Хорздзинад саразын, адæмæн зæрдæрухсдзинад хæссын æмæ сæ фарсмæ балæууын чи зоны, Ирыстоны ахæмтæ бирæ ис. Адæмы фарсмæ æрбалæууынц, зындзинады чи бахауы, æххуысмæ чи æнхъæлмæ кæсы, уыдонæн свæййынц хæрзгæнджытæ.
Æнæнхъæлæджы дунейыл ног хæцгæ низ – коронавирус куы ахæлиу, нæ республикæ тӕссаг уавӕры куы бахауд, уӕд медицинон кусджыты ӕмрӕнхъ, сæхи равдыстой бархионтæ дæр – нæ фæсивæд. Хъуыдис æнæкъуылымпы æххуыс, æмæ се ‘ппæт дæр, уæззау уавæрты архайгæйæ, низимæ тохы бацыдысты. Боны мидæг хъуыд 200 туаггуыры баллоны бæрц. Фæстагмæ кæд рынчынты нымæц фæкъаддæр, уæддæр дохтыртæн туаггуыр нырма бирæ хъуыд. Цалынмæ волонтертæ не ‘рбацыдысты, уæдмæ тынг зын уыд кусын.
Йе ‘ххуысы къух сæм чи бадардта, уыдонæй иу у милицийы кусӕг Дзабиты Руслан (Артем). Ацы зын рæстæджы йӕ бафæндыд адæмæн æххуыс кæнын. Руслан бацыд рынчындонмæ, балæууыд рынчынтæ æмæ дохтырты фарсмæ. Зонæмæ бахизгæйæ, фыццаджыдæр, банкъардта æххуысы къухты хъуагдзинад, æмæ фыццаг бонтӕй фӕстӕмӕ бацыд карз низимӕ тохы.
«2020 азы мах куыстам туаггуыры ифтонгадыл, цалынмӕ комкоммӕ хахх нӕ сарӕзтой, уӕдмӕ. Уый фӕстӕ та ӕххуыс кодтам уæнгдыхӕй – уӕззау уавӕры уæвæг пациентты рынчындонӕй компьютерон томографмӕ бакӕнын ӕмӕ ӕндӕр хъуыддӕгты», – загъта уый.
Æрдз адæймаджы цы бирæ хорз ми-ниуджытæй фæхайджын кодта, уыдонæн сæ тæккæ рæсугъддæр у æмбалдзинад. Æмбалдзинад адæймаджы уды хорз миниуджытæй кæнгæ æмæ аразгæ у.
Æмбæлттæ, хæстæджытæ се ‘ппæт дæр Русланы цахæм æгъдауджынæй зонынц, уыдон сты хорзæй дæнцæгæн хæссинаг. «Æз сæрыстыр дæн, Артем ме ‘мбал кæй у, æмæ абоны онг фæсмойнаг нæ дæн. Уый у диссаджы стыр зæрдæйы хицау. Адæймаг йæхи æмбарынхъом куы фæвæййы, уæд банкъары æмбалдзинад… Æцæг æмбал зын сахат сбæрæг вæййы. Йе ‘мбалы зын зын кæмæн уа, йæ циныл æцæг зæрдæйæ чи цин кæна, уый у æмбал», – зæгъы Русланы æмбæлттæй сæ иу Тыбылты Алан. Русланæн йæ царды фæндаджы райдайæн ницæмæй хицæн кæны бирæ æмбæстæгты цардвæндагæй. Цард ирон æгъдау æмæ намысы тæразæй кæй бары, уый йын дæтты рæстагæй цæрыны тых. Ирон æгъдау та у стыр философи. Йæ бæрзæндтæм уымæн тындзы Руслан дæр, æмæ царды амайы йæ кады æмæ намысы мæсыг.
Хуссар Ирыстоны фӕсивӕдон политикӕ, спорт ӕмӕ туризмы комитет «Россотрудничество»-йы ӕххуысӕй сбӕрӕг кодтой «2021 азы – Азы адæймаг»-ы. Дзабиты Русланæн рахицӕн кодтой сӕрмагонд приз – «Азы волонтер». Хорзæхтæ дæтгæйæ, республикон бирæпрофилон медицинон центры директоры хæстæ æххæстгæнæг Джиоты Витали йын йæ куыст рахуыдта, хæрзиуæгон æмæ, саргъгæнæн кæмæн нæй, ахæм. Дзабиты Руслан нымайы, ацы хорзӕх кӕй у сӕ командӕйӕн иумӕйаг.
“Уым чи куыста, уыдон се ‘ппӕт дӕр куы райстаиккой хорзӕх, уӕд уыдаид хуыздӕр. Ӕхсызгон мын у, кӕй мын скад кодтой, фӕлӕ уый ӕрмӕст мӕн нӕу, фӕлӕ ӕгас къорды. Ӕз уыдон уӕлдай ницы сарӕзтон”, – загъта æвзонг лӕппу.
Руслан кусы мидхъуыддӕгты министрады горӕты хайады сӕрмагонд ӕмӕ хӕстон цӕттӕдзинады хистӕр инспекторӕй. Уымæй дарддæр ма куыстæй сæрибар рæстæджы сывæллæты ахуыр кæны армхæсты техникæйыл. Йæхæдæг дæр у нæ Республикæйы бирæхатты чемпион ММА-йæ. Коронавирусы фыццаг уылӕны уый ракуырдта йӕхи куыстӕй, цӕмӕй ӕххуысмӕ бацӕуа рынчындонмӕ.
Кæм кусай æмæ цæрай, цы адæмыл æмбæлыс, уыдоныл дæ уды хъарм æмæ дæ зæрдæйы уаг рæдауæй куы тауай, уæд ахæм адæймагæн йе ‘нтыстытæ вæййынц дывæр. Номдзыд ирон фыссæг Гæдиаты Секъа афтæ загъта: «Хорз лæджы фæстæ мæргътæ тæхынц. Лæгæй хорз куы фæзæгъынц, уæд ын, фыццаджыдæр, фæкæсынц йæ удыхъæдмæ, йæ зондахастмæ æмæ йæ хъарумæ». Уымæ гæсгæ нæ бон зæгъын у афтæ: ирон лæгмæ цыдæриддæр хорз миниуджытæ ис – лæгдзинад æмæ рæстдзинад, ныхасæн хицау уæвын, ирон фарнæн зæрдиагæй лæггад кæнын, уыдонæй се ‘ппæтæй хайджын фæцис Руслан.
ДРИАТЫ Лейла
Comments are closed, but trackbacks and pingbacks are open.