Нӕ республикӕ йӕ ӕрдзон равӕрдӕй рӕсугъд куыд у, афтӕ ма у дзаджджын ӕмӕ бӕркадджын дӕр. Фӕлӕ ӕрдзы уыцы ӕгӕрон хъæздыгдзинæдтæй пайда кæнын дæр зонын хъæуы. Уыцы ахсджиаг ӕмӕ ӕнӕмӕнгхъӕуӕг фарстмӕ зӕрдӕйы фӕндиаг йӕ хъус чи дары, уыдонӕн ныххӕлар кӕны йе ‘гӕрон хуынтӕй. Ахӕмты нымӕцмӕ хауы нӕ горӕты цӕрӕг Джиоты Феликс дӕр. Уый йе ‘ргом раджы аздӕхта мыддарды куыстмӕ, базыдта мыдыбындзыты ӕдзухон архайды фӕткойтӕ, базилы сӕм афӕдзы дӕргъы хорз ӕмӕ уый фӕстиуӕгӕн йӕ зӕрдӕ барухс вӕййы се ‘ркӕнгӕ продукцийӕ. Джиойы фырт йӕ-хӕдӕг куыд зӕгъы, афтӕмӕй йæ чыргъдæттæ майы кӕрон хизӕнуаты вӕййынц йӕ райгуырӕн хъӕу Уелиты. Быдырбӕсты дзӕвгар ис, мыдыбындзытӕ мыды продукци цӕмӕй ӕркӕнынц, ахӕм алыгъуызон бӕлӕстӕ, дидинджытӕ ӕмӕ хорз боныгъӕдты фаг хӕссынц нектар. Мах уавӕрты мыды продукци ӕрӕмбырд кӕныны уый у фыццаг сезон, дыккаг та райдайы июны мӕйы кӕронӕй суанг августы фӕудмӕ, уӕд та сын сӕ бынат аивынц хӕххон рӕттӕм.
Джиойы фырт кӕд разы у йӕ фыдӕбонӕй, уӕддӕр ӕй уӕгъд нӕ уадзы иу ахсджиаг хъуыддаг. Уый фӕнды ӕмӕ йӕ тырнындзинад дӕр фылдӕр у, цӕмӕй нӕ республикӕйы тынг рапарахат уа мыддарды куыст, цӕрджыты фылдӕр хай йӕм аздахой се ‘ргом. Уый уымӕн, ӕмӕ мах бынæттон мыды продукци йӕ гъӕдмӕ гӕсгӕ ис бӕрзонд бынаты, Уӕрӕсейы Федерацийы Хуссар Ирыстоны мыд ахсы дыккаг бынат, фыццаг у Алтай, ӕртыккаг та – Башкири. Амӕй-размӕ Мӕскуйы горӕтон ветеринарон лабораторимӕ ныххаста йӕ мыды продукци ӕмӕ анализтӕ фенын кодтой иттӕг хорз бӕрӕг-гӕнӕнтӕ. Уый йӕ ноджы тынгдӕр сразӕнгард кодта, ӕмӕ ӕппӕт йӕ тых ӕмӕ зонындзинӕдтӕ дӕтты, цӕмӕй сахуыр кӕна ӕмӕ йӕ фӕлтӕрддзинад амона ӕндӕртӕн дӕр. Бахатыд нӕ горӕты адӕмон ахуырады хайадмӕ, цӕмӕй скъолаты 9-10 ӕмӕ 11-ӕм кълӕсты ах-уыргӕнинӕгтӕй ӕрӕмбырд кӕной, ацы професси базонынмӕ цӕттӕ чи у, ахӕмты. Уыдонӕн йӕ зонындзинӕдтӕ амондзӕн лӕвар ӕмӕ уый фӕстиуӕгӕн хъомыл кӕндзӕн фидӕны мыд-гӕсты. Йӕ хъӕппӕрисӕй ацы ахуыры азы нӕ горӕты колледжы байгом уыдзӕн мыддарды хайад ӕмӕ ахуыргӕнинӕгтӕн амондзысты мыдыбындзыты куысты дзӕвгар сусӕгдзинӕдтӕ, иу кӕнӕ иннӕ низ фӕзыныны аххосӕгтӕ, се сдзӕбӕх кӕныны амæлттæ ӕмӕ ӕндӕртæ. Теоретикон уроктӕ сын амондзӕн, Цӕгат Ирыстоны ацы хаххыл чи ахуыр кодта, ахӕм ӕрыгон специалист ӕмӕ сын практикон сахаттӕ та уадздзӕн Джиойы фырт йӕхӕдӕг.
