Коронавирусон инфекцийæ хи бахизын æмæ йæ апарахат кæнын ма æруадзыны сæраппонд нæ республикæйы дæр æндæр регионты æмрæнхъ ист æрцыд къорд мадзæлттæ. Хуссар Ирыстоны Автомобилон-транспортон управленийы кусæг Гасситы Æхсар нын куыд загъта, уымæ гæсгæ чысыл ивындзинæдтæ хаст æрцыдис, рейсытæ чи кæны, уыцы горæтон æмæ районон транспортты графикмæ дæр. Уый куыд банысан кодта, афтæмæй районтæй, Дзауы районы йедтæмæ иннæ районтæм нырмæ дæр куыд цыдысты, афтæ цæуынц, рейстæ чи кæнынц, уыцы транспортон фæрæзтæ. «Дзауы районмæ та фæкъаддæр кодтам дыууæ рейсы. Иуæй бæлццæтты нымæц фæкъаддæр ис, студенттæ нæ цæуынц сæ ахуырмæ, æхгæд сты скъолатæ, æхсæнадон уагдæттæ дæр раздæры режимыл нæ кусынц, æмæ адæм бирæ хатт нæ вæййы. Сæхи хизынц æмæ уадиссаг нæ цæуынц æдтæмæ. Уымæ гæсгæ фæкъаддæр кодтам Дзау-Цхинвал æмæ Цхинвал-Дзауы маршруттæ. Ныр Дзауæй рейсон автобустæ фæцæуынц райсомы 8, 11, 15 æмæ 17 сахаттыл. Цхинвалæй та – 9, 14, 16 æмæ фæстаг 18 сахатыл. Ацы графикмæ рахызтыстæм дыууæ къуырийы размæ. Бæрæг куыд у, афтæмæй цы рейстæ фæкъаддæр кодтам, уыдон адæмыл æппындæр нæ бандæвтой, фаг сын у транспорт», – банысан кодта управленийы кусæг. Уый ма нын куыд загъта, уымæ гæсгæ коронавирусæй хи бахизыны тыххæй горæты дæр бæрæг фæкъаддæр сты бæлццæтты нымæц дæр æмæ рейсытæ дæр. Раздæр кæд горæты микрорайонтæм улæфт бонты æрвыст цыдис дыууæ транспортон фæрæзы, уæд ныр та æрмæстдæр – иу.
ЦХУЫРБАТЫ Лариса
Comments are closed, but trackbacks and pingbacks are open.