Стыр Фыдыбæстæйон хæстмæ Цæгат æмæ Хуссар Ирыстонæй ацыд 95 мин адæймаджы. Се ‘рдæг нал сæмбæлдысты сæ фыдыуæзæгыл. Фæлæ сæ фæдонтæй рох не сты. Алкæй ном дæр сыгъзæрин дамгъæтæй фыст æрцыд историйы.

 

Рæстæг тагъд  згъоры. 9 Майы 73  азы сæххæст уыдзæн, Берлины, Рейхстаджы сæрмæ Уæлахизы  тырыса куы сфæйлыдта, уыцы стыр бæрæгбоныл. Æмæ цас фылдæр рæстæг цæуы  Стыр Фыдыбæстæйон хæсты тугкалæн бонтæй, уыйас сæ кад   бæрзонддæр кæны, чи дзы архайдта, уыдонæн.

Уыцы Уæлахизмæ тугвæндæгтыл фæцыдысты, æмæ сæ сæртæ нывондæн æрхастой Райгуырæн бæстæйы сæрибардзинад æмæ хæдбардзинады сæрыл мингай хуссарирыстойнаг лæппутæ дæр. Мингæйттæй та фæстæмæ сæ уæзгуытæм æрыздæхтысты цæфтæ æмæ инвалидтæй. Хъыгагæн, ацы стыр хæсты хайадисджытæй ма не ‘хсæн сæрæгасæй сты æрмæстдæр иугæйттæ, кæцытæн стыр кад ис æмæ æмбæлон æххуыс исынц паддзахады ‘рдыгæй. Хæсты тугуарæн азты уыдон Сырх Æфсады рæнхъыты уæвгæйæ, бæрзæйсæттæн цæф ныккодтой фашисттæн æмæ фæуæлахиз сты историйы иууыл тыхджындæр æмæ тæссагдæр  знагыл.

Уыцы знаг цыбыр рæстæгмæ Европæйы стыр хай бацахсгæйæ, хъавыд Советон Цæдисы дæр афтæ басæттынмæ.

Ирыстоны  ахæм  бинонтæ  нæ разындзæн,   уыцы  хæсты цæхæртæ кæй нæ басыгътой, хъыгдард дзы чи нæ баййæфта. Райгуырæн бæстæйы сæраппонд, фыдызнаджы ныхмæ хæцгæйæ, нæ зынаргъ ветерантæ, уе ‘мбæлттæй бирæтæ, се ‘взонг цард радтой, цæмæй мах, сæ фидæны фæлтæртæ, фашизмы æфсондзы бын ма цæрæм æмæ нын уымæй уæлдай зынаргъ сты сæ рухс нæмттæ.

Уыцы тугкалæн хæсты цы стыр лæгдзинад æмæ хъæбатырдзинад равдыстой, уый махæй рох никуы уыдзæн æмæ сын махæй алчидæр  кæндзæн стыр аргъ.

Абон мах  сæрыстыр стæм сымахæй, нæ зынаргъ ветерантæ. Уæ хæстон сгуыхтдзинæдтæ, æфсæддон намыс æмæ хъайтарон цардвæндаг мах ахуыр кæнынц Райгуырæн бæстæмæ уарзондзинады рæсугъд æнкъарæнтыл. Сымах стут, абон не ‘хсæнад сæрыстыр кæмæй у, уыдон.

Æмзонд, æмхъару æмæ æмвæнд куы уæм, хæсты азты советон адæмау, уæд фæуæлахиз уыдзыстæм цавæрфæнды хæрамдзинад æмæ фыдæхыл дæр. Уый фенын кодта Хуссар Ирыстоны ногдæр истори.

Нæ зынаргъ ветерантæн нæ зæрдæ  зæгъы æнæниздзинад, фæрныгад æмæ ныфс. Уæ кæстæртæ, уыдоны кæстæртæ даргъ, уæрæх цæуæт æмæ сæ хурæй æфсæст ут.

 

Дриаты Лейла

Ацы æрмæджытæ дæр бакæс:

Æнустæм мысинаг, кады аккаг Сæ хъæбатырдзинад – æнæмæлгæ Республикæ Хуссар Ирыстоны Президент Бибылты Анатолийы Сидт Стыр Фыдыбæстæйон хæстыл 73 азы сæххæсты цытæн парады хайадисджытæм Default ThumbnailФыдыбæстæйы хъайтарты нæмттæ мысæн мадзал Иу сайд нын – æгъгъæд!

Comments are closed, but trackbacks and pingbacks are open.