(Нæ республикæйы æхсæнад цытджын æгъдауæй банысан кодта Уæрæсейы бон)
Уæрæсейы бон цытджын æгъдауæй æмæ уæрæхæй банысан кодтой Цхинвалы. Хетæгкаты Къостайы уынджы байгом сты «Цхинвайлаг Арбат» æмæ «Уырыссаг хæдзар». Мастер-къластæ, хъазæнты, хъæдæрмæгæй арæзт дзаумæттæ æмæ бисерты армукъа, афтæ ма декоративон-прикладон сфæлдыстады хуссарирыстойнаг дæсныты æндæр дзаумæттæ дисы баппæрстой уазджыты. Уæрæсейы боны ма уагъд æрцыд уырыссаг адæмон къæбицы демонстраци: традицион фынгыл æвæрд уыдысты алыгъуызон хæринæгтæ: гуылтæ, лауызтæ, тæвд цай, уырыссаг къуымæл (квас) æмæ бирæ æндæртæ. Армукъайы уазджытыл æмбæлдысты уырыссаг зарджытæ æмæ адæмон кæфтытимæ. Ардæм æрбацыд бæстæйы Президент Бибылты Анатоли дæр. Паддзахады сæргълæууæг базонгæ æппæт куыстытимæ дæр, кæцытæ æвдыст æрцыдысты адæмон сфæлдыстады армукъайы æмæ стыр аргъ скодта дæсныты куыстытæн.
Хуссар Ирыстоны «Цхинвайлаг Арбат» фыццаг хатт уагъд не ‘рцыд. Хетæгкаты Къостайы уынгмæ фæзилæны рафидауын кодта хуссарирыстойнаг курдиатджын дæсны Коцты Дженнийы арæзт вывескæ «Цхинвальский Арбат», зæгъгæ.
Бæрæгбоны уазджытæн мастер-кълас ауагъта Хъотайты Альдæ, кæцы цæстуынгæйæ фенын кодта, куыд диссаг у æндæхтæй уникалон быды хæрзаив ажур, кæцыйæн йæ бон уыд фынгæмбæрзæн кæнæ та къухсæрфæн фестын. Дзауы æмæ Знауыры районтæ æрбавдыстой бисербыды техникæйæ сæххæстгонд дзаумæттæ, æмæ Джиоты Наташæ та равдыста, къухтæм цы æрбахауы, уыцы æрмæджытæй хъазæнтæ æмæ куклæтæ куыд саразæн ис гæнæн, уый.
Фæндырыл цæгъдгæйæ армукъамæ æрбацæуджыты зæрдæтæ рухс кодтой 4-æм æфсæддон базæйæ фыд æмæ фырт Дмитри æмæ Андрей Ананиевтæ.
Мадзæлтты организатортæ цы нысан равдисынмæ хъавыдысты, уыдоны тыххæй ИА «Рес»-æн радзырдта РХИ-йы Культурæйы министр Зассеты Жаннæ.
«Тынг нæ фæндыд дунейæн æмæ уазджытæн равдисын, махмæ тынг бирæ курдиатджын адæймæгтæ кæй ис æмæ сын сæ куыстытæн равдисæн кæй ис адæмон хæдзарады æнтыстыты равдысты дæр. Абон ам мах сарæзтам нæхи «Уырыссаг хæдзар» æмæ уыцы хæдзары алчидæр гæнæн ис схона йæхи хæдзар, уымæн æмæ алчидæр тырныдта уымæ исты бахæссынмæ», – загъта Зассеты Жаннæ.
Йæ ныхæстæм гæсгæ, абон Арбаты диссаджы «Оазисы къуым» æрбавдыстой Æвзонг натуралистты республикон станцы кусджытæ, кæцытæ фенын кодтой нæ республикæйы цы зæйæгойтæ зайынц, уыдонæй се стæмдæр хуызты. Хуссар Ирыстоны флорæйы хуызæгты ‘хсæн ис ахæм зайæгойтæ дæр, кæцытæн ис хосгæнæн миниуджытæ.
Министр бузныджы ныхæстæ загъта армукъайы хайадисджытæн, æппæт уыдонæн, кæцытæ аквагримæй ныв кодтой кæй фæндыд, уыдоны, лауызтæ чи фыхта æмæ Цхинвалы Арбаты уазджыты удæгас музыкæйæ чи хъæлдзæг кодта, уыдонæн.
Мадзалы кæрон традицимæ гæсгæ арвмæ суагъдæуыд сæдæгай резинæ къоритæ ахæм фыстимæ – «Я люблю тебя Россия».
АВТОЗГЪОРД «Размæ, Уæрæсе!»
Хуссар Ирыстоны столицæ æмæ районты минæвæртты хайадистæй Уæрæсейы боны цытæн Цхинвалы уагъд æрцыд автозгъорд «Размæ, Уæрæсе!».
Автозгъорды размæ РХИ-йы Президенты Администрацийы мидæггагон политикæйы фæдыл управленийы хистæр Уанеты Мурат арфæ ракодта республикæйы цæрджытæн бæрæгбоны сæраппонд, уæрæсейаг æмæ ирон адæмы иудзинад банысан кæнгæйæ. «Абон Уæрæсе дунеон политикæйы ахсы раззагон позицитæ, у сабырдзинад æмæ æдасдзинады гарант. Номхуындæй, Уæрæсе фæзынд махмæ æххуысмæ нæ уæззау рæстæджыты æмæ нын банымадта нæ хæдбардзинад», – загъта Уанеты Мурат.
РХИ-йы Президенты Администрацийы минæвары ныхæстæм гæсгæ, Уæрæсейы бон у УФ-йы æппæт æмбæстæгты бæрæгбон, уыцы нымæцы Хуссар Ирыстоны цæрджытæн дæр, кæцыты фылдæр хайæн ис уæрæсейаг æмбæстагдзинад. «Мах стæм Уырыссаг дунейы хай æмæ сæрыстыр стæм, уымæй», – банысан кодта Уанеты Мурат. Уый ма йæ ныхасмæ бафтыдта, зæгъгæ, Уæрæсе æмæ Хуссар Ирыстоны ‘хсæн ис æнгом æмгуыстад бирæнымæц бадзырдты фæл-гæтты, æмæ уыцы æмгуыстадæн ис хорз фæстиуджытæ.
«Мах аразæм сабыр цард æмæ бузныджы, цины æнкъарæнтимæ нысан кæнæм ацы бæрæгбон», – банысан кодта уый.
Дзауы районы администрацийы культурæйы хайады хистæр Цхуырбаты Галинæйы ныхæстæм гæсгæ, Уæрæсе æмæ Ирыстоны æфсымæрон адæмтæн фæхицæнгæнæн нæй. «Абон мах æрцыдыстæм Дзауы районæй Хуссар Ирыстоны столицæйы цæр-джытимæ ацы стыр бæрæгбон – Уæрæсейы бон банысан кæныны тыххæй, кæцы нæ республикæйы алы цæрæгæн дæр у тынг зынаргъ бæрæгбон», – банысан кодта Цхуырбаты Галинæ.
Автозгъорды хайадисджытæ дидинджытæ сæвæрдтой Цхинвалы Æнусон арты цур фæмардуæвæг Фыдыбæстæ хъахъхъæн-джыты нæмттæ ссарыны охыл.
Comments are closed, but trackbacks and pingbacks are open.