Ныртæккæ цынæ ис балхæнæн нæ магазинты. Рæсугъд къоппыты тыхтæй, сæ рекламæ та иууыл диссаг, стæй ма сыл ГОСТ-ы нысан дæр ис, ома, бæззынц хæрынæн. Æцæгæй та?! Зæгъæм, карчы фыдæй басы кубиктæ. Уыдон, дам, æхсыст доны ныппарут æмæ диссаджы хъæрмхуыпп рауайдзæн. Рекламæ-иу сæ кодтой æппынæдзух телеэкраныл дæр. Адæм дæр сæ æлхæдтой, кæд хорз æмбæрстой, уыцы чысыл кубикы ницæй карчы фыд ис, уæддæр. Цыма сæ пайда, æцæг рекламæ куыд амоны, афтæ у æви нæ?
Æцæгæйдæр, бас саразынæн хæрзчысыл рæстæг хъæуы, уыдонæй. Æрмæстдæр сæ фыцгæ доны ныппар æмæ дæ хæринаг – цæттæ. Кубикты фæрцы хæринаг кæндзæнис дзидза, зокъотæ, халсæрттæ æмæ æндæр исты хæрзад тæф.
Эксперттæ лæмбынæг сахуыр кодтой, кубиктæ цæмæй арæзт сты, уыцы компоненттæ æмæ æрцыдысты ахæм хатдзæгмæ. Кубикæн йæ фылдæр хай конд у хуымæтæджы цæхх, кæнæ, зæгъæн ис, афтæ æмæ кубикæй конд басы иу тæбæгъы ис 2,5 граммы цæхх – уый та у, дохтыртæ адæймагæн суткæйы дæргъы цас цæхх амонынц, уымæй 2-3 хатты фылдæр. Иудзырдæй, ахæм хæринаг цас къаддæр хæрай, уый бæрц де ‘нæниздзинадæн – хуыздæр, уæлдайдæр та – æрыгæттæн æмæ хистæр кары арæймæгтæн. Цы хойраджы ад кæнынц, уыдон дзы æппындæр не сты, фæлæ дзы ис, ад тынгдæр чи кæны, ахæм уæлæмхасæнтæ, кæцыты хонынц глютоматтæ. Ахæм рæсугъд къоппытæ куы æлхæнат æмæ сыл Е621 фыст куы уа, уæд æй фидарæй зонут – уымæй уын рауайдзæн хæринаг нæ, фæлæ тæвд цæхджын дон глютоматтимæ. Ахæм хæринаг хъæуы æви нæ уæ организмы – уæ бар уæхи.
Бæрæг куыд у, афтæмæй басы кубиктæ æрхъуыды кодта 1882 азы швейцариаг амалиуæггæнæг Юлиус Магги. Уый се скондыл бакуыста æмæ сæ уадзын райдыдта горæты мæгуыр цæрджытæн, дзидза балхæнын кæй бон нæ уыди, уыдонæн.
Comments are closed, but trackbacks and pingbacks are open.