Кокойты Теймураз хорзæхджын æрцыд «Ахуыргонды стъалы»-йæ

Ацы бонты та Хуссар Ирыстонмæ æрæхъуыст æхсызгон хабар. Тыбылты Алыксандры номыл Хуссар Ирыстоны паддзахадон университеты профессор Кокойты Теймураз хорзæхджын æрцыд Экологи æмæ цард архайды æдасдзинады зонæдты дунеон академийы (МАНЭБ) «Ахуыргонды стъалы»-йæ. Уымæй дарддæр ма йын лæвæрд æрцыд «Зонæдты сгуыхт архайæг»-ы кадджын ном дæр. МАНЭБ-ы уынаффæйы банысанчындæуыд, зæгъгæ, хуссарирыстойнаг ахуыргондæн хорзæх лæвæрд æрцыд экологийы фæдыл зонадон конференциты хайадисты æмæ бирæнымæц публикациты тыххæй. Уый размæ, 2013 азы та ахуыргондæн лæвæрд æрцыд МАНЭБ-ы академикы ном.

Кокойты Теймураз йæхæдæг куыд радзырдта, уымæ гæсгæ йæ «Ахуыргонды стъалы»-йæ схорзæхджын кæныны тыххæй академи уынаффæ рахаста зонадон-практикон конференци «Белые ночи – 2018»-ы. Экологты дунеон форум «Алфæмбылай дуне бахъахъхъæнын æмæ Æдасдзинады проблемæтæ аскъуыддзаг кæныны зонад æмæ ахуырады нысаниуæджы тыххæй» уагъд æрцыд Санкт-Петербурджды æмæ баст уыд МАНЭБ-ы сырæзтыл 26 азы бонимæ. «Конференцийы уынаффæ цыд алфæмбылай æрдзон дуне бахъахъхъæнын æмæ архайды æдасдзинады проблемæтæ аскъуыддзаг кæныны фæдыл адресон фæндæттæ  бакусынимæ», – радзырдта профессор. Хуссарирыстойнаг ахуыргондæн ахæм бæрзонд хорзæх кæй саккаг кодтой, уый фæдыл ын раарфæ кодтой йæ коллегæтæ куыд дыууæ Ирыстоны, афтæ Уæрæсейы Федерацийы дæр.

Кокойты Теймуразмæ арфæйы тел æрæвыста УФ-йы кадджын архитектор, архитектурæзонæг ориенталист æмæ византолог Бесолты Владимир. Арфæйы, сæрмагондæй дзырдæуы: «Куыд раст æмæ принципиалон адæймаг, национ интеллигенцийы зынгæ минæвар, афтæ ды дæ æвæллайгæ архайдæй  дæ бирæ ведомствойон æмæ паддзахадон хорзæхты аккаг. Дæ хуызæн ирд гоймæгтæ  сты нацийы кад æмæ сæрыстырдзинад».

Уæ зæрдыл уын лæууын кæнæм,  Теймуразæн биологийы зонадон фадыджы  стыр æнтыстытæ кæй ис, ууыл дзурæг кæй сты, Мæскуы, Ленинград, Киев, Ашхабад æмæ æндæр горæтты зонадон конференциты хайад кæй иста æмæ сæ докладтимæ кæй ралæууыд, уый дæр. Æппæт йæ ахуыр-хъомыладон æмæ зонад-иртасæн куыстытæн  ын стыр аргъ скодта Уæрæсейы Федерацийы Уæлдæр аттестацион къамис æмæ йын 2005 азы 26-æм декабры лæвæрд æрцыд профессоры кадджын ном. 2006 азы йын Хуссар Ирыстоны къухдариуæгад та  саккаг кодта «РХИ-йы сгуыхт зонадон кусæг»-ы кадджын ном. Хорзæхджын у Хæлардзинады орденæй. Биологон зонæдты кандидат, профессор, Арцахы паддзахадон университеты кадджын доктор, цардуагон архайды экологи æмæ æдасдзинады дунеон академийы зонæдты академк (МАНЭБ), М.В.Ломоносовы номыл Мæскуыйы паддзахадон университеты цур бындурон библиотекæйы интеллектуалон клубы æцæг уæнг Кокойты Таймураз у 92 публикацийы автор, уыцы нымæцы 9 монографи, 4 ахуыргæнæн чиныджы, 4 æххуысы чиныджы автор.

Профессор ма куыд банысан кодта, уымæ гæсгæ  спорты къабазы Черчесты Станислав, Гасситы Мурат, Рæмонты Сослан æмæ  æндæрты, афтæ ма музыкалон аивады Гергиты Валери, Джиоты Вероникæ æмæ бирæ æндæрты стыр æнтыстытæм кæсгæйæ, мах ахуыргæндты дæр разæнгард кæнынц зонады нæ къухты бафтгæ æнтыстытæй Ирыстоны адæмы зæрдæтæ рухс кæнынмæ.

Мах дæр арфæ кæнæм Кокойты Теймуразæн йæ радон хорзæхы тыххæй, Уадз, ноджыдæр дын фылдæр бантысæт зонады фадыджы.

Джиоты Екатеринæ

 

 

ЧЕХОЙТЫ Оля

КОКОЙТЫ ТЕЙМУРАЗÆН

Нæ Райгуырæн бæстæм æрыхъуыстис цинаг,

Уырысы зæххыл уый куы æрцыдис ног.

Нæ Иры ахуыргонд, нæ цытджын Теймураз,

Кадимæ куы хæссыс ирон лæджы ном!

 

Ирон Тырысайыл бæрзонддæр ысхæцæм,

Кæй фæдæ ды Ирæн аккаг фырт, лæвар.

У ахæм цæвиттон фæзминаг кæстæртæн,

Сæ кадджын æфсымæр уæвын ныр дæ бар!

 

О, Уастырджи, лæгтæн сæ фæндæгты дзуар!

Теймуразæн ал хатт йæ фæндаггон у.

Нæ Иры дзыллæ, ныр йæ кадæн ды базар

Нæ мæгуыр адæмыл та ракæсдзæн хур!