Цхинвалы «Уырыссаг хæдзары» кæронмæ фæцис æвзонг кæсджыты æхсæнадæмон поэтикон конкурс «Удæгас классикæ»-йы æвзарæн этап. Конкурсы традицион æгъдауæй хъуыстысты уырыссаг, фæсарæйнаг æмæ уырыссаг æвзагыл фыссæг ирон классикты уацмыстæ.
Проекты национ куратор Надежда Рассохинайы ныхæстæм гæсгæ, 40 хайадисæджы ‘хсæн хуыздæры сбæрæг кæнын æнцон нæ уыд. Сæ ралæудтыты æмбæлон æмвæзад у ахуыргæнджытæ æмæ ныййарджыты иумæйаг куысты фæстиуæг.
Конкурсы жюрийы сæрдар уыд АПРЯЛ-ы президент Тедеты Залинæ, йе ‘ххуысгæнджытæ систы Хуссар Ирыстоны драмон театры артисттæ Кокойты Нинæ æмæ Гаглойты Эдуард, афтæ ма Хуссар Ирыстоны зонад-иртасæн институты кусджытæ Дыгъуызты Залинæ æмæ Дзасохты Ланæ.
Хицæн номинациты хуыздæр кæсджытыл нымад æрцыдысты Куыдзеты Андрей («Иууыл æвзонгдæр хайадисæг»), Битеты Тамерлан (Иууыл артистондæр хайадисæг»), Дриаты Миленæ (тексты хуыздæр равзæрст»), Гурам Кочишвили, Къæбысты София, Козаты Миланæ («Уырыссаг æвзаг ахуыр кæныны фæндондзинады тыххæй»), Дзæгъиаты Арсен (Иууыл зæрдæскъæфдæр хайадисæг»), Тедеты Барсæг (иууыл зæрдæмæдзæугæдæр хайадисæг») æмæ Бесаты Михаил («иууыл драматикондæр фæлгондз»).
Конкурсы национ этапы уæлахиздзау ссис Хуыгаты Олег (гимнази «Альбион»). Дыккаг бынат бацахста Санахъоты Алинæ (Цхинвалы 9-æм астæуккаг скъола), æртыккаг бынатыл ацыд Чилæхсаты Алинæ (гимнази «Альбион»).
Лауреаттæ хорзæхджын æрцыдысты дипломтæ æмæ Сывæллæтты æхсæнадæмон центр «Артек»-мæ балцтæй.
Æхсæнадæмон онлайн-финал уыдзæн майы. Хайад райсыны тыххæй алы бæстæйæ уæлахиздзаутæ цæттæ кæнынц видеоролик конкурсон куыстимæ.
Июны мæйы литературæ зонджытæм æнхъæлмæ кæсы суперфинал Мæскуыйы Сырх фæзуаты.
