Æрвыл аз куадзӕны бӕрӕгбоны агъоммӕ Цхинвалы администрацийы дӕлбар хӕрзарӕзтады комбинат ӕмӕ цъӕхвӕлыстгӕнӕн хайады кусджытӕ бафснайынц Згъудеры территорийыл уӕлмӕрд æмæ ацы бы-натӕй аласынц брон.
Згъудеры уӕлмӕрдмӕ фӕндаджы уавӕр ӕрӕджы бабӕрӕг кодта бӕстӕйы сӕргълӕууӕг Гаглойты Алан. Инспекцион азылды хайадисджытӕ уыдысты: горӕты администрацийы сӕргълӕууӕг Хуыгаты Ромео, Арӕзтад, архитектурӕ ӕмӕ цӕрӕнуатон-коммуналон хӕдзарады министр Елдзарты Константин, ӕмӕ паддзахадон уагдон «ЮгоОсетСтройИнвест»-ы къухдариуӕггӕнӕг Гӕбӕраты Алан.
Бӕстӕйы сӕргълӕууӕг цымыдис кодта уӕлмӕрды территори ӕфснайыны хъуыддагмӕ. Хуыгаты Ромео куыд банысан кодта, афтæмæй ӕфснайыны куыстытӕ уагъд цӕуынц горӕ-ты администрацийы хъусдардӕй.
«Куыстытӕ сты сӕ тӕмӕны, мӕгуырау боныгъӕдмӕ нӕкӕсгӕйӕ. Кусӕгдых ӕмӕ тех-никӕйы хъуагдзинад не ‘ййафæм», – загъта Хуыгайы фырт.
Президент бахӕс кодта, цӕмӕй куыстытӕ конд уой Куадзӕны бæрæгбон нысан кӕныны бонмӕ. Æмӕ, зӕгъгӕ, кӕд бахъӕуа ӕххуыс, уӕд уӕ фарсмӕ балӕудзыстӕм.
«Уыимӕ иумӕ, цалцæггонд уыдзæн Згъудеры уӕлмӕрдмӕ фӕндаг республикӕйы паддзахадон бюджеты фӕрӕзтӕй», – дзырдта Президент.
Администрацийы сӕргълӕууӕг Хуыгаты Ромео куыд банысан кодта, уымӕ гӕсгӕ къӕвда рӕстӕджыты уӕлмӕрды къахвӕндӕгтӕ тынг сцъыф вӕййынц. Фарст ӕрбӕстон кӕныны тыххæй бахӕс ӕрцыд, уӕлмӕрды территорийыл фӕндӕгтыл лыстӕг дур ныккалын кӕнӕ йыл асфальты цъар сӕвӕрыны фӕдыл куыстыты пълан бацӕттӕ кӕнын.
Паддзахады сӕргълӕууӕг бахӕс кодта «ЮгоОсетСтройИнвест»-ы къухдариуӕгадӕн, цӕмӕй фӕндаджы уыцы дӕрддзӕг сцалцӕг кӕныны фӕдыл куыстыты пълан бацӕттӕ кӕной горӕты администрациимӕ иумӕ.
Горæты администрацийы пресс-службæйæ нæм куыд хъусын кæнынц, афтæмæй бырон ласынæй дарддæр кусджытæ хуырдур калынц уæлмæрды сæйраг къахвæндæгтыл æмæ сæйраг бацæуæнты. Ныридæгæн уыцы бынæтты калд æрцыд сæдæ кубометрæй фылдæр хуырдур.
Хорз уаид, ацы хæрзиуæгон хъуыддагмæ се ‘ххуысы къух куы фæдариккой горæты цæрджытæ дæр.
Банысан кæнын хъæуы уый, æмæ не ‘мбæстæгтæй бирæтæ æрвылаз дæр æфснайынц сæ хиуæтты уæлмæрдты алфæмблай. Уый дæр бирæ фæрог кæны коммуналон æмæ æндæр службæты куыст.
Нæ уацх.
