Рухсцард хæсджытæ

Адӕмон хӕдзарады электроэнергийӕн стыр нысаниуӕг кӕй ис, уый нӕ алкӕмӕн дӕр зындгонд у. Уый фӕрцы ӕмбӕстӕгтӕ, куыстуӕттӕ ӕмӕ уагдӕттӕ ӕххӕст хъомысадӕй иуварс ӕмӕ бӕстон кӕнынц ӕрвылбонон бакӕнинаг ӕмӕ ӕнӕмӕнгхъӕуӕг хъуыддӕгтӕ, рогдӕр сын кӕны се ‘рвылбонон разылӕууӕг хӕстӕ. Электроэнергийы хӕрзиуджытӕй хайджын сты, куыд нӕ республикӕйы иннӕ районтӕ, афтӕ Цхинвалы районы фӕллойгӕнджытӕ дӕр. Ам электрохызӕджы хистӕрӕй 1971 азӕй фӕстӕмӕ йӕ разылӕууӕг хӕстӕ намысджынӕй ӕххӕст кӕны Уанеты Христафор. Уый Тбилисы политехникон институт каст фӕуыны фӕстӕ, кусын райдыдта ацы куыстуаты, хорз сахуыр кодта йӕ дӕсныйад ӕмӕ сси йӕ хъуыддаджы дӕсны разамонӕг. Кӕддӕриддӕр йӕ разылӕууӕг хӕстӕ ӕххӕст кӕнынмӕ кӕсы бӕрндзинады цӕстӕй, коллективмӕ йын ис хъӕрмуд ахаст ӕмӕ сӕ куыст дӕр домы. Йӕ ӕнӕзӕрдӕхудт ӕмӕ намысджын фӕллойы тыххӕй йын лӕвӕрд ӕрцыд Республикӕ Хуссар Ирыстоны сгуыхт инженеры ном.

  Йемæ ныхас кæнгæйæ мын радзырдта, коллективы уӕнгтӕ ӕндӕр ӕмӕ ӕндӕр рӕстӕджы цы ӕнӕаргъӕвгӕ куыстытӕ бакӕнынц, уыдон тыххӕй. Сӕ бӕрны сты куыд районы хъӕутӕ се ‘ппӕт дӕр, афтӕ ма Знауыры районы Мугут, Стыртулдзджын, Принеу ӕмӕ Ӕртӕсуадоны хъӕутӕ дӕр. Сӕ куыст та, сӕйраджыдӕр, у электрохӕххытӕм хъус дарын. Ацы аз сын Инвестпрограммӕйы фӕлгӕтты уыд Наниаур, Сатихъар ӕмӕ Хелцуайы  хъӕуты электрохӕххытӕ ногæй саразын. Зӕгъӕм, Сатихъары хъӕумæ телцӕджындзтӕ сагъд ӕрцыд 100 бӕрц ӕмӕ сыл телтӕ та айвӕзтой  4 километры дӕргъӕн. Зӕгъын хъӕуы, раздӕры телтӕ кӕй уыдысты ӕнӕизоляцигонд, ныр ног уагъд телтӕ сты изоляцигонд ӕмӕ йын нӕ тых кӕндзӕн уазал ӕмӕ тӕвд рӕстӕг дӕр. Уымӕй дарддӕр ма Ксуисы хъӕуы цӕрджытӕн арӕзт æрцыд цалдӕр цӕрӕн хӕдзары, хъӕуы сӕм рухсы хахх бауадзын ӕмӕ ууыл дӕр куыстӕуы. Кӕй зӕгъын ӕй хъӕуы, нӕ хъӕуты электроадӕттӕн хӕххытӕ бынтон хорз уавӕры не сты æмæ куы фехæлынц, уӕд та сӕ ӕвӕстиатӕй сцалцӕг кӕнынц. Электрохызӕджы ис 10 кусӕджы, уыдон та сты куыстуаты хистӕр, сӕйраг инженер ӕмӕ мастер, иннӕ 7 та сты монтертӕ. Афтӕ ма хъӕууон бынӕтты дӕр ӕдӕппӕт ис 15 монтеры, уыцы нымӕцы Принеуы, Тъбет, Къостайыхъӕу, Арцеу, Гром, Бихъар, Дменис ӕмӕ ӕндӕр бынӕтты. Цӕвиттон, кӕцыдӕр хъӕуы электрохахх фехӕлд, уӕд ын бынӕттон монтер хъуамӕ сбӕрӕг кӕна йӕ аххосаг ӕмӕ фехъусын кӕна электрохызӕгмӕ ӕмӕ уырдыгӕй рацӕуӕг бригадӕйы уӕнгтӕ аиуварс кӕнынц цухдзинад. Ӕдасдзинады фӕткойтӕ хъахъхъӕныны тыххӕй бынӕттон монтерӕн иунӕгӕй кусӕн нӕй. Исты бӕллӕх куы ӕрцӕуы, уӕд сӕм фӕдзуры Уæлвæткон уавæрты фæдыл министрад ӕмӕ уӕд ахицӕн кӕнын бахъӕуы рухсы хахх.    

Хуыбиаты Никъала