25-æм июлы зынгæ ахуыргонд, археолог Владимир Кузнецов банысан кодта йæ 95 азы юбилей.

Ахуыргонд-археолог, историон зонæдты доктор, профессор Владимир Кузнецовæн РХИ-йы президент Гаглойты Аланы Барамындæй лæвæрд æрцыд «РХИ-йы зонæдты сгуыхт архайæг»-ы кадджын ном бирæ азты дæргъы йе ‘нтыстджын зонадон-иртасæн архайды тыххæй. Президенты номæй Владимир Кузнецовæн паддзахадон хорзæх радта Хуссар Ирыстоны зонад-иртасæн институты директор Гаглойты Роберт.

Владимир Александры фырт райгуырд 1927 азы 25 июлы Пятигорскы. Уый ныффыста 250 зонадон куысты, кæцыты ‘хсæн ис 25 монографийы. Йæ чингуыты йын æлхæнынц стыр тиражтæй. Уыдонæй бирæтæ систы библиографион стæм-дзинад, бирæтæ дзы баххæст æмæ бакуыстгонд æрцыдысты ногæй – «Очерки истории алан: путешествие в древний Иристон», «В верховьях Большого Зеленчука», «Нижний Архыз в  10-12 веках. К истории средневековых городов Северного Кавказа», «Христианство на Северном Кавказе до 15 века». Иллюстрацигонд монографи «Христианство на Северном Кавказе до 15 века»-йы тыххæй Владимир Кузнецовæн саккаг кодтой сæрмагонд хорзæх – Уырыссаг чырыстон аргъуаны Макариевскы фонды Сыгъзæрин Майдан. Йæ бирæнымæц куыстыты бындур сты курдиат, энерги æмæ æгæрон куыстхъомдзинад.

1949 азы Владимир Кузнецов бацыд Пятигорскы паддзахадон педагогон институты историон факультетмæ, кæцыйы каст фæцис тынг хорз нысæнттыл. Уый фæстæ æрвыст æрцыд Зеленчукы районы Дæллаг Ермоловкайы хъæумæ скъолайы директорæй, кæцы ис зынгæ горæт Дæллаг Архызмæ æввахс, цыран Владимир райдыдта астæуккаг æнусы рæстæджы алайнаг археологи ахуыр кæнын. Уый фæстæ ахуыр кодта Мæскуыйы Советон Цæдисы зонæдты академийы археологийы институты аспирантурæйы. Йæ зонадон къух-дариуæггæнæг уыд историон зонæдты доктор, Кавказзонынады археологион скъолайы бындурæвæрæг, профессор Е.Крупнов. Аспирантурæ каст фæуыны фæстæ кусын райдыдта археологийы институты кæстæр зонадон кусæгæй. Кузнецов æнтыстджынæй бахъахъхъæдта кандидатон диссертаци «Аланские племена Северного Кавказа», зæгъгæ, кæцы мыхуыр æрцыд монографийы хуызы 1962 азы. Ацы куыст абоны онг дæр нымад цæуы кавказаг аланзонынады фæдыл сыгъзæрин фондыл.

