3-æм январы нæ горæты Сывæллæтты сфæлдыстады галуаны байгом президентон назбæлас. Æрвылаз дæр ацы галуаны кусджытæ сывæллæттæн бацæттæ кæнынц цымыдисон ногазон мадзæлттæ, кæцытæ байгом вæййынц президентон назбæласæй. Мадзалмæ æрбацыдысты Президент Гаглойты Алан, Ахуырад æмæ зонады министр Лолаты Аслан, РХИ-йы Президенты цур сывæллоны барты фæдыл æххæстбарджын Джиоты Аэлитæ æмæ æндæр бæрнон адæймæгтæ.
Ацы аз президентон назбæласы уазджытæ уыдысты Сæрмагонд æфсæддон операцийы фæмардуæвджыты æмæ дзы абон хайад чи исынц, уыцы хæстонты сывæллæттæ, афтæ ма сывæллæтты æхсæнадон организаци «Раззагонтæ»-йы активон хайадисджытæ. Ацы организаци архайы Сывæллæтты сфæлдыстады галуаны бындурыл.
Бæрæгбонон мадзал райдыдта театралон сценкæйæ. Экраныл æвдыст цыдысты зымæгон пейзажтæ. Уæдмæ фæзындысты Митын Дада (Тедеты Андрей) æмæ Митын Чызг (Джиоты Аннæ). Уыдон зæрдæбын арфæтæ ракодтой æрæмбырдуæвджытæн. Галуаны режиссер Дзигойты Маринæ Нарты кадджыты персонажтæй сарæзта поппури æмæ йæ сывæллæттæ сæххæст кодтой тынг хорз.
Уый фæстæ чысыл уазджытæн раарфæ кодта Гаглойты Алан. «Æрбалæууыд Ног аз æмæ нæ бафæндыд ацы диссаджы сывæллæтты бахъæлдзæг кæнын. Мах иууылдæр хорз æмбарæм сæрмагонд æфсæддон операцийы фæмардуæвæг хæстонты бинонты зæрдæты рыст. Абон нæ хъуыдытæ сты сæрмагонд æфсæддон операцийы хайадисджытимæ. Уыдон фронты раззаг хаххы хъæбатырæй æххæст кæнынц сæ хæстон хæстæ. Ныфс нæ ис, тагъд рæстæджы сæрмагонд æфсæддон операцийы нысæнттæ къухты кæй бафтдзысты æмæ нæ лæппутæ сæрæгасæй кæй æрæздæхдзысты сæ хæдзæрттæм. Ут нын, алыхатт дæр æнæниз. Мах та уын цин кæндзыстæм уе ‘нтыстытыл. Мæ зæрдæ уын зæгъы æнæниздзинад æмæ царды æппæт хæрзиуджытæ. Тынг нæ фæнды, цæмæй уæ царды уа фылдæр циндзинæдтæ».
Аргъæутты персонажтæ залы уæвæг сывæллæттыл узæлыдысты æмæ сæ афтæмæй хъæлдзæг кодтой. Зарджытæ æмæ кæфтытæ кæрæдзи ивтой. Сывæллæтты сфæлдыстады галуаны хъомылгæнинæгтæ сæ арæхстдзинад равдыстой куыд кафынæй, афтæ зарынæй дæр.
Митын Дада сывæллæтты рахуыдта кафынмæ Назбæласы цурмæ æмæ уыдон дæр райзæрдæйæ æрзылдысты йæ алыварс. Фыццаг уал сæххæст кодтой нæртон «Симд». Афтæмæй цасдæр рæстæджы дæргъы Галуанæй хъуыстысты зæрдæйæн æхцондзинад хæссæг музыкæйы зæлтæ.
Кæй зæгъын æй хъæуы, ногазон лæвæрттæ райстой сывæллæттæ иууылдæр.
Нæ уацх.
