Спорт

ФУТБОЛ

Футболы æхсæнадæмон федераци (ФИФА) азы хуыздæр тренеры ном райсыны номинантты номхыгъдмæ бахаста УФ-йы æмбырдгонд командæйы сæйраг тренер Черчесты Станиславы. Ирон специалистæй дарддæр ма номинантты ‘хсæн сты Массимилиано Аллегри («Ювентус»), Златко Далич (Хорватийы æмбырдгонд), Дидье Дешам (Францы æмбырдгонд), Хос Гвардиола («Манчестер Сити»), Юрген Клопп («Ливерпуль»), Роберто Мартинес (Бельгийы æмбырдгонд), Диего Симеоне («Аьлетико»), Гарет Саутгейт (Английы æмбырдгонд), Эрнесто Вальверде («Барселона») æмæ Зинедин Зидан.

ФИФА хуыздæр специалистты бæрæг кæны æмбырдгонд командæты тренертæ, капитанты, спортуарзджыты æмæ дунеон дзыллон информацион фæрæзты минæвæртты хъæлæсæппæрсты фæстиуæгмæ гæсгæ.

ФИФА-йы хорзæхтæ радтыны церемони, цыран фехъусын кæндзысты хуыздæр тренеры призы хицауы дæр, уагъд æрцæудзæн 24 сентябры Лондоны.

ГРЕКЪАГ-РОМАГ ХЪÆБЫСХÆСТ

7-10-æм августы Одинцовойы уагъд æрцæудзæн Уæрæсейы чемпионат грекъаг-ромаг хъæбысхæстæй. Уым хайад райдзысты ирон богалтæ дæр. РЦИ-Аланийы чемпионаты æмбырдгонд командæмæ бахаудтой Тыбылты Георги (55 кг), Гæбæраты Алан (55 кг), Чертхъоты Уырызмæг (60 кг), Къабæлты Зауыр (67 кг), Хуыгаты Алан (77 кг), Гудиты Илья (77 кг), Джиоты Дмитри (77 кг), Къæбысты Зауыр (82 кг), Беджызаты Сослан (87 кг) æмæ Беккуызарты Руслан (98 кг).

БОКС

Дзæуджыхъæуккаг спортсменкæ Дудиаты Фатимæ ссис боксæй профессионалты ‘хсæн Уæрæсейы чемпионкæ. Ацы титул рамбулыны тыххæй тохы уый фæуæлахиз Тамара Мтивлишвилийы. Уыдон рингыл фембæлдысты горæт Серпуховы.

Хуриты Батрадз