Мадзæлттæ бæрæгбонты цытæн

Республикæ Хуссар Ирыстоныл 32 азы сæх-хæсты цытæн бæрæгбонон мадзæлттæ райдайдзысты 19 сентябры паддзахаддзинады сæйраг символ – Паддзахадон тырысайы бонæй. Цытджын бæрæгбонон мадзалы райдианы, æнæмæнгдæр, айзæлдзысты Хуссар Ирыстоны æмæ Уæрæсейы Федерацийы гимнты зæлтæ. Уымæй дарддæр ма ацы къуырийы кæрон – майрæмбон æмæ сабаты, нæ бæстæйы æппæт скъолаты уагъд цæудзысты паддзахадон символты сæраппонд сæрмагонд иумиаг уроктæ, афтæ ма сывæллæттæн радзурдзысты 20-æм сентябры бæрæгбоны нысаниуæг æмæ нырыккон историйы тыххæй.

Бæрæг куыд у, афтæмæй нæ Паддзахадон тырысайы бон фыццаг хатт нысан æрцыд 2013 азы, фæлæ нæ националон символ та ссис 1989 азы.

20-æм сентябры Республикæйы боны цытæн Цхинвалы Театралон фæзуаты уагъд æрцæудзæнис æфсæддон гарнизоны парад райсомæй 11 сахатыл, кæцыйæн къухдариуæгад кæндзæнис РХИ-йы Хъахъхъæнынады министр Марат Павлов. Цæмæй парад, куыд æмбæлы афтæ ацæуа, уый тыххæй цалдæр боны Театралон фæзуаты уагъд цыдысты репетицитæ. Дзауы районы дæр 19-æм сентябры цытджын æгъдауæй банысан кæндзысты Паддзахадон тырысайы бон. Уый тыххæй нын фехъусын кодта Дзауы районы администрацийы культурæйы хайады гæс Санахъоты Анжелæ. Уый куыд банысан кодта, афтæмæй районы центры «Кады аллея»-йы райсомæй 11 сахатыл скъоладзау фæсивæд, ахуыргæнджытæ æмæ районы цæрджытæ банысан кæндзысты бæрæгбон. «Скъолатæ активонæй сæхи цæттæ кæнынц ацы бæрæгбонон мадзалмæ. Ацы бæрæгбон кæй райдыдтам нысан кæнын, уый тынг раст хъуыды у, уымæн æмæ рæзгæ фæлтæр хъуамæ зоной паддзахадон символтæ цы сты æмæ сын цы нысаниуæг ис, уый», – банысан кодта Санахъоты чызг.

Ахæм æнгæс мадзæлттæ уагъд æрцæудзысты Знауыры районы дæр. Знауырæгтæ бæрзонд сисдзысты Паддзахадон тырысаты æмæ уый фæстæ бакæсдзысты концерттæм, кæцыты хайад райсдзысты бынæттон зарæггæнджытæ.

Ленингоры районы ныридæгæн сæхи цæттæ кæнынц дыууæ бæрæгбонмæ дæр. Республикæ расидыныл 32 азы сæххæсты боны цытæн Ленингоры районы культурæйы хæдзары уагъд æрцæудзæнис концерт, кæцыйы хайад райсдзысты Хуссар Ирыстон æмæ Цæгат Ирыстон-Аланийы популярон зарæггæнджытæ. Район ма цæттæ кæны бæрæгбонон армукъа бакæнын дæр, кæцыйы равæрдзысты бынæттон хъæууонхæдзарадон продукци.

Дыууæ бæрæгбоны цытæн нæ республикæйы цы алыгъуызон культурон мадзæлттæ уагъд цæудзысты, уыдон æхсæн ис спортивон ерыстæ дæр, 20-æм сентябры та изæрæй нæ горæты Театралон фæзуаты уагъд æрцæудзæнис бæрæгбонон концерт.

Нæ уацх.