Мæгуыртæ цы фæуой, уæд?

Бæрæг куыд у, уымæ гæсгæ хуссарирыстойнаг цæрджытæ се ‘нæразыдзинад равдыстой æмæ æвдисынц, æрæджы «Остелеком» цы ног бастдзинады лæггæдтæ бакодта, уыдоны тыххæй. «Мегафон»-мæ бацæугæйæ адæймаг æвдисæн свæййы компанийы кусджытæ æмæ адæмы ‘хсæн алыгъуызон быцæутæн. Ацы бонты уым баййæфтон иу сылгоймаджы, кæцы быцæу кодта компанийы кусджытимæ. Сылгоймаг сын дзуры, зæгъгæ, мын рауæй кæнут, йæ аргъ 150 сомы кæмæн у, ахæм карточкæ. Компанийы кусæг æвзонг сылгоймаг та йын сдзуапп кодта, зæгъгæ, нæ компани нал уадзы 150 сомы аргъ карточкæтæ æмæ, дам, балхæн 300 сомы аргъ, науæд та-иу æрбацу ардæм æмæ зæгъ-иу дын мах нæхæдæг дæ телефоны нывæрдзыстæм, цас дæ фæнды, уыйбæрц суммæ. Сылгоймаг сын загъта, зæгъ-гæ, мæнæн ме ‘нæниздзинадмæ гæсгæ мæ бон алыхатт ардæм цæуын нæу, фæлæ, дам, сымах цæмæн дæлдзиныг кæнут уæ абонентты? «Нæ республикæйы æндæр сотон оператор кæй нæй, уымæй пайда кæнгæйæ, сымах ницæмæ дарут адæмы интерестæ æмæ алцыдæр аразут уæхи пайдайæн. Ивгъуыд аз уæ компани абоненттæн 100 сомы аргъ карточкæтæ куынæуал уæй кодта, уæд адæм уæлдай тынгдæр се ‘нæразыдзинад куы равдыстаиккой, уæд абон афтæ нал бауæндыдаиккат. Уæ компанийы лæггæдтæй йæ бон у пайда кæнын, æрмæстдæр, хъæздыг адæмæн æмæ уæд мæ-гуыртæ та цы фæуой», – дзырдта уый.

Кæй зæгъын æй хъæуы, алкæцы адæймагæн, уæлдайдæр мæйæ-мæймæ йæ пенсийы кадавар капеччытæм чи æнхъæлмæ кæсы, уыдонæн сæ бон нæу æрвылхатт 300 сомы аргъ карточкæтæ æлхæнын.

Хуссар Ирыстоны иунæг сотон оператор «Остелеком» йæ куыст райдыдта 2004 азы.  2011 азы «Остелеком» рахызт хисæрмагонд «929» кодмæ, кæд æмæ республикæйы цæрджытæ разы нæ уыдысты ацы кодмæ рахизыныл, уæддæр. Уый æркодта тарифтæ фæзынаргъдæр кæнынмæ, афтæ ма Цæгат æмæ Хуссар Ирыстоны цæрджытæн кæрæдзимæ цæугæйæ, роумингон æргъты фæзындмæ. Ног кодмæ хизгæйæ,  йæ къухдариуæггæнджытæ ныфс æвæрдтой, зæгъгæ, бастдзинады лæггæдты æргътæ уыдзысты асламдæр æмæ, иумиагæй та, республикæйæн хуыздæр уыдзæн, йæхи оператор ын куы уа, уæд. Фæлæ хуыздæры бæсты алцыдæр фæивта æвзæрырдæм: бастдзинад æмæ интернет систы зынаргъдæр, лæггæдты гъæд та – æвзæрдæр.

Æрæджы ацы проблемæйыл уынаффæ кодтой РХИ-йы Парламенты депутаттæ Тадтаты Аланы сæргълæудæй. Спикер банысан кодта, зæгъгæ, адæм разы не сты операторы политикæ æмæ лæггæдты аргъæй æмæ зæрдыл æрлæууын кодта, йæ рæстæджы йын, æгæрыстæмæй, хицауад бæрæг дотацитæ кæй фыста, уый дæр.

