2016 азæй фæстæмæ ацы фразæ ссис уæрæсейаг спецназы девиз. Пайда дзы кæнынц Цæгат Ирыстоны барадхъахъхъæнæг органты кусджытæ дæр. Абон та ацы фразæ-сидтæй уæлдай тынгдæр пайда кæнынц Украинæйы сæрмагонд æфсæддон операцийы хайадисæг хæстонтæ. Исчи сæ куы фæзæгъы – «Работайте, братья!», уæд ын иннæтæ дзуапп раттынц – «Работаем, брат».
Бирæтæ бацымыдис кæнынц ацы фразæсидт куыд ссис девизы хуызæн, уымæ. Ацы фразæ йæ трагикон амæлæты хæдразмæ загъта Дагъыстаны Сергокалы хъæуккаг (дзæнæты бадинаг) Магомед Нурбагандов. 2007 азы та – Дагъыстаны паддзахадон университеты юридикон факультет тынг хорз нысæнттыл каст фæуыны фæстæ куыста горæт Каспийскы барадхъахъхъæнæг органты. 2016 азы 9 июлы аскъуыддзаг кодта йæ улæфтбон бинонтимæ, хиуæттимæ арвитын. Улæфыдысты æрдзы хъæбысы сæ хъæуæй дыууæ километры æддæдæр. Изæры сылгоймæгтæ æмæ нæлгоймæгты иу хай рацыдысты хæдзармæ. Магомед, йæ фыды æфсымæры лæппу Абдурашид æмæ се ‘ртæ кæстæр æфсымæры баззадысты хъæды.
ÆНÆХУЫНД «УАЗДЖЫТÆ»
Официалон версимæ гæсгæ, бандиттæ барадхъахъхъæнæг органтæй сæхи бааууон кодтой хъæды æмæ æнæнхъæлæджы сæмбæлдысты Нурбагандовтыл. Кæстæр æфсымæрæн, 10-аздзыд Арсенæн йæ гуыбын къахæй ныццавтой. Лæппуйы сæрыл рахæцыд Абдурашид æмæ йæ уайтагъд бандиттæ фехстой. Иннæты сбастой æмæ баджигул кодтой лагеры. Афтæмæй ссардтой Магомед Нурбагандовы барадхъахъхъæнæг органты кусæджы бæлвырдгæнæн. Арсен æмæ Магомеды фыдгæджытæ баппæрстой багажникмæ æмæ сæ аластой дарддæр. Иу километр ацæуыны фæстæ амардтой Магомеды. Йæ амарыны фæстæ Интернеты фæзынд видеоролик: Кадрты фыдгæнджытæ Магомедæй домынц, цæмæй фæсида йе ‘мслужбæгæнджытæм сæ куыст ныууадзыны тыххæй. Фæлæ уый бæсты Магомед Нурбагандов загъта: «Кусут, æфсымæртæ, кусут!». Сæ домæн сын кæй нæ сæххæст кодта, уый тыххæй йæ æгъатырæй фехстой. Æвзонг зынгхуыст хъайтары ныфсхастдзинад дисы баппæрста адæмы. Уый йæ кæд зыдта, фыдгæнджыты къухæй йæ адзал ссардзæн, уæддæр йæ сæр не ‘ркъул кодта. Йæ сæрмæ не схаста æлгъаг адæймæгты (кæд сæ адæймæгтæ схонæн ис, уæд) домæн сæххæст кæнын æмæ худинаджы бæсты равзæрста кадимæ мæлæт. Къæсхуыртæ лæппу-лæг разынд диссаджы фидар уды хицау æмæ йæ цæвиттонæн хæссынц æмæ хæсдзысты нырæй фæстæмæ дæр. Ахæм хъаруджын æмæ Райгуырæн бæстæйыл æнувыд чи сты, уыцы адæймæгты цæвиттоныл ахуыр кæнынц рæзгæ фæлтæртæ.
Магомед Нурбагандовы хъайтардзинад фыст æрцыд уæрæсейаг паддзахады историйы. Æцæгæйдæр, цас хъару уыд ацы æвзонг хъæбатыр лæппуйы уæнгты! Зыдта йæ, террористты къухæй удæгасæй нал аирвæздзæн, фæлæ йæ нæ фæтасын кодтой. Нæ бахъахъхъæдта йæ цард, фæлæ бахъахъхъæдта афицер æмæ нæлгоймаджы кад. Абдурашид æмæ Магомед Нурбагандовты нæмттæ сæнусон кодтой цыртытæ сын сывæргæйæ. Сергокалайы хъæуы фæзынд Нурбагандовты уынг. Æмæ иууыл сæйрагдæр та, уыдон систы терроризмы ныхмæ тох кæныны ирд цæвиттон.
2016 азы 22-æм сентябры Кремлы Екатерининаг залы уыд Уæрæсейы Федерацийы паддзахадон хорзæхтæ дæттыны церемони.
Кремлы цытджын мадзалмæ хуынд æрцыдысты Магомед Нурбагандовы ныййарджытæ дæр. Хъайтардзинад равдисыны æмæ Райгуырæн бæстæйыл æнувыд уæвыны тыххæй зынгхуыст хъæбатырæн лæвæрд æрцыд Уæрæсейы Федерацийы Хъайтары ном йæ амæлæты фæстæ. УФ-йы Президент Владимир Путин зæрдæбын ныхæстимæ хорзæх радта Магомеды фыд Нурбаганд Нурбагандовмæ. «Удæй фидар уыд мæ хъæбул. Куы йæм бахатыдаис, уæд дын алы хатт дæр баххуыс кодтаид, фæлæ тыхми никæмæ барста», – загъта Уæрæсейы Хъайтары фыд.
Магомед Нурбагандовы хъайтардзинады тыххæй фехъусгæйæ та мæ зæрдыл æрлæууыдысты ирон хъæбатыр лæппуты хъайтардзинæдтæ дæргъвæтин гуырдзиаг-ирон ныхмæлæуды рæстæджы. Бирæ ирон цардбæллон лæппутæ бабын сты сæ радтæг Ирыстоны сæрвæлтау. Бирæтæ-иу сæ кæд знæгтæм удæгасæй дæр бахаудтой, уæддæр сæ никæйы басастой, никæйы сæ æрлæууын кодтой сæ зонгуытыл, кæд сын стыр хъизæмæрттæ æвзарын кодтой, уæддæр. Цæвиттонæн æрхæсдзынæн Санахъоты Гришикы. Ацы цардбæллон хъæбул йæ фæстаг сулæфты онг дæр йæ дзыхы дзаг хъæр кодта, «Æз, ирон дæн», зæгъгæ. Кæд ын знæгтæ æвирхъау фыдмитæ фæкодтой, уæддæр худинаджы бæсты йæ радтæг адæмы, йæ Ирыстоны сæрвæлтау равзæрста кадимæ мæлæт. Æмæ цал æмæ цал цæвиттонæн ис æрхæссæн, уыдон чи фæнымайдзæн…
ДЖИОТЫ Екатеринæ
Comments are closed, but trackbacks and pingbacks are open.