Республикон политикон парти «Иугонд Ирыстон» раразмæ кодта Республикæ Хуссар Ирыстоны Парламенты æстæм æрсидты депутаттæм кандидаттæ æмæ сиды сымахмæ, не ‘мбæс-тæгтæм, цæмæй нæ фарсмæ балæууат.
РПП «Иугонд Ирыстон»-ы программæ у æмæ дарддæр дæр уыдзæн Уæрæсейы Федерацийы скондмæ УФ-йы субъекты хуызы бацæуын æмæ уый фæстæ Уæрæсейы сконды РЦИ-Аланиимæ баиу уæвын. Ахæм уыд æмæ у нæ стратегион курс, кæцы фехъусын кодтой партийы бындурæвæрæг Бибылты Анатоли Ильяйы фырт æмæ партийы сæрдар Бибылты Ацæмæз Æхсары фырт.
1774 азы иугонд Ирыстон бацыд Уæрæсейы империйы скондмæ, æмæ никуы фехъусын кодта уæрæсейаг паддзахады скондæй рахизыны тыххæй, Уæрæсейы империйы, æмæ уый фæстæ та Советон Цæдисы бартæ дарддæгæнæг – Уæрæсейы Федерацийы скондæй Ирыстоны хуссар хайы рахизыны тыххæй ницахæм нормативон-барадон акт нæй.
Ирыстоны иудзинады тыххæй йе ‘нусон бæллиц нæ адæм равдыста 1992 æмæ 2006 азты уагъдцæуæг референдумты фылдæр хъæлæстæй æмæ уымæй фенын кодта Хуссар Ирыстоны адæмы æнæфæцудгæ курс сæ историон стыр Райгуырæн бæстæимæ баиу уæвыны тыххæй, куыд сæ историон территоритæ æмæ этникон иудзинад бахъахъхъæныны ныфс, афтæ. Уæдæй фæстæмæ чи рахъомыл сты, æмбæстæгты уыцы ног фæлтæртæ, Ирыстоны хуссар æмæ цæгаты æрбаиу кæнынымæ стыр тырнындзинад бахъахъхъæнын хынцгæйæ, РПП «Иугонд Ирыстон» Уæрæсейы скондмæ бацæуыны фарста нымайы иттæг æнæмæнгхъæуæгыл, уæлдайдæр та фæстаг азты дунейы геополитикон уавæр нымайгæйæ.
Политикон интригæтæ æмæ ныхмæлæудтытыл рæстæг æмæ энерги сафынæн махæн моралон бар нæй. Æхсæнадон фыдæхдзинады фæстиуæг систы адæмы царды гъæд кæй æвзæрдæр кæны, уый, демографион кризис, коррупцийы рæзт, фыдракæнддзинад, закъон хъахъхъæд кæй нæ цæуы æмæ æхсæнады кæрæдзийыл æууæнкдзинады ныллæг æмвæзад.
Хуссар Ирыстоны адæмы æмæ Уæрæсейы Федерацийы æфсымæрон, алыварсон æххуысы фæрцы мах бахъахъхъæдтам нæ хæдбардзинад æмæ дарддæр дæр кусæм нæ республи-кæйы æндидзынадыл. Нæ размæцыды хъуыддаджы мах ныфс ис Уæрæсеимæ дарддæры æмгуыстадæй, йæ фарсхæцынадæй. Æрмæстдæр политкультурон Уæрæсейы сконды нæ адæм райсдзысты æдасдзинады гарантитæ, этнос æмæ дарддæры рæзт бахъахъхъæнын. Ныхмæлæууæджы агресссийы рæстæджы нæ Фыдыбæстæйæн иууыл зындæр бонты нæ фарсмæ алыхатт дæр уыд Уæрæсе. Æмæ ирæттæ дæр гадзрахатæй никуы рацыдысты Уæрæсейыл æмæ ныртæккæ дæр Уæрæсейы Федерацийы адæмимæ иумæ фæрсæй-фæрстæм хъахъхъæнынц йæ интерестæ сæрмагонд æфсæддон операцийы зонæйы, нацизм æмæ неофашизмы ныхмæ тох кæнгæйæ. Дунейы фашизм кæй парахат кæны, уый аххосæй тæссаг у нæхæдæг дæр куы фесæфæм, уымæй. Æмæ ацы сæрмагонд æфсæддон операци номхуындæй у уый тыххæй, Владимир Путин куыд загъта, афтæмæй уый у сатанизмы ныхмæ тох. Уый махæн у æвæджийаг операци æмæ уымæ гæсгæ нæ хæстонтæ сæхиуыл æнæауæрдгæйæ лæууынц нæ ныфс – Уæрæсейы интерестæ бахъахъхъæныны сæраппонд. Нымайæм афтæ, æмæ Украинæйы сæрмагонд æфсæддон операцийы æфсæддон службæгæнджыты æмæ хайадисджыты хайгай мобилизацийы фæлгæт-ты, æмбæстæгты, афтæ ма сæ бинонты уæнгтæн æххуысы фæдыл закъæтты пакет РХИ-йы Парламенты ног æрсидт хъуамæ райса фыццаг рады.
