Къостайыхъæуы уагъд æцыд сывæллæтты ‘хсæн турнир шахматтæй. Ерысты хайад райстой ацы хъæуы æмæ Цхинвалы шахматон скъола «Белая ладья»-йы хъомылгæнинæгтæ 16 адæймагæй.
Ерысты хайадисджытæн раарфæ кодтой «РХИ-йы шах-мæтты федераци»-йы президент Саулохты Георги, уæрæсейаг тренер Алена Полунина æмæ ерысты сæйраг тæрхонгæнæг Гæбæраты Ацæмæз.
Банысан кæнын хъæуы уый дæр, æмæ Алена Полунина Къостайыхъæуы сывæллæттæн кæй фæуадзы онлайнтренировкæтæ. Уыдон сорганизаци кодта ацы хъæуæй рацæугæ, ныртæккæ горæт Мæздæджы цæрæг амилиуггæнæг Быценты Юри. Уый ныр Полунинайы æркодта Къостайыхъæумæ æмæ ноджы æввахсдæр базонгæ йæ хъомылгæнинæгтимæ.
Ерысты фæстиуджытæм гæсгæ иууыл хузыдæр бæрæггæнæнтæ равдыста Къостайыхъæуы скъолайы 4-æм къласы ахуыргæнинаг Мæлдзыгты Хасан. Дыккаг ссис 9-æм скъолайы 1-æм къласы ахуыргæнинаг Плиты Бибо æмæ æртыккагыл та ацыд Мæздæджы скъолайы 3-аг къласы ахуыргæнинаг Быценты Мадинæ, кæцы ерысты хъахъхъæдта Къостайыхъæуы спортивон кад.
Уæлахиздзаутæ æмæ призертæ, афтæ ма иннæ хайадисджытæ дæр хорзæхджын æрцыдысты зæрдылдарæн лæвæрттæй.
БОКС
Горæт Осташковайы уагъд æрцыд 17-18 аздзыд боксерты ‘хсæн Уæрæсейы чемпионат. Ерысты хайад райстой бæстæйы 67 регионæй 300 спортсменæй фылдæр. +92 кг уæзы категорийы дыккаг бынат бацахста Милдзыхты Батраз. Йæ тренер у Плиты Роберт.
Хуриты Батрадз
