4 декабрӕй 11 декабрмӕ Хуссар Ирыстоны территорийыл фыдракæнд не ‘рцыд. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд ӕртӕ аварийы. Хъыгагӕн, иу аварийы фӕмардысты дыууӕйӕ.
Алыгъуызон бархалыны фӕдыл горӕты милицийы управленийы кусджытӕ бӕрндзинадмӕ ӕркодтой ӕртӕ адӕймаджы, сӕ иу разынд ӕнӕххӕст кары сывӕллон.
Фæндагон змæлды æдасдзинады инспекци къуырийы дæргъы сбæлвырд кодта 384 фæткхалæн цауы. Уыдонæй 12 шофыры разындысты нозтджынтӕ, кӕнӕ та уыдысты наркотикты ӕндӕвдады бын.
Хуссар Ирыстоны барадхъахъхъӕнӕг органтӕ оперативон информацийы фӕдыл баурӕдтой автомашинӕ «Лада Гранта» ӕмӕ йӕ арвыстой экспертизӕмӕ иумӕйаг информацион-координацион центрмӕ. Эксперттӕ куыд сбӕрӕг кодтой, афтӕмӕй ацы автомашинӕ давд ӕрцыд горӕт Стъараполӕй 2021 азы. Сбӕлвырд ын кодтой йӕ хицауы дӕр ӕмӕ йӕм фӕдзырдтой Хуссар Ирыстонмӕ. Автомашинӕ уыд аварион уавӕры ӕмӕ йӕ бахъуыд эвакуаторыл ласын Стъараполмӕ. Автомашинӕ адавыны тыххӕй баконд ӕрцыд уголовон хъуыддаг. Мидхъуыддӕгты министрад сиды ӕмбӕстӕгтӕм, цӕмӕй автомашинӕ ӕлхӕныны рӕстӕджы лӕмбынӕг кӕсой гӕххӕттытӕм ӕмӕ кӕд юридикон ӕгъдауӕй сыгъдӕг нӕу, уӕд ахӕмтӕй сӕхи хизой.
Милицийы экономикон фыдракæндтæ ма æруадзыны фæдыл управленийы кусджытæ тӕрхондоны уынаффӕмӕ гӕсгӕ скуынӕг кодтой 230 банкӕйы энергетикон нозтытӕ, кӕцытӕ рейдон мадзӕлтты рӕстӕджы конфискаци ӕрцыдысты дуканитӕй. Уымӕй уӕлдай ма, рейдон мадзӕлттӕ ауадзыны рӕстӕджы дыууӕ дуканийы баййӕфтой энергетикон нозтытӕ уӕййаг 73 банкӕйы бӕрц ӕмӕ сӕ сконфискаци кодтой. Дуканиты хицӕуттыл бакодтой административон суагъӕтӕ ӕмӕ сӕ арвыстой тӕрхондонмӕ.
4 декабры рынчындонмӕ бахаудта нӕ горӕты 22-аздзыд цӕрӕг, кӕцы хӕдзары уӕвгӕйӕ фӕулӕфыд сыгъдхъӕстӕ.
10 декабры Цхинвал-Дзауы фӕндагыл 7-ӕм километры ӕрцыд фӕндагон-транспортон цау. 28-аздзыд горӕттаг цӕрӕг нӕ сарӕхст йӕ автомашинӕ «ВАЗ-2109» скъӕрын, сӕмбӕлд бетонӕй конд къулыл ӕмӕ фӕсвӕд афӕлдӕхт. Аварийы фӕстиуӕгӕн фӕмардысты бӕлцӕттӕ – шофыры фыд ӕмӕ мад 60-аздзыд горӕттаг цӕрджытӕ. Шофыр уӕззау цӕфтимӕ бахауд рынчындонмӕ.
Наркотикты ӕрзылды контроль кӕныны кусджытӕ Цхинвалы районы милицийы кусджытимӕ иумӕ рейдон мадзӕлттӕ уадзыны рӕстӕджы Цхинвал-Дзауы фӕндагы 4-ӕм километры баурӕдтой зӕрдӕхсайгӕ автомашинӕ «ВАЗ-2114», кӕцыйы шофыр разынд нӕ горӕты 53-аздзыд цӕрӕг. Басгӕрсты рӕстӕджы шофыры курткӕйы дзыппы ссардтой гӕххӕтты тыхтон цъӕхбын ссадӕгимӕ. Эксперттӕ куыд сбӕлвырд кодтой, афтӕмӕй цъӕхбын ссадӕг разынд марихуана. Медицинон басгӕрсты рӕстӕджы ма рабӕрӕг, фӕткхалӕг кӕй спайда кодта марихуанайӕ.
Горӕт Цхинвалы милицийы управленийы фӕдагуырды кусджытӕ баурӕдтой 24-аздзыд бынӕттон цӕрӕджы, кӕцымӕ сӕ зӕрдӕ фехсайдта наркотиктӕй спайда кӕнынмӕ. Фӕткхалӕг нӕ бакуымдта медицинон басгӕрстмӕ ӕмӕ йӕ тӕрхондон фӕивар кодта.