Мах иу адæм стæм. Дыууæ Ирыстоны дихгæнæг арæн, йæ æппæт формалон процедурæтимæ махæн райсинаг нæу. Мах иууылдæр æмбарæм, Ирыстоны фидæны сæраппонд мах фидарæй кæй хъуамæ цæуæм нæ историон нысан – Цæгат Ирыстонимæ баиу уæвынмæ. Ацы процесс разынд дæргъвæтин. Советон Цæдисы ныппырхы фæстæ процессæн йæ бон нæ уыд æмæ уыдаид æнцон æмæ цыбыр. Баиу уæвын у нæ нысан, æмæ мах хъуамæ цæуæм ацы план сæххæст кæныны фæндагыл дыууæ паддзахады æнгом æмархайды архайгæйæ. Цæстмæмитæй дыууæ Ирыстон нæ баиу уыдзысты, хъæуы ахуыргонд историкты, паддзахадон æмæ æхсæнадон архайджыты, æмбæстагон æхсæнады æппæт институтты егъау куыст бакæнын.
Хуссар Ирыстоны ма хъуамæ уа æмбæстæгты хицæн къордтæ, кæцыты фæдыл зилынц æмæ сæ бæстæйы æхсæнадон-политикон цардæй иппæрд кæнынц æндæр политикон хъуыдытæ æмæ цæсæтæнгасты тыххæй. Алы адæймаг дæр Фыдыбæстæйæн хъуамæ уа зынаргъ. Алы æмбæстаджы, алы гоймаджы бартæ дæр паддзахадон хицауиуæгадæн хъуамæ уой æвæджийаг æмæ сæ хъахъхъæна.
Адæймагады традицион æргъадтæн сфидаргæнæн нæй, культурæйæн нæ паддзахаддзинады ахсджиагдæр бындуры статус куынæ раздахæм, уæд.
РПП «Иугонд Ирыстон» план кæны бакусын æмæ ног Парламентмæ æркæсынмæ рахæссын «Паддзахадон культурон политикæйы бындуртæ», цыран культурон æмæ гуманитарон рæзт хъуамæ уой «куыд национ æдасдзинады стратегийы æнæфæхицæнгæнгæ хай, куыд паддзахадон æмæ экономикон дидинæфтыды, бæстæйы хæдуагæвæрды бындур, куыд нæ культурон иудзинад бахъахъхъæныны гарант, афтæ». Уый тыххæй 2030 азмæ культурæйы къабазы проектты æппынкъаддæрæй 80 проценты, кæцытæн финанстæ дæтты паддзахад, хъуамæ размæ кæной Ирыстоны традицион æргъадтæ.
Цытджын æмфыдыбæстæйонтæ! Уæ фарсхæцынадыл æмæ уæ равзæрстыл бындуриуæг кæнгæйæ, махæн нæ бон суыдзæн дарддæр дæр не ‘хсæнады интересты тыххæй кусын!
Барвæтк æмæ рæзт суыдзысты Ирыстоны иудзинады бындур!
Дунескæнæг Хуыцау нын æххуысгæнæг уæт!
