны æмгуыстадæн. Стыр политикæйæ алчи аккаг хуызы нæ рахизы. Бирæтæ сæ ивгъуыдимæ рæстæджы фæлмы батайынц, никуыцæй уал разынынц. Фæлæ Людвиг уыдонмæ нæ хауы. Уый политикæйы фæстæ адарддæр кодта йæ зонадон-иртасæн куыст, кæцы адæмы къаддæр нæ хъæуы. Æгæрон у йæ хайбавæрд цардуаджы алы къабазмæ дæр».

Цыбырты Людвигы юбилейы фæдыл ма арфæтæ ракодтой æмæ сæ мысинæгтæ загътой Хуссар Ирыстоны Паддзахадон университеты ректор Тедеты Вадим, наукон-иртасæн институты директор Гаглойты Роберт, Стыр Ныхасы сæрдары хæстæ рæстæгмæ æххæстгæнæг Еналдыты Хъазыбег, Æхсæнадон палатæйы минæвæрттæ Лагкуты Вячеслав æмæ Нина Чиплакова, Сочийы ирон æхсæнады сæрдар Мæргъиты Анатоли, республикæйы кинематографты цæдисы сæрдар Цориты Султан, нывгæнæг Челæхсаты Магрез, Цæцæны, Кæсæджы æмæ Дагестаны наукон æхсæнадты минæвæрттæ Лечи Барсаев, Магомед Гасанов, Вячеслав Нагоев, Касболат Дзамихов, Гасан Мамбетов æмæ Барасби Бгажноков. Цæцæны разамынды номæй ма Цыбыры фыртыл скодтой кавказаг нымæт, йæ къухмæ та йын радтой рæсугъд, аив сыкъа, цæмæй дзы Ирыстоны фарнæн гаджидæуттæ уадза.

Мыггаджы номæй мадзалы архайджытæн арфæ ракодта Цыбырты Æхсарбег æмæ сыгъзæрин сахат бабаста Людвигы къухыл.

Кæронбæттæны Цыбырты Людвиг зæрдæбын арфæ ракодта мадзалы архайджытæн ахæм кад ын кæй скодтой, уый тыххæй æмæ йæ доклады бæлвырд радзырдта йæ цардвæндаджы тыххæй.

«Ис ахæм æмбисонд: искæй хъыгыл бамæт кæнынæн адæймаджы зæрдæ дæр фаг у, фæлæ искæй циныл бацин кæнынæн зæды зæрдæ хъæуы. Гъе æмæ уæ зæрдæтæ кæддæриддæр цин кæнынхъом æмæ æнæмаст уæд».

Юбилейон бæрæгбоны сæ арæхстдзинад равдыстой Ирыстоны аивадон коллективтæ «Алан», «Амонд», Гергиты Валерийы номыл аивадон колледжы ахуырдзаутæ, Кокойты Агуындæйы зарæггæнджыты къорд «Алани» æмæ æндæртæ. Ацы къорд ма акодта, Людвигы номыл Чехойты Оля кæй ныффыста, уыцы зарæг.

Кæронмæ æрхæццæ зындгонд ахуыргонд æмæ политик, дунейыл зындгонд этнограф, историк æмæ кавказиртасæг, профессор, Уæрæсейы, Хуссар æмæ Цæгат Ирыстоны зонæдты сгуыхт архайæг, Уæрæсейы академийы æххæстбарджын уæнг, Къостайы номыл Паддзахадон премийы лауреат, дæсгай хæрзиуджыты æмæ кады грамотæты хицау, уыдонимæ уæлдæр хæрзиуджытæ «Ирыстоны Намысæн» æмæ «Ирыстоны Намыс»-ы кавалер Цыбырты Людвигы 90 азы юбилейон изæр.

Лæвæрттæ, дидинджытæ, арфæтæ, цины цæссыгтæ æмæ… æгæрон зæрдæйы хъарм. Ахæм хуызы адæм æвдыстой се ʻнкъарæнтæ ахуыргондмæ.

Æз нал кæнын Цыбырты Людвигы сфæлдыстад æмæ наукон бынты кой. Бирæ сыл фæдзырдтой. Фæлæ мæ зæгъын фæнды, стыр ахуыргонд æмæ политик уæвгæйæ, уый литературæмæ цы зæрдæ дары, уый тыххæй. Зæгъæн ис, Цыбыры-фыртæн Ирыстоны литературон цардæй æцæгæлон ницы ис. Æдзухдæр æй равдæлы ирон мыхуыр кæсынмæ дæр æмæ исты æрмæджы тыххæй йæ хъуыдытæ фæзæгъы газетты фæрстыл кæнæ авторæн. Йæхи уацхъуыдтæ дæр арæх фæзынынц республикон æмæ центрон мыхуыры. Æрмæст зындгонд классик Бестауты Гиуæргийы тыххæй цы чиныг рауагъта, «Шаги в бессмертие», зæгъгæ, уымæй æнусон цырт самадта Бестауы-фыртæн.

Цыбырты Людвигы алывæрсыг архайдыл хъуыды кæнгæйæ, мæ зæрдыл æрбалæууынц бердзенаг поэт Хафиз Ширазийы ныхæстæ:

«…И чертог, и престол, и величье царей — не навечно. Все на земле, — кроме добрых деяний на благо людей, — не навечно».

ДЖУСОЙТЫ Нинæ