Кортиаты Леуан у Ирыстоны хъуыстгонд инженер, фæндагаразæг. Бирæ зонд æмæ тых бахардз кодта, Транскам куы арæзтой уæд, йæ хуссайраг фадыджы хицауы бынаты кусгæйæ. Уый фæстæ та уыд Зæрæмæджы ГЭС-ы арæзтады сæйраг инженер. Ныртæккæ у Цæгат Кавказы паддзахадон металлургион институты профессор, Европæйаг æрдззонына-ды академийы академик, Уæрæсейы транспорты академийы академик. Хорзæхджын у Цæгат æмæ Хуссар Ирыстоны уæлдæр хæрзиуджытæй, лæвæрд ын æрцыд «Хуссар Ирыстоны зонады сгуыхт кусæджы» кадджын ном. Фæстаг хатт та ссис Уæрæсейы Федерацийы национ премийы лауреат фæндæгтыл цæуыны æдасдзинады фæдыл. Ныммыхуыр кодта 100 зонадон куысты, уыдоны нымæцы – 10 монографийы.
Мæ сабибонтæй фæстæмæ зонын ацы уæздан, хиуылхæцгæ, куырыхон ирон лæджы, æмæ мын йæ фенд кæддæриддæр хæссы æхцондзинад хуры хъарм тынтау.
Ахæм æхцондзинад мын æрхаста, Леуан йæ мыггаг – Кортиаты тыххæй цы егъау чиныг бацæттæ кодта, уый дæр. Уырыссагау æрæджы мыхуыры рацыд, Дзæуджыхъæуы рауагъдады.
Чиныг «Книга фамилии Кортиевых» у гуырахстджын, егъау, аив фæлгонцгонд хицæн техникон æмæ корректорон рæдтыдтытыл куы нæ дзурæм, уæд. Ахæм чиныгæн æрмæг æрæмбырд кæнын хъуыд, æмæ автор ууыл бирæ кæй бафыдæбон кодта, уый дзырдтаг нæу. Чиныг фотоальбомы æнгæс кæй рауад, уый та ууыл дзурæг у, æмæ йæ саразæг бирæ къамтæ кæй æрæмбырд кодта сæ мыггаджы рагфыдæлтæй абоны кæстæрты онг, æмæ уый дæр хорз миниуæгыл дзурæг у, кæд дзы Кортиатæй алкæй къам нæй, уæддæр.
Ацы чиныгæй цалдæр сæры ныммыхуыр кодта газет «Фидиуæг» дæр ирон æвзагмæ тæлмацгондæй. Уымæ гæсгæ чиныгыл бæстон нæ дзурдзынæн. Автор ныфс æвæры, дарддæр дæр кæй кусдзæн ацы чиныгыл, кæй йæ баххæст кæндзæн æндæр хъæугæ æрмæджытæй, чиныгкæсджытæ цы фиппаинæгтæ баххæсой, уыдон кæй бахынцдзæн æмæ йæ дыккаг хатт мыхуыры кæй рауадздзæн иронау. Тæлмац та йæ кæны журналист Кортиаты Æхсар.
Чиныджы ис ахæм сæргæндтæ: «Предыстория», «Вступление», «Начало появления фамилии Кортиевых по историческим источникам и материалам», «Развитие и переселение Кортиевых во временном и географическом пространстве (факты, логика суждений и их неопровержимость)», «Появление личностей из фамилии Кортиевых на страницах истории Южной Осетии», «Древо отдельных семейств», «Участники ВОВ», «Участники других боевых действий, в том числе племянники», «Кто прославляет фамилию».
Ацы сæргæндтæй бæрæг у, историон æрмæджытыл бындуриуæг кæнгæйæ, чиныджы лæмбынæг дзырд кæй цæуы Кортиаты мыггаджы равзæрдыл, абон цы бынæтты цæрынц, Цæгат Ирыстонæй Хуссар Ирыстонмæ сæ иу хай сæ æрвадæлтимæ кæд æмæ цæмæн алыгъдысты цæрынмæ, кæм æрцардысты.
Чиныгаразæг Кортиаты Леуан пайда кæны историон æрмæджытæй. Бындурон фарстатæй дæр ацы æрмæджытыл æнцой кæны автор.
Чиныджы сты Кортиатæ æмæ се ‘рвадæлты цæрæн бынæттæ, дзуæрттæ, кувæндæтты хуызджын къамтæ, æмæ уыдон хъæздыгдæр, ахадгæдæр кæнынц мыхуыргонд æрмæджыты.
Загътон ма йæ: ис дзы дзырдтаг фарстатæ (уыдон та, ахæм чиныг аразгæйæ, æнæмæнг фæзынынц), фæлæ Леуаны хъуыдымæ гæсгæ, ног рауагъды иуварсгонд æрцæудзысты.
Æхсызгон хъуыддаг у, фæстаг рæстæджы кæй сарæх сты мыггæгты куывдтæ, «Ныхас»-тæ, чингуытæ сыл уагъд кæй цæуы.
Ногиры хъæуы цæрæг, Æппæтдунеон æхсæнадон змæлд «Иры Стыр Ныхас»-ы хистæрты Советы уæнг, дзырддзæугæ адæймаг Кортиаты Леуан уæрæх, сфæлдыстадон куыст бакодта йæ мыггаджы равзæрд, абоны бонмæ йæ истори æрæмбырд кæнын æмæ сыл хицæн чиныг рауадзыны тыххæй. Ууыл дзырд дæр нæй.
Мах та йын зæгъæм бузныг. Дарддæр дæр ын фылдæр бантысæд адæмы хæрзиуæгæн!
Гасситы Моисей
Comments are closed, but trackbacks and pingbacks are open.