Ивгъуыд сабаты Къуайсайы цæрджытæн Галаты Барисы номыл кафт æмæ зарды паддзахадон ансамбль «Симд» равдыста цымыдисон концерт æмæ сын сарæзтой æцæг бæрæгбон. Ацы сфæлдыстадон коллектив сæм кæй бацæудзæн, уыцы хабар фехъуыстой раздæр æмæ сæм æхсызгонæй æнхъæлмæ кастысты. Клуб байдзаг сценæмæкæсджытæй, иу сæрибар бынат дæр нал уыд залы, бирæтæ та кодтой лæугæ дæр. Концертмæ цæугæйæ, хистæр кары адæм арфæ æмæ бузныджы ныхæстæ дзырдтой организатортæн, зæгъгæ, сæм рагæй нал уыд «Симд»-ы концерт.
Хуссар Ирыстоны Культурæйы министрады пресс-службæ нын куыд фе-хъусын кодта, афтæмæй ансамбль «Симд»-ы кафджытæ сæ репертуарæй сæххæст кодтой иуæндæс кафты: «Симд», «Хонгæ», «Абхазаг», «Хæххон кафт», «Алайнаг», «Цæцæйнаг кафт», «Хъаматимæ кафт» æмæ æндæртæ. Концерты ма сценæмæкæсджыты зæрдæтæ йæ рæсугъд зардæй бахъæлдзæг кодта эстрадон зарæггæнæг Харебаты Марта.
Къуыдаргоймаг сценæмæкæсджытыл хъæлдзæг æмæ арфæйы ныхæстимæ сæмбæлдис нæ республикæйы Культурæйы министры хæдивæг Мамиты Григори. Уый йæ банысан кодта, зæгъгæ, Къуыдаргоммæ Культурæйы министрады ‘рдыгæй ис хорз хъусдард здæхт. «Махæн нæ сæйрагдæр хæс у, цæмæй регионы цæрджыты сæрибар рæстæг мидисджындæр кæнæм культурон мадзæлттæй æмæ тынгдæр зонгæ кæной нæ аивады æнтыстытимæ», – банысан кодта Мамиты Григори.
Концерты кæрон Къуыдаргомы адæмы номæй æппæт артисттæн дæр сæ арæхстдзинады тыххæй арфæ ракодта горæты администрацийы сæргълæууæг Хуыгаты Алан. Уый бафиппайдта, зæгъгæ, сценæмæкæсджытæ ацы концертæй цы эмоцитæ æмæ æхцондзинад райстой, уый бæрæг уыд сæ цинæйдзаг цæсгæмттыл æмæ уæм, зæгъгæ, ногæй æнхъæлмæ кæсдзысты.
Хуссар Ирыстоны паддзахадон ансамбль «Симд»-ы аивадон къухдариуæггæнæг Коцты Сергей концерты фæстæ куыд фехъусын кодта, афтæмæй йæ кол-лективимæ арæхдæр уадздзысты концерттæ Къуайсайы.
Цхуырбаты Лариса
