Ацы фæстаг азты Уæрæсейы, уæлдайдæр Цæгат Кавказы регионты ‘хсæн, сарæх сты алыхуызон сфæлдыстадон проекттæ æмæ æмгуыстад. Мыхуыры фæрæзтæ кæрæдзийæн сæрмагонд номыртæ уадзынц, кæрæдзи уацмыстæ тæлмац кæнынц, иумæйаг фембæлдтытæ аразынц…
Æрæджы та журнал «Мах дуг»-ы бындурыл, йæ сæйраг редактор Хетæгкаты Оксанæйы руаджы, фæзынд ног проект. Уый фæлгæтты зындгонд фыссæг, Кæсæг-Балхъары адæмон поэт, паддзахадон премийы лауреат Керим Отаровы æмдзæвгæтæ ирон æмæ дыгурон æвзæгтæм тæлмацгондæй рацыдысты хицæн чингутæй. Ратæлмац сæ кодтой Ирыстоны зынгæ поэттæ Хуыгаты Сергей, Скъодтаты Эльбрус, Колыты Витали, Касаты Батрадз, Бызыккаты Земфирæ, Цæриаты Валери, Баситы Зæлинæ, Бететы Фатимæ… Уымæй дарддæр ма поэты уацмыстæ ратæлмац кодтой уырыссаг, мæхъæлон æмæ туркаг æвзæгтæм. Æрæджы, Керим Отаровы мæлæтыл 50 азы номарæн изæрмæ, йæ ног чингуыты презентацимæ Налцыккмæ уазджытæ æрбацыд алы рæттæй. Стыр делегаци ацыд Ирыстонæй дæр.
Налцыччы Культурæйы хæдзары сценæйæ хъуыстысты поэты æмдзæвгæтæ æмæ уыдоныл фыст зарджытæ алы æвзæгтыл. Йæ цард æмæ йын йе сфæлдыстады тыххæй дзырдтой йæ курдиатæн табугæнджытæ. Кæсæг-Балхъары культурæйы министр Мухадин Кумахов куыд банысан кодта, афтæмæй Керим Отаров уыд, йæ адæмы цин æмæ маст йæ сфæлдыстады æххæстæй чи равдыста, хасты (ссылка) рæстæджы балхъайраг адæмы стыр трагеди йæ удыл чи бавзæрста æмæ йæ йæ уацмысты адæмы размæ чи рахаста, ахæм поэт.
Зынгæ поэты æмдзæвгæтæ тæлмац кæнгæйæ, цы тæлмæнтæ бавзæрстой, уый тыххæй радзырдтой журнал «Æрæф»-ы сæйраг редактор Скъодтаты Эльбрус, курдиатджын поэт æмæ тæлмацгæнæг Баситы Зæлинæ… «Тæлмац кæнгæйæ поэты курдиаты тых мæ зæрдæйы арф бацыд, йæ хæрвы тыхт æрцыдтæн, йæ уацмысты йемæ цардтæн, йемæ цыдтæн, цалынмæ куыст фæдæн, уæдмæ. Мæнæн стыр кад у, ахæм поэты тæлмац кæныны амонд мæм кæй æрхауд, уый», – йæ раныхасы фæнысан кодта Зæлинæ.
Уацмыстыл куыд куыстой, уый тыххæй сæ хъуыдытæ загътой уырыссаг, мæхъæлон æмæ туркаг адæмы минæвæрттæ дæр.
Кæронбæттæны мысæн изæры архайджытæн арфæ ракодта Керимы чызг Римæ Отарова: «50 азы не ‘хсæн нал ис курдиатджын поэт, фæлæ уал азы ис нæ фарсмæ, нæ бинонтимæ, йæ адæмимæ, литературæйы. Абон нын ахсджиаг бон у, уымæн æмæ йæ тæлмацгæнджытæ ам сты сыхаг республикæтæй. Ацы проект фыццагдæр фæзынд 2012 азы. Раджы дæр æй бирæ тæлмац кодтой, фæлæ-иу хицæн æмбырдгæндтæй нæ цыдысты. Абон ын сты 15 æмбырдгонды алы æвзæгтæм. Стыр бузныг зæгъын проект саразджытæн дæр æмæ тæлмацгæнджытæн дæр се ‘ппæтæн. Уый стыр æвæрæн у Каваказы аивадон литературæмæ».
Уый фæстæ Римæ тæлмацгæнджыты схорзæхджын кодта Керим Отаровы номыл майдантæй, дипломтæй æмæ зæрдылдарæн лæвæрттæй.
Адæймаг цæры, цалынмæ йæ мысынц, уæдмæ. Ахæм мадзæлттæ та, æнæмæнгæй, æнусон кæнынц поэты ном. Керим баззайдзæн йе сфæлдыстад зынаргъ кæмæн у, уыдоны зæрдæты.
Джусойты Нинæ
