РХИ-йы Президент Бибылты Анатоли бабæрæг кодта Хуссар Ирыстоны адæмон нывгæнæг, Колыты Аксойы номыл аивæдты паддзахадон лицейы директор æмæ Советон Цæдисы Нывгæнджыты цæдисы уæнг Кæсойты Лавренты нывты сæрмагонд равдыст «Мæ сабидуджы горæт», – зæгъгæ, ахæм номимæ. Залы нывтыл азилгæйæ, паддзахады сæргълæууæг банысан кодта Кæсойты Лавренты алыварсон курдиат æмæ йæ рахуыдта нæ дуджы зынгæ æмæ гениалон нывгæнæг, йæ куыстыты та – цæвиттойнаг. «Кæсойты Лавренты æппæт куыстыты дæр схонæн ис диссаджы нывтæ. Йæ алы куысты дæр æвдисы хисæрмагонд æмæ авторон интонаци, эмоционалон æнкъарæнтæ æмæ нывгæнæджы протест. Адæймагыл хорз тæлмæнтæ уадзынц цардæн йæхицæй сисгæ фæлгæндзтæ, готикон архитектурæйы куыстытæ, Европæйы Астæуккаг æнусты чысыл уынгтæ. Фæлæ махæн æввахсдæр сты ахæм нывтæ, кæцытæ баст сты райгуырæн бæстæимæ, аив сты рагон Цхинвал æвдисæг куыстытæ дæр. Æдзæрæг хъæутæ, хæдзæрттæ – æппæт уыдон сты ивгъуыды истори», – йæ хъуыдытæ загъта Бибылты Анатоли.
Нывтæй дарддæр ма равдысты сты фотонывтæ дæр, кæцытæ Кæсойы фырт систа Европæмæ йæ балцы рæстæджы. Лаврент у æнахуыр хъаруджын адæймаг. Æхсæнадон æмæ ахуырадон архайды æмрæнхъ уый дарддæр кæны сфæлдыстадон куыст. Портретон жанры «Девушка в голубом», «Ирэн», «Моя бабушка», «Тетя Шура», «Хазби Кокоев», нывгæнæг хуызтæ равдисынæн спайда кодта «рагон» æмæ «ног» нывкæнынады амæлтты уæрæх спектрæй. Иууыл алыгъуызондæр здæхты нывкæнынады аивад æвдисгæйæ, уый сæххæст кодта «Роза Тираны» инсталляци, 2008 азы августы хæсты рæстæджы лицейы кæрты спырхгонд хæстон снарядæй. Цымыдисон у композици «Утро невесты» дæр, йæ ныййарджыты сыгъд хæдзары дуары баззайæггаг хайыл, цыран нывгæнæг æвдисы рагон ирон æгъдæуттæ æххæст кæнын. Ирон национ æгъдæуттæ ма æвдыст цæуынц ахæм нывты, куыд зæ-гъæм «На свадьбу», «Мой дед», «Ветераны», «Одиночество». Абстрактон композициты «Рождение мира», «Крик», «Собачий заговор», «Явление ангела», «Дерево»-йы автор ирдæй æвдисы йæ миддуне. Йæ конд ныв «Хозяйка города»- йы æвдыст цæуы афтид уынджы астæу иунæг гæды, кæцы зæрдыл лæууын кæны 90-æм азты трагикон цаутæ. Хуссар Ирыстоны уæззау фæлварæнтыл дзурæг сты нывтæ «Красная полоса», «Реквием» æмæ «Сожженная Яблоня» дæр. «Первый снег», «Улица моего детства», «Цхинвальский парк», «Набережное», «Улица старого Цхинвала» – ацы нывтæ сты авторы сабибонты мысинæгтæ.
Кæсойты Лаврент у нывкæнынады аивады зындгонддæр ныв-гæнджытæй сæ иу, нæ бæстæйы культурон бынтæм уый бахаста стыр хайбавæрд. Тыбылты Алык-сандры номыл Паддзахадон университеты Хуссар Ирыстоны адæмон нывгæнæджы куыстыты равдыст байгом 21 октябры. Уыцы мæй ма Кæсойты Лавренты равдыст уыд Мæскуыйы уырыссаг аивады музейы. Йæ куыстытæ æвæрд сты Третьяковы галереяйы æмæ Скæсæны музейы, афтæ ма сæрмагонд коллекциты æмæ дунейы музейты дæр. Нывкæнынады аивады йæ сæйраг фæндаг у, ирон культурæйы монон æмæ материалон æргъадтæ сæндидзын кæнын.
Кокайты Заринæ
Comments are closed, but trackbacks and pingbacks are open.