Хуссар Ирыстон æмæ Гуырдзыстонимæ арæнтыл æрæджы уагъд æрцыд Инциденттæ аиуварс кæнын æмæ сæм хъусдард здахыны фæдыл механизмты фæлгæтты радон фембæлд. Ацы фембæлд дæргъвæтин рæстæджы уагъд цæуы æнæ информацион фæрæзты хайадистæй æдасдзинады æмæ санитарон-эпидемиологон уавæртæм гæсгæ.
Механизмты куыстæн хатдзæгтæ аразгæйæ, Хуссар Ирыстонæй делегацийы сæргълæууæг, Фæсконфликтон фарстатæ бæстонкæнынады фæдыл Президенты æххæстбарджын минæвары хæдивæг Коцты Егор информацион фæрæзты минæвæрттæн куыд радзырдта, уымæ гæсгæ ацы форматы дзырд цыд, цалдæр азы размæ Хуссар Ирыстоны Знауыры районы Уисты хъæуы гуырдзиаг полициæгты минæвæрттæ æнæ-закъонон пост куы сæвæрдтой, уыцы бынаты сæвзæргæ уавæр æмæ æдасдзинады фарстытыл. Делегацийы сæргълæууæджы ныхæстæм гæсгæ ацы æнæзакъонон пост абоны онг дæр æндавы æгас республикæйы уавæрыл. Уый у дестабилизаци æмæ æндыгъддзинады сæйраг æууæл.
«Ацы районы бынæттон цæрджытæ хъæуы æдæрсгæйæ нæ цæрынц, уымæн æмæ фæндæгтæ æдзух полициæгты хъусдарды бын сты. Уымæ гæсгæ радон хатт гуырдзиаг фарсы хъусдард аздæхтам уыцы хъуыддагмæ, æмæ ацы районы æмæ æмткæй регионы уавæр æрбæстон кæныны сæйраг фактор кæй у æнæзакъонон пост аиуварс кæнын Хуссар Ирыстоны территорийæ æмæ Гуырдзыстоны гарзджын тыхты уыцы бынатæй акæнын», – банысан кодта Коцты Егор.
Æххæстбарджын минæвары хæдивæг куыд банысан кодта, уымæ гæсгæ хуссарирыстойнаг фарсы æппæт фарстытæн гуырдзиаг фарс нæ дæтты лæмбынæг дзуаппытæ. Абоны онг дæр дзурынц, зæгъгæ, полициæгты пост тасдзинад никæмæн æвзарын кæны. Уымæн хуссарирыстойнаг делегаци ноджыдæр бафидар кодтой, постæй Уисты хъæумæ 300 метрæй фылдæр дæрддзæг кæй нæу æмæ гуырдзиаг хъæу Чорчонамæ та ис æртæ километрæй фылдæр.
Хуссарирыстойнаг делегацийы минæвæрттæ бахастой къорд фæндоны уавæр æрбæстон кæныны нысанæн. Сæрмагондæй, уыцы полициæгты пост аиуварс кæныны фæстæ Хуссар Ирыстон байгом кæндзæн паддзахадон арæныл хизæн пункт «Раздæхæн».
Механизмты фоматы ма йæ хайадисджытæ уынаффæ кодтой Республикæ Хуссар Ирыстон æмæ Гуырдзыстоны паддзахадон арæнты фæйнæфарс инциденттимæ баст фарстытыл, уæлдæфон тыгъдад æнæпилотон тæхæн аппаратты ‘руаджы хæлд кæй цæуы. Сæрмагондæй, дзырд цыд паддзахадон арæнтæ халыны фарстытыл.
«Уæлдай тыхстдзинад махæн æвзарын кæны уыцы хъуыддаг, æмæ арæнтæ хæлд кæй цæуынц гуырдзиаг полициæгты хъусдардæй, науæд та Гуырдзыстоны барадхъахъхъæнæг минæвæрттæн сæхи ‘руаджы дæр. Уыдон сæхицæн уыцы бартæ дæттынц, цæмæй арæнты фæтк халой, информацион нысæнттæ, баннертæ æмæ арæнты къулдуæртты къамтæ исой. Хуссар Ирыстоны территоримæ цыбыр рæстæг æрбахизыны фæстæ ацæуынц фæстæмæ Гуырдзыстоны территоримæ», – банысан кодта минæвар.
Йæ ныхæстæм гæсгæ æппæт ацы хъуыддæгтæм хуссарирыстойнаг делегацийы минæвæрттæ аздæхтой форматы хайадисджыты хъусдард. Æмæ сæ ныфс ис, кæй ахъуыды кæндзысты æмæ гуырдзиаг æмбæстæгтæ æмæ полицийы минæвæрттæ дарддæр кæй нал халдзысты арæнты фæтк.
Коцты Егор ма куыд банысан кодта, уымæ гæсгæ арæнты фæтк фехалынимæ баст цаутæ æмæ уый фæстиуæгæн ахст чи æрцæуы, уыдон ныхмæ хатт конд æрцæуы уголовон хъуыддæгтæ Хуссар Ирыстоны закъондæттынадмæ гæсгæ.
Механизмты форматы хайадисджытæ куыд бауынаффæ кодтой, уымæ гæсгæ ацы форматы фембæлд уагъд æрцæудзæн 12 апрелы.
Нæ уацх.
Comments are closed, but trackbacks and pingbacks are open.