Цады ныртæккæ дон нæй. Фæлæ горæты администрацийы куыд зæгъынц, афтæмæй къуырийы æмгъуыдмæ цад байдзаг уыдзæн донæй æмæ та нæ горæты цæрджытæ цæудзысты сæ уарзондæр бынатмæ.
Ивгъуыд сæрды цады дон кæй нæ уыд, уымæн йæ аххосаг – зæронд хидыл цы арæзтадон куыстытæ цыд, уыдон фадат нæ лæвæрдтой цад байдзаг кæнынæн. Фæлæ ныр, табу Хуыцауæн, уыцы куыстытæ конд сты æмæ ацы сæрд цад байдзаг кæнынæн ницы къуылымпытæ ис. Горæты хæрзæфснайды комбинаты кусджытæ бавнæлдтой цады бынтæ быронæй æфснайынмæ.
«Цыргъ дуртæ æмæ æфсæн æрмæджытæй ссæрибар кодтам цады бын. Йæ алфæмблай кæрдæг ныккарстам, цы пластик æмæ дзы целлофаны скъуыдтæ уыд, уыцы бырон уыдысты дыууын уæзласæн машинæйы бæрц. Ныр уырдæм ауадздзыстæм дон æмæ та ацы тæвд бонты рухс кæндзæн нæ горæты цæрджыты зæрдæтæ.
Ам кусгæйæ нæм бирæтæ æрбацæуынц, цымыдис кæнынц, ома, æцæг у, цадмæ кæцæйдæрты канализацийы дон кæй ивæрзы. Уый раст нæу, уымæн æвдисæн – цады афæдзы бæрц дон кæй нæй, канализациты дæттæ йæм кæд хъуызыдысты, уæд сурæй цæмæн лæууыд. Стæй, уадз æмæ алчи дæр зона, æрвыл аз дæр, цалынмæ найæн сезон не’рбайгом вæййы, уæдмæ санэпидстанцæйы кусджытæ сисынц донæй анализ»,- радзырдта нын кусджытæй сæ иу.
Цады алфæмблай цæрæг адæмæн сæ цинæн кæрон нал ис.
«Мæхуызæн пенсионертæн сæрды тæвд бонты цад у сæ ирвæзынгæнæг. Мæ цахъхъæнтæй алкæмæн нæй фадæттæ республикæйæ æддæмæ улæфынмæ ацæуынæн. Арæх фæбадæм цады былыл сатæг уæлдæфмæ. Ныры дуджы ахæм улæфæн зонæтæм стыр хъусдард хъуамæ цæуид. Ам сабитæн хъуамæ уаид аттракционтæ, цады алфæмблай хъуамæ уаид бирæ бæлæстæ æмæ цъæхдарæнтæ, цæмæй хурбонты адæймаг йæхи кæм баауон кæна, уый йын уа. Цады дон кæддæриддæр хъуамæ бæзза хинайынæн, арæзт дзы цæуой анализтæ, цæмæй уырдæм йæхи найынмæ чи бахиза, уыдоны æнæниздзинадæн æдас уа. Цады былыл æнæмæнг хъуамæ арæзт уа чысыл кафе, цæмæй адæм уым æлхæнæной нуазыны дон, сæлдæг æмæ исты адджинæгтæ», – ахæм у йæ хъуыды 73 азы кæуыл цæуы, уыцы нæлгоймагæн.
Сабиты алы хатт дæр фæфæнды сæхи найын. Цыфæнды сæ куы бафæдзæхсай, ома, гæнæн нæй цады найын, уæддæр сæ кæнон акæнынц. Санэпидстанц алы аз дæр фæдзæхсы, цады дон æдас кæй нæу найынæн. Ныр зæгъынц, цады дам, æвæрд æрцыд донсгъдæггæнæнтæ. Кæд ныр сабитæ æдæрсгæйæ наиккой, дон тæнæгдæр кæм вæййы, уым», – зæгъы цадмæ æввахс цæрæг ныййарæг.
P.S. Канд сæрдыгон бонты нæ, фæлæ афæдзы алы афон дæр, ам фæтезгъо кæнынц бирæ адæм. Ис дзы хи найыны фæрæзтæ, адæймаг змисыл кæм æрхуысса хурмæ, ахæм бынæттæ. Чысыл сабитæн дзы ис хиирхæфсæн фæз, фæсивæд спортæй кæм архайой, ахæм бынат дæр ис. Фæлæ уæлдæр куыд загътам, афтæмæй цады алфæмбылай дзæвгар хуыздæр фадæттæ ис саразæн улæфынæн…
УАЗÆГТЫ Марфæ
