Хуссар Ирыстоны Уæлвæткон уавæрты министрады кусджытæ горæт Цхинвалы астæуккаг скъолаты уадзынц гом уроктæ. Фембæлдытæ уагъд цæуынц министрады сæргълæууæг Гассеты Ибрагимы хæслæвæрдмæ гæсгæ.

Ацы мадзæлттæ ауадзыныл разы у республикæйы Ахуырад æмæ зонады министрад дæр.

«Урокты рæстæджы сапертæ сывæллæттæн æвдисынц сармадзанты, нæмгуыты, гранатæты, минæты алыгъуызон хуызтæ. Растдæр ахæм хæстон æрмæджытæ фенæн ис хатгай нæ алфæмблайы, уыдон баззадысты хæстон архайдтытæй фæстæмæ», — загътой ведомствойы пресс-службæйы.

Уæлвæткон уавæрты министрад хъусын кæны, сапертæ ма ахуырдзауты кæй зонгæ кæнынц рæмудзæн æрмæджытимæ архайыны уагæвæрдимæ.

«Сæйраг уаг у, сæрмагондæй ницы саразын, æдас ранмæ рахизын æмæ æххуысмæ фæдзурын. Уымæн æмæ цыфæнды æнæрхъуыды змæлд дæр, гæнæн ис, æркæна трагедимæ», — банысан кодтой уæлвæткон уавæрты ведомствойы.

Министрады кусджыты плæнтты ис æдасдзинады фæдыл ахуыртæ горæт Цхинвалы алы скъолаты дæр ауадзын.