Афтæ йæ схуыдтой æмæ хонынц, йæ царды фылдæр хай цы Ирыстонæн снывонд кодта, уыцы Ирыстоны цæрæг ирæттæ, йæ хæлæрттæ. Æниу йæхицæй рацыд уыцы фæндон, номæвæрæгкаг хæдон дæр не ‘рцагуырдта, афтæмæй. Йæ бонзонгæ царды бонтæ аланты-ирæтты проблемæ иртасгæйæ кæй батыдта, уый тыххæй та йын зæрдиаг арфæтæ æмæ куывдтытæ кæнын куы райдыдтой, уæд йæхæдæг загъта хъазгæйæ, æххæст мын мæ мыггаг æмæ мæ ном дæр иронмæ раивут, зæгъгæ, æмæ уадидæгæн Кузнецов Владимир Куырды фырт Бало фестадис…

Æцæгæйдæр диссаг у… Цал æмæ цал зынгæ ахуыргонды бавнæлдтой зæрдиаг æмæ разæнгардæй нæ истори, нæ культурон æргъадты сусæгдзинæдтæ фæлгъауынмæ! Æниу дис дæр цæмæн хъуамæ кæнæм – мыд кæм нæй, ахæм дидинæгмæ мыдыбындзытæ нæ тæхынц!.. Ис нæм, æндæр адæмтæ цæмæ бацымыдис кæной, нæ хорзмæбæлджытæ нæ сæрыстыр кæмæй уой, не знæгтæ давынмæ цæмæ бабæллой, фырхæлæгæй сзыгъуыммæ кæныныл кæй тыххæй архайой… Бирæ сты, рагæнусты дæр чи куыста Ирыстон æмæ ирæтты историйыл, уыцы ахуыргæндтæ. Уыдонæн сæ номдзыд фæдон Жорж Дюмезиль хатыр дæр ракуырдта, нæ истори, нæ фыдæлты хæзнатæ нын сæхи бакæнынмæ гæппæввонгæй чи лæууы, уыцы æндæр адæмты ахуыргæндтæй, йæ хæлæрттæй, Нарты эпос ирон адæмы кæй у, ууыл дызæрдыг кæнын кæй нæ хъæуы, уый тыххæй.

Фæлæ уыцы фæсарæйнаг æмæ уырыссаг ахуыргæндтæй уый бæрц хъару æмæ уый бæрц рæстæг ничи бахардз кодта, номдзыд ахуыргонд, историк æмæ археолог Владимир Кузнецов цас сарæзта нæ рагфыдæлтæ аланты истори раиртасынæн, алантæ нырыккон ирæтты комкоммæ фыдæлтæ кæй сты, уый сбæлвырд кæнынæн. Ис афтæ зæгъæн æмæ æппæт йæ бонзонгæ цард рауæлдай кодта аланзонынадæн.

Номдзыд ахуыргонд, Уæрæсейы Зонæдты Академийы профессор, Германы археологон институты уæнг-корреспондент Дмитри Коробовы чиныг «Аланы Северного Кавказа. Этнос. Археология. Палеогенетика»-йы разныхасы чиныджы зо-надон редактор Владимир Кузнецов фыссы:

«Известно также, что наука археологии за 25-30 лет обновляет свои источники, методы и приемы, позволяющие вырабатывать новое знание. Это делает археологию весьма динамичной. Современной наукой. Именно такая ситуация сложилась в последние годы в археологии на Северном Кавказе при иследовании важнейшей проблемы этногенеза осетинского народа, занимающего центральную часть Кавказского перешейка. Острота его состоит в том, что осетины – единственный на Северном Кавказе ираноязычный народ, и это требует научного объяснения. Осетинам повезло. Более 200 лет назад Юлиус Клапрот высказал мнение о том, что осетины Кавказа являются потомками известных в письменных источниках средневековых алан. Мысль Клапрота оказалась ге-ниальной, и ее суть, постоянно подтверждаемая новыми аргументами и фактами, ныне представляет основу научной парадигмы формирования осетинского народа. Это общеизвестно на европейском и мировом уровне».