Йæ экспедицион архайд райдыдта 1957 азы. Уый ссис  Е.Крупновы къухдариуæгады бын Советон Цæдисы зонæдты академийы археологийы институты Цæгат Кавказы археологион экспедицийы хайадисæг æмæ къорды хистæр. Йæ къорды иртасæнты объект ссис 10-12 æнусты Змейскийы катакомбон зæппадз – уыцы рæстæджы алайнаг культурæйы цыртдзæвæн. Зæппадзы уæлдай ирддæр ссарæггæгтæ, кæцыты скъахта Кузнецов, сты уæлæдарæсы уникалон дзаумæттæ, хъæдæй арæзт дзаумæттæ, бæх ифтындзæн дзаумæттæ, хæцæнгæрзтæ æмæ фæлындæнтæ, кæцытæ ныртæккæ æвæрд сты паддзахадон историон музейы. 1965 азы ссис Цæгат Ирыстоны зонад-иртасæн институты кусæг, цыран бакуыста дæргъæвæтин азты дæргъы алы æмæ алы бынæтты, уыцы нымæцы,  уыд зонады фæдыл институты директоры хæдивæг. Йе стыр зонадон æнтыстыты тыххæй Александр Кузнецовæн лæвæрд æрцыд «Цæгат Ирыстоны зонæдты сгуыхт архайæг»-ы кадджын ном. Цæгат Ирыстонимæ баст уыд æрмæст зонадон архайдæй нæ, фæлæ ма куыд активон æхсæнадон архайæг, афтæ дæр, кæцы зындгонд уыд рæстдзинад æмæ принципиалондзинадæй. Владимир Алыксандры фырт 1990 азты райдианы республикæйы æвдыста Уæрæсейы адæмон депутатты съезды.

Цæгат Ирыстоны зонад-иртасæн институты бацæттæ кодта докторон диссертаци «Алания в 10-13 веках», зæгъгæ, кæцы мыхуыр æрцыд монографийы хуызы 1972 азы, афтæ ма рухс федтой Цæгат Ирыстоны историйы фæдыл фыццаг том, «Вопросы осетинской археологии и этнографии»-йы æмбырдгæндтæ. Уагъд æрцыдысты бирæнымæц археологон развæдсгæрстытæ æмæ къахæггæгтæ Тменаты В., Тъехты Баграт æмæ æндæртимæ. Кузнецовæн йæ архайды тыххæй 1989 азы лæвæрд æрцыд «Уæрæсейы Федерацийы зонæдты сгуыхт архайæг»-ы ном. Уый у горæт Минеральные Воды-йы кадджын æмбæстаг. Ацы аз апрелы мæйы йын лæвæрд æрцыд «РЦИ-Аланийы кадджын æмбæс-таг»-ы ном, ирон адæмы историон-культурон бынтæ сахуыр кæнын æмæ бахъахъхъæнынмæ йе стыр сæрмагонд  хайбавæрды тыххæй.

Йæ царды фылдæр хай арвыста археологион экспедициты уæззау климæтон уавæрты. Цæгат Кавказы агуырдта æмæ иртæста ирайнаг æвзагыл дзурæг Аланты культурон бынты фæдтæ. Дæсгай археологион экспедицитæ, сæдæгай сахуыргонд рагон алайнаг цыртдзæвæнтæ, мингай уникалон артефакттæ зындгонд ахуыргондæн фадат радтой уæды онг, зындгонд чи нæма уыд, уыцы алайнаг историйы фæрстæ сахуыр æмæ Цæгат Кавказы адæмты этногенезы Алантæн цы роль уыд, уыдæттæ раргом кæнынæн. Йæ ном фыст æрцыд астæуккаг æнусы Алани сахуыр кæныны историйы.  Ивгъуыд азы Цæгат Ирыстоны уыд ахуыргонды зонадон-публицистон куысты презентаци, кæцы ссис Рагон Аланийы истори – «Кто мы? Осетины – Аланы Кавказа»-йы сахуыр кæныны йæ зонадон архайды хатдзæг.

Владимир Кузнецовæн йе ‘ппæт царды фæндаг у зонадыл æнувыддзинады ирд цæвиттон. Фыдыбæстæйон кавказзонынады рæзты йæ хайбавæрдæн саргъгæнæн дæр нæй. Мах дæр арфæ кæнæм Владимир Алыксандры фыртæн йæ юбилейы фæдыл, нæ зæрдæ йын зæгъы дард-дæры зонадон æнтыстытæ, æнæниздзинад æмæ активон сфæлдыстадон архайд.

 

Æрмæгыл бакуыста

ДЖИОТЫ Екатеринæ

Comments are closed, but trackbacks and pingbacks are open.