Нæ республикæйы Национ музей æрвылаз дæр майы мæйы йæ дуæрдтæ æрбакæны ирон адæмы рагфыдæлты истори æмæ аивадæн. Ныр дæр та не’мбæстæгтæм музейы æнхъæлмæ каст цымыдисон изæр. 22 майы Национ музей æппæтдунеон акци «Музейты æхсæв»-ы фæлгæтты бацæттæ кодта æмæ равдыста цымыдисон мадзал.
Ардæм фæуазæг сты ХИПУ-йы ирон литературæйы историйы кафедрæйы гæс, зынгӕ ирон ахуыргонд, филологон зонæдты кандидат, профессор Плиты Гацыр, республикæйы къухдариуæгады минæвæрттæ, Уæрæсейы æххæстбарджын минæвар Хуссар Ирыстоны Марат Кулахметов, Культурæйы министр Зæгъойты Радæ, республикæйы интеллигенцийы минæвæрттæ æмæ алы кары æмбæстæгтæ.
Æрбацæуджыты раз раныхас кодта Национ музейы директор Зассеты Мераб: «Афтæ зæгъæн ис æмæ куыд нæ республикæйы æмбæстæгтæ, афтæ уазджыты æрдыгæй дæр Национ музеймæ цымыдисгæнджытæ бирæ сты. Уыцы цымыдис махæн дæтты стимул дарддæр ноджы фылдæр æмæ ахадгæдæр куыст кæнынæн».
Музеймæ æрбацæуджыты зонгæ кодтой нæ рагфыдæлты цардуаг бæлвырдгæнæг археологон ссарæггæгтимæ, этнографи, истори æмæ культурон царды кæмæй пайда кодтой, ахæм æрмæджытимæ. Федтой æнæзонгæ авторты нывтæ, кæцытæ музейы сты рагæй, фæлæ сæ равдыстмæ рахастой фыццаг хатт. Рагон кæй сты, уымæ гæсгæ сæ хъæуы реставраци скæнын.
«Музейты æхсæв»-ы æппæты уникалондæр уыд Цыкурайы фæрдыджы равдыст æмæ йемæ баст традицитæ. Æгъдаумæ гæсгæ, Цыкурайы фæрды-джы цалынмæ адæм феной, уæдмæ хъæуы æртæ уæливых æмæ ирон бæгæныйы нуазæнæй акувын. Ацы традици сæххæст кодта æхсæнады куырыхон хистæр Плиты Гацыр æмæ æрбацæуджытæ æмæ æппæт ирон адæмы бафæдзæхста Стыр Хуыцауыл. Уый фæстæ кæй фæндыд, уыдонæн сæ бон уыд Цыкурайы фæрдыджы раз сæ бæллицтæ гæххæтты гæбазыл ныффыссын, йæ дæлфад æй арты басудзын æмæ йыл сæ къух авæрын. Традицимæ гæсгæ уый хъæуы саразын, цæмæй сæххæст уой бæллицтæ.
Цыкурайы фæрдыг Цхинвалы Национ музейæн 2015 азы балæвар кодта зынгæ ахуыргонд Дзаттиаты Руслан. Йæ нысаниуæджы тыххæй радзырдтой Плиты Гацыр æмæ музейы директор Зассеты Мераб.
Акци райдыдта изæры 20 сахатыл æмæ аххæссыд суанг æрдæгæхсæвмæ. Йæ хайадисджыты зæрдæтæ ма сæ аив зардæй хъæлдзæг кодтой Галаты Барисы номыл паддзахадон ансамбль «Симд»-ы нæлгоймæгты хор, Саппиаты Зæлинæйы къухдариуæгадæй.
Хуыгатты Милена
