Нывгæнджыты лæвар бæрæгбонæн

Республикæйы бæрæгбон кад æмæ цытимæ банысан кæныны сæраппонд нæ бæстæйы цалдæр боны дæргъы уагъд цыдысты алыгъуызон хиирхæфсæн культурон мадзæлттæ. 20-æм сентябры бæрæгбонмæ сæхи бацæттæ кодтой Республикæ Хуссар Ирыстоны Нывгæнджыты цæ-дис дæр. Бæрæг аххоссæгтæм гæсгæ равдыстыты залæн официалон æгъдауæй бакæнын нæ бантыст, фæлæ сын нæ хицауад куыд баныфсæвæрдта, уымæ гæсгæ залæн фæстæдæр уыдзæнис йæ баконды цытджын церемони. Ныр та уал æй уыдон сæхи тыхтæй цыбыр æмгъуыдмæ сцалцæг кодтой æмæ йæ бацæттæ кодтой бæрæгбонон равдыстмæ. Равдыст уыцы бон байгом æмæ аххæссыд цалдæр боны.

Уыцы бон бæрæгбонвæлыст горæты адæм æмызмæлд кодтой. Бæрæгбонон мадзæлтты хайад чи истой, уыдонæй бирæтæ цыдысты равдыстыты залмæ æмæ аргъ кодтой экспозицийæн. Адæмы рæгъмæ хаст æрцыдис 35 куыстæй фылдæры бæрц хуызфыссынад æмæ графикæйы жанры. Райдзаст залмæ бахизгæйæ, адæймаджы цæстæнгас сæхимæ здæхтой алыгъуызон темæтыл аив конд нывтæ. Нывгæнджыты куыстытæн аргъæнджытæ-иу æнæрлæугæ нæ фесты алкæцы нывы раз дæр. Уымæн æмæ алыгъуызон ирд ахорæнтæй конд куыстытæ агайдтой зæрдæ æмæ æхцондзинад хастой адæймагæн. Экспозици цы хъæздыг æмæ мидисджын нывтæй конд у, уыдон сты нæ республикæйы цардыл дзурæг алыгъуызон куыстытæ, æвдыст сæ цæуы нæ хъæуты цард æмæ традицитæ, хæхбæсты сыгъзæрин фæззæджы пейзажтæ æмæ æндæр ахæмтæ. Зæгъæм, уыдон æхсæн ис ахæм куыстытæ, куыд: «Родной край» (нывгæнæг Цхуырбаты Т.), «На рассвете» (нывгæнæг Сабанты А.), «Осень в горах» (нывгæнæг Чилæхсаты Галинæ), «Дугъ» (нывгæнæг Сабанты А.), «Весна в осетии» (нывгæнæг Цхуырбаты С.) æмæ æндæр ахæмтæ. Иудзырдæй, нывтæ уыдысты зæрдæйы равгыл чи бандава, ахæм цымыдисон æмæ зæрдæйæн æхцонхæссæг куыстытæ. Ацы равдысты ма аивадæн табугæнджæтæн гæнæн уыд, сæ зæрдæмæ цы ныв фæцыдаид, уый балхæнын.

Экспозицийы куыстыты автортæ сты: Æлборты Æхсæртæг, Цхуырбаты Тамерлан, Бигъуылаты Рудольф, Цхуырбаты Сергей, Цхуырбаты Тахминæ, Битеты Алан, Гæбæраты Барис, Сабанты Анжелæ, Дзæгъиаты Альбинæ, Санахъоты Валери, Плиты Инал, Санахъоты Мадинæ æмæ æндæртæ.

Фæстаг цалдæр азы дæргъы равдыстыты залы ацы бæрæгбонон равдыст у фыццаг, æмæ йæ директор Бекъойты Алан куыд загъта, уымæ гæсгæ дарддæр — арæхдæр организаци кæндзысты равдыстытæ.

ЦХУЫРБАТЫ Ларисæ