Эксплуатацимæ радтынмæ цæттæ у Вокзалгæрон уынджы сабитæн цы рæвдауæндон арæзт æрцыд, уый. Йæ сырæзт æхсызгон цау у ацы районы цæрæг ныййарджытæн, уымæн æмæ сæ сывæллæтты кæнынц дæрддзæф сæм чи сты, ахæм сабидæттæм.
Рæвдауæндон арæзт æрцыд цыбыр æмгъуыдмæ Инвестицион программæйы фæлгæтты. Йæ фæзуат у 2300 квадратон метры бæрц. Аразгæ та йæ скодта арæзтадон организаци «Бадо».
Рæвдауæндон арæзт хъуамæ æрцыдаид 2 азы æмгъуыдмæ. Фæлæ арæзтадон организацийы генералон директор Уалыты Владиславы хъæппæрисæй уый сырæзт 6 мæйы æмгъуыдмæ. Арæзтады æнæ улæфт бонтæй куыстой 35-40 адæймаджы бæрц æмæ сын цыбыр рæстæгмæ ахæм æнтыст дæр уымæн уыд.
Рæвдауæндон арæзт æрцыд гъæдджынæй. Ифтонг у хъæуæг инвентарæй. Афтæ ма ифтонг у хъæрмадæй дæр. Æвæрд дзы æрцыд йæхи трансформатор, лæууы дзы генератор дæр æмæ рухс куы ахуысса, уæд дæр уыдзæн электроифтонгад.
Бæстыхай арæзт у фондз къорды сывæллæттæн. Ис дзы актон зал, компьютерон класс, ифтонг сты телевизортæ æмæ аудио системæйæ. Сывæллæттæн фаг ис хъазæнтæ, велотренажертæ æмæ æндæр хъазæн дзаумæттæ дæр.
Кæрт дæр у хорз арæзт. Алы къорды сывæллæттæн дæр дзы арæзт æрцыд йæхи беседкæ. Беседкæтæ дæр ифтонг сты хъазæнтæй. Иудзырдæй, ам сабитæ æнкъард нæ кæндзысты, арæзт сын æрцыдис комфортон уавæртæ.
Банысан кæнын хъæуы уый æмæ зынгсирвæзты системæ дæр арæзт кæй æрцыд æмбæлонæй. Арæзтадон организацийы генералон директор куыд радзырдта, афтæмæй зынгсирвæзты рæстæджы скусдзæн сæрмагонд системæ æмæ фыдбылыз не ‘рцæудзæн. Æддейæ лæууы сæрмагонд гидранттæ æмæ зынгхуыссынгæнджытæ куы æрбацæуой, уæд сæ бон уыдзæн дон сисын.
Иудзырдæй, рæвдауæндон арæзт у нырыккон домæнтæм гæсгæ æмæ дзы сабитæн ахуыр-хъомыладон куыстытæн арæзт æрцыд æппæт уавæртæ дæр.
БЕСТАУТЫ Валя
Comments are closed, but trackbacks and pingbacks are open.