Депутат Æлборты Алан та загъта, зæгъгæ, нæм афтæ кæсы, æмæ компани афтæ аразы барæй. «Оператор «Мегафон» хъуамæ бæрæг суммæтæ рагæй фыстаид республикæйы бюджетмæ, фæлæ сæ фидын райдыдта ныртæккæ. Æмæ уымæ гæсгæ компани схæцыд тарифтыл. Вæййы афтæ, æмæ бюджетмæ цы æмбæлы, уый домын куы райдайæм, уæд коммерцион организаци равдисы ахæм реакци», – загъта депутат.

  Банысан кæнын хъæуы уый дæр, æмæ ныртæккæ «Мегафон»-ы лæггæдтæй пайдагæнæн кæй ис, æрмæстдæр, пакеттæм гæсгæ, æмæ уый, кæй зæгъын æй хъæуы, бирæтæн æмбæлон нæу. Ома, зæгъæм, бастдзинад сывæллоны кæд хъæуы скъолайæ рацæугæйæ, æрмæстдæр, хæдзармæ йæ ныййарджытæм фæдзурыны тыххæй, уæддæр æй бахъæудзæн лæггæдты æнæхъæн пакетæн бафидын, кæцытæй абонент нæ пайда кæны. Ацы бонты иу ацæргæ сылгоймаг бацыд Мегафонмæ номыр райсыны тыххæй æмæ дзы уыдон æрдомдтой 500 сомы бафидын. Раздæр та номыр райсынæн хъуыд 150 сомы. Уый сын дзуры, зæгъгæ, мæн интернет нæ хъæуы, номыр мæ хъæуы æрмæстдæр мæ сывæллæттæм фæдзурыны тыххæй, фæлæ йын уыдон бамбарын кодтой,  ныртæккæ сæ лæггæдтæ  ахæм кæй сты. Уый, дам, у тарифон план æмæ дæ кæд хъæуы, уæд балхæн, науæд дын нæ бон ницы у…

Æрæджы ма фæзынд сотон операторы ноджы иу нуæрттæхалæн операци. Цæвиттон, дæ телефоны хыгъдмæ суткæйы дæргъы цал фæнды хатт ма ‘ркæсай, уал хатты дæм Мегафон æрвиты хъусынгæнинаг (сообщение) иу кæнæ иннæ опци баиу кæныны тыххæй. Ацы хъуыддаг сæм цас раст кæсы, уый базоныны тыххæй ныхас кодтон компанийы æхсæнадимæ бастдзинæдты фæдыл специалист Бежанты Зæринæимæ. Уый мын куыд бамбарын кодта, афтæмæй уыдонæн сæ бон ницы у фæивын, сæйраг офис, зæгъ, æй куынæ аскъуыддзаг кæна, уæд. Иумиагæй, дам, ацы операци ахæсдзæн иу мæйы бæрц.

Арæх вæййы афтæ дæр, æмæ иу уысммæ дæ телефоны хыгъдæй цасдæр суммæ æрбайсæфдзæн. Куы сæм бацæуай, уæд компанийы кусджытæ сæхи раст кæныныл схæ-цынц, зæгъгæ, техникæ «сбой» радта æмæ уын уе ‘хцаты фæстæмæ раздахдзыстæм. Фарстæуы, афтæ цæмæннæ искуы вæййы, æмæ иу хатт та абонентты пайдайæн радта “сбой”, уыцы техникæ.  Бирæйæ бирæгъдæр дæр не ‘фсæды, фæлæ сотон оператор хуссарирыстойнаг хæстæфхæрд цæрджыты хыгъдæй цæмæн хъавы йæхи схъæздыг кæнынмæ? Мегафон кæд коммерцион организаци у, уæддæр æй хъуамæ æмбарой, уыдон сæ куыстæй вазыгджын уавæр кæй æвзæрын кæнынц æхсæнады. Æмæ æхсæнадæн та ис компанийы мæгуырау куысты фæдыл йе ‘нæразыдзинад равдисыны бар… Банысан кæнын хъæуы уый дæр, æмæ æввахс рæстæджы нæ республикæйы ноджы иу сотон оператор куынæ фæзына æмæ коммерцион организацийæн конкуренци куынæ араза, уæд уыдонæн сæ куыст æмбæлон никуы уыдзæн. Адæмы уырны, æввахс рæстæджы нæ республикæйы къухдариуæгад æппæтдæр кæй сараздзæн, ацы проблемæ аскъуыддзаг кæныны тыххæй.

ДЖИОТЫ Екатеринæ