Кузнецов аланзонынады темæйыл ныффыста сæдæ зонадон куыстæй фылдæр. Саргъгæнæн кæмæн нæй, ахæм уæзгæ хуынтæ бахаста Аланыстоны истори ахуыр кæныны хъуыддагмæ. Уый тыххæй æрцыд нымад Алайнаг астæуккагæнусон культурæйы фæдыл иууыл хуыздæр специалистыл. Абон нын нæ истори сæхи бакæныныл чи архайы, уыцы æндæр адæмты мæнг ахуыргæндтæ знаджы цæстæй бæргæ кæсынц стыр ахуыргондмæ, бæргæ архайдтой æмæ архайынц сæхи ‘рдæм æй раздахыныл, фæлæ сын дзы ницы рауад. Кузнецовæн зонад æмæ Рæстдзинад уыдысты æмæ сты йæ царды æмбæлццæтæ, уæлдайдæр ахæм кары нал ис, цæмæй ма йæ удысконды позицитыл комдзог рацæуа. 95 азы йыл æххæст кæны, фæлæ нырма дæр ныфс æвæры ног куыстытæй ирон адæмы рагисторийы тыххæй. Уый кæддæриддæр нымадта æмæ нымайы, ирон адæм кæй сты æнæхъæн Кавказы иууыл размæдзыддæр, европæйаг культурæмæ иууыл æввахсдæр лæууæг наци. Ирыстоны та нымайы Уæрæсейы сæйраг ныфсы æмцæдисоныл Кавказы. Æмæ куырыхон ахуыргонд сæрыстыр у уымæй. Чизоны йæ уыцы æнкъарæн сразæнгард кодта кæддæр, йе ‘взонджы бонты, йæ цард ирон адæмы историйæн снывонд кæнынмæ дæр.

Стыр дурæн, дам – стыр тулæн. Нырма нæ разы стыр ахуыргондæн йæ юбилей банысан кæныны хæс не ‘вæрæм – уый фæдыл нæ ахуыргæндтæ сæ ныхас зæгъдзысты бæстондæрæй. Абон уал бузныг зæгъæм, Ирыстонæн уый бæрц хæрзты чи бацыд, уыцы зынаргъ адæймаджы чи æрхъуыды кæны, йæ фарсмæ чи балæууы, уыдонæн. Ацы бонты дæр та сæ фыдыбæстæ æмæ адæмыл æнувыд патриоттæ Хетæгкаты Оксанæ, Зассеты Болат, Моргуаты Ладæ æмæ æндæртæ Минералон дæттæм уазæгуаты ныццыдысты номдзыд ахуыргондмæ. Уыдоны бафæндыд, сæ раттæг адæмæн сын æвæджиауы стыр хæрзты чи бацыд, уыцы номдзыд ахуыргонды бабæрæг кæнын, ирон адæмæн æнувыдæй кæй фæлæггад кодта, уый тыххæй йын зæрдиаг бузныг зæгъын.

Æмæ, абон Владимир Кузнецов цы кары ис, уыцы кары адæймаджы æндæр ницы хъæуы – æрхъуыды йæ кæн, иу рæвдыд ныхас ын зæгъ æмæ йæ зæрдæ хуры фарсмæ абаддзæн. Цы алыгъуызон лæвæрттæ йын ныххастой, уыдонæй уæлдай тынгдæр бацин кодта, йемæ иронау кæй дзырдтой, ууыл æмæ Зассеты Болаты арæзт радон ирон къæлиндарыл. Болат ацы азæн цы къæлиндар сарæзта, уым Ирыстонæн хуыздæр хæрзты чи бацыд, уыдонæй иу у Владимир Кузнецов. Кæй зæгъын æй хъæуы, зонады иууыл бæрзонддæр къæпхæнтæм чи схызт, уыцы зындгонд ахуыргонд ахæм буц митæй цух нæу фæлæ йын уæддæр æнæкæрон æхсызгон уыд, куыд йæхи фæлтæр, афтæ йæ Ирыстоны ныры фæлтæр дæр æввахс адæймагыл кæй нымайы, уый. Куыд фæзæгъынц, судзин, дам, зæрдæ ссардта, судзин, дам, зæрдæ скъахта…

Уæлдæр кæй кой ракодтам, уыдон та сæ арфæйаг хъуыддагæй ноджыдæр фенын кодтой, ирон адæм æцæгæйдæр кæй сты ахæм диссаджы адæм, историкæй-æндæрæй сæ куыст, сæ архайд кæмæн хъуамæ снывонд кæной!

Сæрмагонд бузныг Ирыстоны зынг-зæрдæ патриот, Цæгат Ирыстон-Аланийы Парламенты депутат Уататы Зелимæн, ацы фæрнджын адæймагмæ йæ хъус иугæндзон æмæ лæмбынæг кæй дары, куыд моралон, афтæ йын материалон æххуыс дæр кæй кæны, уый тыххæй. Уымæн æмæ ацы лæг махæн, йæ мыггаджы уырыссаг бындурмæ гæсгæ нæ, фæлæ æцæгæй у Куырды фырт –  Куырдалæгоны арæзт хотыхтæ нæртон адæмы æддагон знæгтæй куыд хъахъхъæнынц, афтæ сæ фæдонтæ-ирæтты та Владимир Кузнецовы фундаменталон зонадон куыстытæ хъахъхъæнынц алыгъуызон знæгтæ æмæ истори зыгъуыммæгæнджытæй.

Æмæ, чизоны, æвзæр нæ уаид, нæ цæст кæмæндæрты куыд бауарзта, афтæ ацы фæрнджын лæгæн дæр куы бауарзид кадджын æмбæстаджы ном радтын. Уымæн æмæ Ирыстон стыр хæсджын у йæ разы.

 

Comments are closed, but trackbacks and pingbacks are open.