Сырх, бур, цъæх æмæ ацыдыстæм
Нæ историйы фыццаг рухснысан (светофор) вæрд æрцыд 1868 азы Лондоны, Бритайнаг Парламенты раз. Уæрæсейы та 1930 азы Ленинграды. Уый бирæ азты дæргъы у сæйраг æмæ æхсызгонд фæзынд нæ фæндаггонты æдасдзинадæн.
Рухснысанмæ гæсгæ фæндаджы сæрты хизыны фæтк бирæтæн зонгæ нæу. Паддзахадон ав-тоинспекцийы кусджытæ кæд куыд æмбæлы, афтæ кусынц, уæддæр фæндаггон æгъдаухалджыты нымæц къаддæр нæ кæны. Куы сæ бауромой, уæд та кæмæн рухснысаны аххос вæййы, чи та фæндагмæ не ‘ркæсгæйæ, размæ афтæ ныццæвы æмæ йæ бауромæнтæ нал вæййы.
Фæстаг рæстæджы, куыд уынæм, афтæмæй автотранспортон фæрæзтæ фæфылдæр сты, фæлæ машинæ скъæрыны культурæ та, хъыгагæн, зæрдæвæндон нæу. Раст зæгъгæйæ, специалисттæ æнæрынцойæ кусынц, цæмæй фæндагзмæлды архайджытæ, шофырæй, фистæгдзæуæгæй фæтк ма халой.
Рухснысан пайда кæй у, уый дызæрдыггаг нæу. Æппæты фыццаг сæ сæвæрынц тæссаг æмæ фæндаггон фыдбылызтæ арæх кæм æрцæуы, ахæм бынæтты. Мысгæ дæр æй адæмы æдасдзинады тыххæй æркодтой, пайда дæр бирæ хæссы. Фæлæ Цхинвалы хуызæн чысыл горæты сæ нымæц æгæр бирæ у. Алы фæзилæны рухснысæнттæ æрывæрæн нæй. Хатгай нæм афтæ фæкæсы, цыма тагъд уынгты аскъæрæн нал уыдзæнис.
Рухснысан стыр ахъаз у адæмы æдасдзинадæн. Йæ фæрцы фыдбылызтæй хызт сты шофыртæ дæр æмæ бæлцæттæ дæр. Уæлдайдæр та ныры дуджы автотранспорты нымæц бæрæг кæй фæфылдæр ис, уый фæстиуæгæн у æнæмæнгхъæуæг.
ДРИАТЫ Лейла
Comments are closed, but trackbacks and pingbacks are open.