Ивгъуыд къуыри нæ республикæмæ æрбаластой туаггуыры æмбырдгæнæн резервуар. Уый монтаж цæуы Республикон бирæпрофилон медицинон центры. Ацы лæвармæ рагæй æнхъæлмæ каст рынчындон. Бæрæг куыд у, афтæмæй ацы зынаргъ лæвар Хуссар Ирыстонæн бакодтой не ‘мзæххон амалиуæггæнджытæ Мæскуыйæ – Пухаты Олег, Дзуццаты Игорь æмæ Кокойты Хъазбег. Бизнесментæн уый фыццаг хæрзаудæн лæвар нæу. Стыр парти хостæй баххуыс кодтой нæ республикæйæн коронавирусы инфекци куы ахæлиу, уæд дæр. Куыд зонæм, афтæмæй уыцы бонты тæссаг уыд, фæндаг исты аххосæгтæм гæсгæ куы æрæхгæна æмæ рынчындон æнæ туаггуыр куы баззайа. Ацы æртæ лæппу зыдтой уыцы проблемæ æмæ Екатеринбурджы ссардтой аст кубометры туаггуыр цы резервуары цæуы ахæм ифтонггарз. Уый та у аст мин литр туаггуыр кæм цæуы, ахæм. Ацы зынаргъ лæвар ныртæккæ цæуы монтажгонд æмæ куыддæр æвæрд æрцæуа, афтæ скусдзæнис. Ныр дохтыртæ нал тыхсдзысты, æдзух сæм уыдзæн, туаггуыр, цас хъæуы, уый бæрц.
Туаггуыры цухдзинад кæд коронавирусы рæстæджы фæбæрæг, уæддæр уымæй медицинон уагдæттæ фæпайда кæнынц æрвылбон дæр. Сæрмагонд балонты цы туаггуыр æрласы медицинон центр Цæгат Ирыстон-Алани æмæ Хъæрæсе-Черкессийæ, уый-иу фаг уыд дзæвгар рæстæг. Фæлæ инфекцион низ куы апарахат, уæд медицинон уагдæттæн сæвзæрд йæ цухдзинады проблемæ. Рынчынтæ æгæр бирæ кæй уыдысты, æмæ туаггуыр цы балонты ластой, уыдон та фаг кæй нæ кодтой, уый хицæн фарст уыд. Иннæ зындзинад ноджы катайагдæр – Хуссар Ирыстон æмæ Уæрæсейы ‘хсæн цы фæндаг цæуы, уый иуафон уыд æхгæд. Ацы проблемæ аскъуыддзаг кæныны хайад райстой, æхсæнад дæр. Æхсæнадон архайæг Бететы Юри æрсидт адæммæ, цæмæй иумæйаг тыхтæй срæвдз кæной туаггуыры цех. Уыцы акцийы руаджы республикæйы медицинон бирæпрофилон центры хъуамæ сырæзтаид цех, цыран уагътаиккой туаггуыр. Уымæн та фæрæзтæ æрæмбырд кæнын хъуыд 10 милуан сомы бæрц.
![](https://new.xurzarin.ru/wp-content/uploads/2021/05/74_02-300x300.jpg)
Куыд зонæм, афтæмæй туаггуыры станц Хуссар Ирыстоны уыд раздæр дæр. Фæлæ йæ куыст æрурæдта 2008 азы. Ацы проблемæ аскъуыддзаг кæныныл архайдта Æнæниздзинад æмæ социалон рæзты министрад дæр, фæлæ-иу хъуыддаг бакъуылымпы æхцайы фæрæзты цухдзинады аххосæй. Низы эпидеми куы ахæлиу нæ республикæйы районты дæр, уæд рынчындæтты хъуыд 60 баллоны туаггуыр. Ныртæккæ республикон медицинон бирæпрофилон центры цы станц монтаж цæуы, уый та суткæ дæтдзæн 90 баллоны, æмæ аххæсдзæн æгас республикæйы районты медицинон уагдæттыл дæр.
УАЗÆГТЫ Марфа
Comments are closed, but trackbacks and pingbacks are open.