Фæстаг азты нæ горæт хорзæрдæм кæй фæивта, уый алчидæр уыны æмæ дзы æхцондзинад исы. Сæ аивдзинадæй рафидыдтой куыд бæстыхæйттæ, афтæ сæйраг уынгтæ дæр. Фæлæ нæ иуæй иуты айрох вæййы, цахæм уавæры уыдысты, цалынмæ сæ нæ сарæзтой, уæдмæ. Рымысæм ма цахæм цъыфты, цæдты, ры-джы цыдыстæм нæ куыстытæм, нæ хæдзæрттæм. Уый та адæймагæн æвзæрæрдæм æрмæст йæ зæрдæйыуагыл не ‘ндæвта, фæлæ йе ‘нæниздзинадыл дæр. Ахæм уавæры уыдысты Хъайтарты æмæ Октябры уынгтæ дæр, уæлдайдæр та Октябры уынг.
Уый иууыл рæсугъддæр рауад. Кæрæй кæронмæ дзы ис тезгъогæнæн фæндаг, йæ дыууæ фарс – бæлæстæ æмæ йæм аууон дарынц. Ис дзы, кæм æрбадай, бирæ ахæм бандæттæ. Дыууæ фарсæрдыгæй дæр – рухсытæ. Ацы уынг ссис нæ горæттæгты уарзондæр бынæттæй сæ иу. Ам кæдфæнды дæр адæмы фендзынæ тезгъогæнгæ, уæлдайдæр та изæрыгæтты.
Ацы уынг йæ рæсугъддзинадæй ахæм химæлвас кæй ссис, уый махæй алкæуыл дæр уæлдай бæрндзинад æвæры, цæмæй йæ аивдзинад ма цуда, уа кæддæриддæр сыгъдæг. Мах хъуамæ нæ зæрдыл дарæм махæн æй кæй схæрзарæзт кодтой æмæ нæ хæс кæй у, цæмæй йыл аудæм. Фæлæ нæ, уæддæр не ‘хсæн разынынц ахæмтæ, кæцытæ зонгæ-зонын, кæнæ та сæ æнæмбаргæйæ фыдаудæн кæнынц уынджы рæсугъддзинадæн. Æмæ дзы нæ цæст схæцы брæттææппарæн цъæлтæ, тæстытæ асыччытыл, цъæлтæ фонартыл. Кæй къух æртасы ахæм фыдаудæнтæ кæнынмæ? Макæ зæгъæг сын цæуылнæ исчи фæвæййы? Ам æз æрмæст Октябры уынджы кой нæ кæнын, фæлæ иннæ уынгты кой дæр.
Кæй зæгъын æй хъæуы, ахæм фыдгæнджытæ бирæ не сты, фаг у иу ахæм адæймаг дæр, фæлæ сæ хъæуы æргом кæнын æмæ æмбæлон уагыл æфхæрын.
Лалыты Ленæ
Comments are closed, but trackbacks and pingbacks are open.