Нæ республикæйы ногдзауты организаци фыццаг кæм сæндидзыдта, уый у нæ горæты 5-æм астæуккаг скъола.
Ногдзауты организаци советон дуджы хъомылады ахсджиаг фæрæз кæй уыди, уый хорз æмбарынц ацы скъолайы педколлектив æмæ уымæн бацархайдтой йæ сæндидзын кæныныл дæр. «Ахæм организацийы уæвгæйæ сабитæ сæхимæ фылдæр бæрндзинад фенкъарынц, куыд кæрæдзийы раз, афтæ иумæйаг хъуыддаджы дæр. Абон не скъолайы ис 170 ногдзауы бæрц æмæ нæ бон ссис раздæр, советон дуджы, нæм цы бирæ рæсугъд æгъдæуттæ уыд, уыдонæй бирæты бахъахъхъæнын», – зæгъы скъолайы ахуыры хайы сæргълæууæг Тедеты Ноннæ.
Ноннæ куыд зæгъы, афтæмæй ахуыры азы алы цыппæрæмхайы фæуды дæр скъолайы ауагъд æрцæуы цытджын линейкæ, кæцыйы къордты æрыгон командиртæ радзурынц, сæ æмкъласонты ахуырфæразондзинады тыххæй, афтæ ма сын æхсæнадон царды цы æнтыстытæ ис, уыдоны тыххæй дæр. Æмæ та ныр дæр ногдзаутæ традицимæ гæсгæ æрæмбырд сты сæ линейкæмæ, цæмæй фæстиуджытæ саразой ахуыры азы дыккаг цыппæрæмхайæн.
«Растдæр ацы организацийы руаджы æх-хæст цæуынц хъомылады æппæт формæтæ дæр. Уыдон сты æфсæддон-патриотон æмæ удварнон-хæрзæгъдауон, спортивон æмæ фæллойадон хъомылад», – зæгъы Тедеты Ноннæ. – Уымæ гæсгæ ацы организаци æн-тысгæйæ кусы не скъолайы æмæ мын уым та æххуыс кæнынц компартийы уæнгтæ Гæбæраты Екатеринæ, Кобылты Лондæ, ногдзауты æмæ фæскомцæдисы ветерантæ Бестауты Азæ, Уалыты Розæ, Абайты Фати-мæ æмæ сын уый тыххæй æз зæгъын стыр бузныг», – зæгъы уый.
Тедеты чызг ма куыд банысан кодта, афтæмæй ногдзауты организацийы сывæллон йæхи хаты ныфсджындæрæй, бæрнондæрæй æмæ активондæрæй. Уымæ гæсгæ æхсызгонæй феххæст кæны, цы хæслæвæрдтæ йын лæвæрд цæуы, уыдон.
«2008 азы августы хæдфæстæ, алчи дæр горæты арæзтадон-цалцæггæнæн куыстытæ куы кодта, уæд æз аскъуыддзаг кодтон, цæмæй сæндидза ногдзауты организаци. Сывæллæттæ уыцы августы фæстæ фыццæгæм сентябры, скъоламæ æрбацæугæйæ, æхсызгонæй рахæцыдысты мæ инициативæйы фарс», – загъта уый.
Скъолайы ахуыры хайы сæргълæууæг ма куыд загъта, афтæмæй ногдзауты хайадистæй æрвылаз дæр сæ ахуырæн фæстиуджытæ арæзт æрцæуы 19 майы – Ногдзауты организацийы сырæзты боны цы цытджын линейкæ ауадзынц, уым.
Цытджын линейкæйы фæстæ ногдзаутæ ауагътой акци «Баххуыс кæнæм, зымæгиуат чи фæкæны, уыцы цъиутæн», – зæгъгæ.
Акцийы хайадисджытæ уыдысты клуб «Æнæниз фæлтæр» æмæ организаци «Ногдзау»-ы ахуыргæнинæгтæ. Клуб «Æнæниз фæлтæр»-ы къухдариуæггæнæг Гæбæраты Екатеринæ куыд зæгъы, афтæмæй, уыцы мадзæлттæ уагъд цæуынц рæзгæ фæлтæры удварнон-хæрзæгъдауон хъомылады фæдыл паддзахадон программæйы фæлгæтты.
«Ацы программæйы фæлгæтты ауагътам ацы акци дæр. Фæллойадон урокыл ахуырдзаутæ зымæгиуатгæнæг сауцъиутæн цы хæдзæрттæ æрцæттæ кодтой, уыдон бафидар кодтой бæлæстыл. Ацы акци уагъд цæудзæнис 20-æм апрелмæ. Уыцы рæстæгмæ сын сывæллæттæ сæ хæдзæртты æвæрдзысты хæринаг. Бирæ алыгъуызон мæргътæ ис æрдзы, фæлæ дзы адæймаг йæхимæ, зымæгиуат цы цъиутæ фæкæнынц, уыдонæй æввахсдæр æвæццæгæн, никæйы кæны. Уымæн сын саразæм чысыл хæдзæрттæ дæр, цæмæй нæм хæстæг цæрой. Уæдæ сæ цæмæн бирæ бауарзта адæймаг? Уымæн æмæ адæм раджы фæхатыдысты, уыцы цъиутæ кæм сты, уым зианхæссæг уырынгонтæн бынат кæй нæй, скуынæг сæ кæнынц», – загъта Гæбæраты Екатеринæ.
Клубы къухдариуæггæнæг куыд банысан кодта, афтæмæй акцийы нысаниуæг у адæймаджы гуманистон идеятыл хъомыл кæнын æмæ æрдз хъахъхъæныны хъуыддаджы активон позици ахсын. Ахуыргæнинæгты хъусдард здæхт цæуы, Цхинвал æмæ йæ алыварс цы тæхæг мæргътæ зымæгиуат кæнынц, уыдонмæ, хæринаг сын хæрын кæнынц, иумæйагæй сисгæйæ, сфæлдыстады руаджы æрдзмæ сывæллæтты цымыдис бæрзонддæр кæны.
Ахæм хъомыладон фарстытæм йæ хъус лæмбынæг дары скъолайы директор Туаты Мадинæ æмæ ахуырдзаутæм дары йе ‘ххуысы къух.
БЕСТАУТЫ Валя
Comments are closed, but trackbacks and pingbacks are open.