«Нæртон къуым»

Театралон фæзуаты æфсæддон парад куыддæр фæцис афтæ адæм иугай æмæ къордгæйттæй цæуын райдыдтой ногдзауты паркмæ. Уыцы ран уагъд цыди бæрæгбонон мадзал «Нæртон къуым», зæгъгæ. Хайад дзы райстой республикæйы районтæ, горæты хойраджы продукци уадзæг куыстуæттæ æмæ адæмы рæгъмæ рахастой сæ продукцийы хуызтæ. Ауагъд æрцыдис бæгæныфыцджыты конкурс. Алкæй дæр фæндыдис, цæмæй йæ бæгæны фыццаг бынат бацахса æмæ иууылдæр тырныдтой рамбулынмæ. Чи рамбылдта, уый фæстæдæр фæбæрæг уыдзæнис. Сæ продукци дзы равдыстой Цхинвалы дзулфыцæн комбинат, нæ республикæйы продуктдæттæг куыстуæттæ æмæ хицæн амали-уæггæнджытæ дæр.

Дзауы район кæм æрбынат кодта, уырдæм бацæуджытæн дзауæгтæ, цины æнкъарæнтимæ, дзыкка змæнтгæйæ амыдтой, йæ аразыны сусæгдзинæдтæ, йæ фæзынд æмæ ирон къæбицы куыд кадджын у. Чысыл фалдæр та Ленингоры районы минæвæрттæ сæ музыкæ, кафт æмæ зардæй æрбахуыдтой бирæ адæм.

Фæстæ нæ фæлæууыдысты Цхинвалы районы минæвæрттæ дæр. Дзаджджын фынг, алыгъуызон дыргътæ æмæ халсæрттæ афтæ рæсугъд равæрдтой, æмæ-иу сæ цурмæ чи бацыди, уыдон сæм кæсынæй дæр нал æфсæстысты.

Знауыры район та буц æмæ сæрыстыр уыдысты рагон ирон хæринæгты равдыс-тæй.

Бæрæгбоны хайадисджытæй алчи дæр бацымыдис кодта, æмæ йæ бафæндыд, цæмæй бацæуа æмæ фена Цхинвалы дзулфыцæн комбинат цы уæливых скодта, уый. Уымæн йæ диаметр уыдис 1 метр æмæ 18 сантиметры. Чи йæ скодта, уыдон ныхæстæм гæсгæ уый у Уæрæсейы рекорд. Амæйразмæйы уæливыхæн йæ диаметр уыд 109 сантиметры.

 

***

Æрыгон техникты станц æмæ сывæллæтты сфæлдыстадон галуаны минæвæрттæ та цины æнкарæнтимæ æвдыстой сæ ахуыргæнинæгты саразæггæгтæ. Алы куыст дæр дзы афтæ цымыдисон уыд, æмæ бирæ чидæртæ дзырдтой, зæгъгæ, кæстæр кълæсты ахуыргæнинæгтæ ахæм цыдæртæ аразой, уый диссаг у, уæдæ цы.

Бæрæгбон кодта тынгæй тынгдæр, цымыдисондæр æмæ хъæлдзæгдæр. Алырдыгæй хъуыстысты ирон, уырыссаг, абхазаг, цæгаткавказаг адæмты музы-кæйы мелодитæ, зарджытæ.  Кафыдысты æвзæнгтæ, ацæргæтæ, сылгоймæгтæ, нæлгоймæгтæ –  адæм æмхуызонæй.

Ногдзауты паркмæ æрбацыдысты Хуссар Ирыстоны Президент Бибылты Анатоли, Хицауады Сæрдар Пухаты Эрик æмæ æндæр бæрнон кусджытæ. Семæ уыдысты бæрæгбонмæ æрцæуæг уазджытæ.

Нæ Республикæйы культурæйы министрад ма Ногдзауты парчы ауагъта алыхуызон хиирхæфсæн ерыстæ сывæллæттæн. Фæлахизуæвджытæн радтой зæрдылдарæн лæвæрттæ.

 

АРМУКЪА

Фæстæдæр та Хетæгкаты Къостайы цырты раз байгом ис армукъа. Ам сæ диссаджы куыстытæ равдыстой нæ Республикæйы курдиатджын дæснытæ. Уыдис дзы скульптурæтæ, мозайкæ, хъæдырмæгæй арæзт дзаумæттæ, бигæ дзаумæттæ, бисерæй арæзт дидинджытæ æмæ афтæ дарддæр. Тынг аив æмæ рæсугъд уыдысты иууылдæр равдысты куыстытæ. Адæм сæм æмбырд кодтой, цымыдисæй сæм кастысты.

Арæх вæййы афтæ æмæ адæймаг йæ цæстæй цы рæсугъд æмæ хъæлдзæг царды нывтæ фены, уыдон дзургæйæ кæнæ, фысгæйæ радæттын æнцон нæ вæййы.  Раст ахæм æнкъарæнтимæ мах дæр дæр хайад райстам ацы бæрæгбоны. Æппæт дæр уыд бæрæгбонхуыз. Адæм кæрæдзийыл æмбæлдысты æмæ бæрæгбоны цытæн арфæтæ кодтой.

 

***

Бæрæгбон дарддæр кодта изæрæй дæр. театралон фæзуаты Хуссар æмæ Цæгат Ирыстоны аивæдты дæснытæ сæ арæхстдзинад æвдыстой нæ горæты цæрджытæ æмæ йæ уазджытæн. Кæронбæттæны та сын фадат уыдис фейерверкмæ бакæсын.

Гæззаты Иван

Джиоты Александр

 

 

Спортсментæ æвдыстой сæ арæхстдзинад

Республикæйы боны цытæн æфсæддон парады хæдфæстæ спортивон æнтыстыты рæстæджы – «Посвящаем их родной земле»-йы фæлгæтты Театралон фæзуатмæ æрæмбырдуæвæг адæмы хъусдард сæхимæ аздæхтой æвзонг спортсментæ. Фæзуаты æвæрд æрцыдысты боксы ринг æмæ татами, цыран дунеон æмæ æппæтуæрæсейон турнирты æмæ чемпионатты уæлахиздзаутæ æмæ призертæ сæ арæхстдзинадæй спорты рæсугъддзинад æвдыстой боксæй, дзюдойæ, самбойæ, æххæстконтакт æмбуар хæстæй æмæ каратэ киокусин канæй. Уыдоны ‘хсæн уыд Уæрæсейы чемпионаты æвзист призер Æлборты Сослан. Æрæмбырдуæвджытæн ма сæ арæхстдзинад æвдыстой Уæрæсейы айкидо айкикайы федерацийы минæвæрттæ дæр. Уæлдай цымыдисдзинад сæвзæрын кодтой эстетикон гимнастикæйæ архайæг чысыл чызджытæ. Спортсменты архайдмæ бакастысты РХИ-йы Президент Бибылты Анатоли,  Республикæйы боны сæраппонд бæрæгбонмæ æрцæуæг уазджытæ æмæ нæ горæты цæрджытæ. Йæ организатор уыд РХИ-йы Фæсивæдон политикæ, спорт æмæ туризмы комитет Зассеты Сергейы сæргълæудæй.

Джиоты Екатерина