Мидхъуыддӕгты министрад 10-ӕм ноябры фӕнысан кӕны йӕ профессионалон бӕрӕгбон ӕмӕ ацы цытджын бонмӕ цӕттӕ ӕрцӕуынц алыхуызон мадзӕлттӕ. Ацы аз дӕр та сӕ арӕхстдзинад равдыстой алыхуызон ерысты.
Автомат «Калашников»-ӕй полигоны уагъд ӕрцыдысты ерыстӕ министрады управленитӕ ӕмӕ хайадты ‘хсӕн, цыран хайад райстой 8 командӕйы. Нысанмӕ ӕхстой 100, 200 ӕмӕ 300 метрмӕ, ӕмӕ фӕуӕлахизуӕвӕг фӕбӕрӕг ис иууыл фылдӕр очкотӕ ӕрӕмбырд кӕныны фӕстиуӕгӕн. Милицийы Сӕрмагонд нысаниуæджы къорды командӕ ӕрӕмбырд кодта 855 очкойы ӕмӕ ссис ерысы уӕлахиздзау. Дыккаг бынат бацахста милицийы Тагъд фердӕхты къорды командӕ ӕмӕ ӕртыккаг призон бынат та райста горӕт Цхинвалы мидхъуыддӕгты управленийы командӕ. Хисӕрмагонд зачеты дӕр фыццаг ӕмӕ дыккаг бынат бацахстой милицийы Сӕрмагонд нысаниуæджы къорды кусджытӕ. Ӕртыккаг бынатыл та ацыд милицийы Тагъд фердӕхты къорды кусӕг.
Бӕрӕгбоны агъоммӕ ма мини-футболӕй дӕр уагъд ӕрцыдис турнир мидхъуыддӕгты министрады дӕлхӕйтты ‘хсӕн. Ам дӕр хайад райстой 8 командӕйы. Турнир рауад тынг цымыдисон. Милицийы Сӕрмагонд нысаны къорды командӕ иумæ группамӕ бахаудтой милицийы Тагъд фердӕхты къорды командӕмӕ ӕмӕ сӕ рамбылдта 4:2 хыгъдӕй. Ӕмӕ та финалы ногӕй фембӕлдысты. Ам хъазт рауад тынг ӕндыгъд, дыууӕ командӕ дӕр равдыстой сӕ арӕхстдзинад, тырнындзинад рамбулынмӕ. Ныр та амонд йӕ мидбылты фӕхудт милицийы Тагъд фердӕхты къорды командӕмӕ ӕмӕ рамбылдтой 2:1 хыгъдӕй ӕмӕ систы турниры уӕлахиздзаутӕ. Ӕртыккаг бы-нат та бацахста горӕт Цхинвалы мидхъуыддӕгты управленийы командӕ.
ДЖИОТЫ Александр
Comments are closed, but trackbacks and pingbacks are open.