Цӕстуарзонӕй амоны Фе-ликс мыддарды сусӕгдзи-нӕдтӕ, йӕ хӕдзармӕ йӕм ахуырмӕ, исты консультацимӕ чи бахаты, уыдонӕн. Цӕвиттон, йӕхӕдӕг куыд зӕгъы, афтӕмӕй мыдыбындзыты ӕркӕнгӕ продукттӕй нӕ пайда кӕнӕм ӕххӕстӕй, куыд сӕ ӕркӕнын хъӕуы, уыдон нӕ мыдгӕстӕ кӕй нӕ зонынц, уый аххосӕй. Сисӕм сагъӕ, уырыссагау у перга. Къуыртты хъомыл кӕнынӕн мадæл бындзæн дидинӕджы рыг дӕр у ӕнӕмӕнгхъӕуӕг. Дидинӕджы рыг мыды фӕлгӕты куы вӕййы, уӕд уый у сагъӕ, цӕмӕй мыдыбындзытӕн фаг уа фӕсауӕрц урссаг къуыртт хъомыл кӕнынӕн, уый тыххӕй сын дӕттын хъӕуы сагъӕ. Уый ма хорз у мыдадз дих кӕнынӕн дӕр, стӕй тынг ахъаз у адӕймаджы ӕнӕниздзинадӕн дӕр. Фӕлӕ алчи нӕ зоны, сагъӕ куыд райсын хъӕуы, уый. Ӕрӕджы йӕм бахатыд нӕ университеты студент, ӕвзонг мыдгӕс ӕмӕ йын ӕй куы бацамыдта, уӕд уый йӕхи рады сагъӕ реализаци кӕны ӕндӕр мыдгӕстӕн. Стӕй ма ноджы иу ӕнӕмӕнгхъӕуӕг хъуыддаг. Нӕ республикӕйы мыдгӕстӕ безтӕ, ома, гуылтӕ ӕлхӕнынмӕ ацӕуынц Пятигорск кӕнӕ ӕндӕр бынӕттӕм, уым сын цы гуылтӕ рауӕй кӕнынц, уыдон иуӕй уӕй кӕнынц зынаргъыл, иннӕмӕй та йе ‘ртыццаг хай вӕййы парафин. Уый та, кӕй зӕгъын ӕй хъӕуы, хорзӕрдӕм нӕ бандавдзӕн мыдыбындзыты рӕзтыл, уый фадат дӕтты, цӕмӕй мыдыбындзытӕ тагъддӕр фӕрынчын уой. Уымӕ гӕсгӕ Джиоты Феликс йӕхӕдӕг самал кодта безтӕаразӕн машинӕ ӕмӕ специалист куы ссара, уӕд уадздзӕн хӕрзгъӕд гуылтӕ, сӕ аргъ та уыдзӕн асламдӕр. Цӕвиттон, ӕддейӕ кӕй ӕрбаласӕм, уыцы безӕн (гуылӕн) йӕ аргъ кӕд 100 сомы у, уӕд бынаты та уыдзӕн 40 сомы.
Уымӕй дарддӕр мыдгӕстӕн сӕ къух рог кӕндзысты, нӕхимӕ цы фӕлтӕрд кусджытӕ ис, уыдон алыгъуызон мыды чыргъӕдтӕй дӕр.
Хуыбиаты Никъала
Comments are closed, but trackbacks and pingbacks are open.