1924 азы 1 октябры Хуссар Ирыстоны автономон областы Наркомпросы æмæ Политрухсады уынаффæмæ гæсгæ сырæзт чингуыты паддзахадон рауагъдад «Ирыстон».
1932 азы 1 октябры Цхинвалы горæты байгом педагогон институт – ныры паддзахадон университет.
1991 азы 1 октябры Цхинвалы горæты байгом Колыты Аксойы номыл аивæдты паддзахадон лицей.
2008 азы 4 октябры Хуссар Ирыстоны арæзт æрцыд Æмбæстагон хъахъхъæнынад, уæлвæткон уавæртæ æмæ æрдзон æнамонддзинæдты фæстиуджытæ аиуварс кæныны министрад.
1943 азы 5 октябры Ленингоры районы Гдулеты хъæуы райгуырдис педагогон зонæдты кандидат, Хуссар Ирыстоны зонæдты сгуыхт архайæг Джиоты Георги Алексийы фырт.
1930 азы 6 октябры Цхинвалы районы Уæллаг Черейы хъæуы райгуырдис историон зонæдты доктор, профессор, ирон адæмы фыццаг ахуыргонд-археолог, Хуссар Ирыстоны зонæдты сгуыхт архайæг Тъехты Баграт Виссарионы фырт.
1934 азы 10 октябры Цхинвалы горæты райгуырдис историон зонæдты кандидат, профессор Гаглойты Юри Сергейы фырт.
1991 азы 10 октябры газет «Советон Ирыстон»-ы ном раивд æрцыд «Хуссар Ирыстон»-æй.
1955 азы 11 октябры Дзауы районы Бузалайы хъæуы райгуырдис историон зонæдты кандидат Джиоты Кузьмайы фырт Мурат.
2009 азы 13 октябры Дзауы астæуккаг скъолайы кæрты цытджын æгъдауæй гом æрцыд Хетæгкаты Къостайы цырт.
1859 азы 15 октябры Цæгат Ирыстоны Нары хъæуы райгуырдис гениалон ирон поэт, публицист, æхсæнадон архайæг, ирон литературон æвзаджы бындурæ-вæрæг, прозаик, драматург, нывгæнæг, этнограф Хетæгкаты Леуаны фырт Къоста.
1913 азы 15 октябры Дзауы районы Ручъы хъæуы райгуырдис номдзыд ирон поэт æмæ драматург, Цæгат Ирыстоны адæмон поэт Плиты Грис Дзамболаты фырт.
1938 азы 15 октябры Ленингоры районы Уæллаг Захъоры хъæуы райгуырдис зынгæ ирон поэт, тæлмацгæнæг, публицист, Хетæгкаты Къостайы номыл паддзахадон премийы лауреат, националон преми «Нарты фæткъуы»-йы лауреат Хъодалаты Герсан Зурабы фырт.
1940 азы 15 октябры Ленингоры районы райгуырдис Ирыстоны æмæ Уæрæсейы Федерацийы сгуыхт нывгæнæг Хъамбердиаты Мысосты номыл республикон премийы лауреат, ЦИПУ-йы профессор, Уæрæсейы нывгæнджыты академийы æцæг уæнг (академик), ацы академийы сыгъзæрин майданы хицау Бедойты Шалва Евгены фырт.
1961 азы 15 октябры Хъӕрӕсе-Черкессийы республикæйы ирон хъæу Лабæйы байгом Хетæгкаты Къостайы цырт. Сарæзта йæ хъæубæсты хардзæй скульптор Дзантиаты Инал.
1926 азы 18 октябры Боржомы районы Сырх хъæуы райгуырдис ирон адæмы зынгзæрдæ патриот, зынгæ ахуыргонд, педагогон зонæдты кандидат, профессор Плиты Арон Никъалайы фырт.
1978 азы 22 октябры Дзауы районы Уанелы хъæуы æвæрд ӕрцыд Хетæгкаты Къостайы цырт. (скульптор Кокойты У.).
2003 азы 26 октябры Дзæуджыхъæуы, Аграрон университеты культурæйы галуаны йæ куыст райдыдта ирон адæмы радон 5-æм съезд. Съезды куысты хайад цы 300-ы бæрц делегаты райстой, уыдон æхсæн уыдысты Уæрæсейы алы регионты æмæ фæсарæйнаг бæстæты ирон диаспорæты минæвæрттæ дæр.
1999 азы 28 октябры Хæххон паддзахадон аграрон университеты культурæйы галуаны ауагъдæуыд ирон адæмы цыппæрæм съезд. Съезды куысты архайд-той делегаттæ Цæгат æмæ Хуссарæй, не ‘фсымæртæ Уæрæсейы алы къуымтæй æмæ фæсарæйнаг бæстæтæй.
Æрæмбырд сæ кодта Къуезерты Петр
Comments are closed, but trackbacks and pingbacks are open.