Уæрæсейы Федераци Украинæйы сæрмагонд æфсæддон операци кæй æххæст кæны, уымæ гæсгæ АИШ æмæ Евроцæдисы бæстæтæ йæ ныхмæ расидтысты карз санкцитæ. Дунейы уавæр кæй фæкарздæр, уый æндавы нæ республикæйы цæрджытыл дæр, уыцы нымæцы товарты æргъты рæзтыл дæр.
Ныр къуырийы бæрц нæ республикæйы территорийыл рæзынц æргътæ. Иуæй-иу магазинтæ æмæ аптекæтæ та сæ куыст рæстæгмæ æрæхгæдтой. Хæлцадон продукттæй магазинтæ раздæр цы товартæ æрластой, уыдон адæм аскъæфтой, ногласт товартæн та сæ аргъ зынгæ фæфылдæр. Адæм стыхстысты, бирæтæн æнæуый дæр мæйæ-мæймæ сæ мызд нæ фаг кодта.
Мах бабæрæг кодтам цалдæр магазины, зæронд æргътæ абарстам ног æргътимæ. Егъау супермаркет магазинты зæронд æмæ ног товар схæццæ кодтой. Иууылдæр сыл ног æргътæ сæвæрдтой. Зæгъынц, зæгъгæ сæ ахæм æргътæм æрластой. Сæ тæрхджытæй иуæй-иутæ сты афтид. Зæгъынц, зæгъгæ, ныккæнды дæр товар нал ис. Мæнмæ гæсгæ ахæм ныхæстæ уымæн кæнынц, цæмæй адæм тынгдæр фæтæрсой æмæ сæ фæстаг къапеккæй дæр балхæной, сæ магазинты чи нæ уæй кодтой, уыцы продукттæ. Къаннæгдæр магазин йæ фарсмæ, уырдæм æлхæнджытæ зивæгдæрæй цæуынц, фæлæ дзы æргътæ афтæ бæрзонд не сты. Уæйгæнæг мын загъта, уыдонимæ та иууыл тынгдæр кæй фæфылдæр сæкæр æмæ уыимæ баст хæлцады æргътæ: «10 килограмм сæкæр нæм уыд 570 сомы, стæй – 720 сомы. Ныр та аргъ схызт 800 соммæ. Зæгъынц, Уæрæсейы Федерацийы территорийыл, дам, айк, ссады æргътæ 50 проценты фæфылдæр сты. Уыцы ног æргътæ мæм раппæрста, æз Цæгат Ирыстон-Аланийæ товар цы фирмæйæ ластон, уыдон. Нырма мæм зæронд æргътæй ласт продукттæ ис, фæлæ ногæй куы æрласон, уæд мæнмæ дæр æргътæ фæивдзысты».
Цардуагон химийы магазинтæй сæ иуы дæр ис цъус товар. Магазинты хицау зæгъы, махæн дæр, дам, зын у, афтæ æвиппайды æргътæ кæй фæфылдæр сты. «Уый мæхицæн тынгдæр зын вæййы, фæлæ цы бакæнон. Зæронд ласæггаг товар мæм баззад гæрзтææхсæн порошоктæ æмæ шампунтæ, уыдон раздæр куыд уыдысты, афтæ сæ уæй кæнын. Фæлæ ма æркæсут мæнæ ног товарты прайстæм. Бынаты сæ исчи куы контроль кæнид æмæ нын сæ бæрзонд аргъмæ куынæ дæттиккой. Уæрæсейæн йæхи мидæг цы уадзынц, уыдон уæддæр куыннæуал зынаргъ кæниккой».
Æндæр магазин, цыран уæй кæнынц ноггуырд сабитæн хъæуæг æрмæджытæ, уым дæр æргътæ фæфылдæр сты 40 процентæй. Æрыгон мад, йе ‘хцадонимæ архайгæйæ, хъаст кодта, 40 проценты кæй фæфылдæр сты памперстæ. «Памперс æлхæдтон 800 сомæй, ныр та – 1200 сомæй къаддæр не ссардтон. Уæрæсейы цы товар уадзынц, уыдоны æргътыл ноджы тынгдæр схæцыдысты».
Мах бахатыдыстæм ацы цауы тыххæй Экономикæйы райрæзты министрады дæлбаруæвæг Æргътæ бæстон кæныны фæдыл хайадмæ. Уый фæдыл загътой, зæгъгæ сæ бон бандавын нæу уавæрыл. Уымæн æмæ бынæттон амалиуæггæнджытæн сæхицæй кæнгæ нæу æргъты рæзт.
Уазæгты Марфа
Comments are closed, but trackbacks and pingbacks are open.