Нæ республикæйы Æнæниздзинад хъахъхъæныны министрад фæззæджы æрбалæудимæ нæ республикæйы цæрджытæн бакæнынц гриппы ныхмæ вакцинæ аразыны компани. Уымæ гæсгæ медицинон уагдæттæ информацион фæрæзты руаджы æрсидынц цæрджытæм, цæмæй уæлæнгай ахаст ма æвдисой гриппы ныхмæ вакцинæ аразыны хъуыддагмæ. Гриппы ныхмæ вакцинæ арæзт фæцæуы канд горæты цæрджытæн нæ, фæлæ районты хъæуты цæрджытæн дæр. Грипп уæлдай тæссагдæр у сывæллæттæн æмæ хистæр кары адæймæгтæн, уымæн æмæ уыдонæн сæ иммунон системæ вæййы лæмæгъдæр.

Ныртæккæ нæ республикæйы медицинон уагдæтты цæуы фадынæджы ныхмæ вакцинæ  аразыны компани дæр. Уый уагъд цæуы, нæ сыхаг паддзахады кæй апарахат ис фадынæджы вирус æмæ вирусон грипп H1N1, уый тыххæй. Уый фæстиуæгæн Гуырдзыстонимæ арæн æхгæд æрцыд. Ныртæккæ республикæйы ацы хъуыддаджы фæдыл цы куыст цæуы, уый тыххæй нын информаци радта нæ республикæйы  РХИ-йы Фæлхасгæнджыты бартæ хъахъхъæныны æмæ адæймаджы фæрныгады къабазы хъусдарды фæдыл комитеты сæргълæууæг Коцты Маринæ. Уый нын куыд радзырдта,  афтæмæй ныртæккæ комитеты кусджытæ сæ куысты фæлгæтты планмæ гæсгæ  уадзынц æмткæй территорийыл комплексон мониторингтæ гриппы ныхмæ. «16 январæй фæстæмæ нæ комитеты кусджытæ кусынц æмæ бæрæг кæнынц ахуыргæнæндæтты æмæ сывæллæтты рæв-дауæндæтты. Абоны онг гриппæй рынчын сывæллæтты процент ныллæг у. Зæгъæм, карантинæй нын рахызтысты Ленингоры районы сывæллæтты рæвдауæндон, Бихъар æмæ Громы хъæуты астæуккаг скъолатæ. Ленингоры районы  арæн æхгæд кæй у, уымæ гæсгæ гриппæй рынчынты процент у ныллæг. Фæлæ 5-æм февралæй карантин конд æрцыд нæ горæты гимнази «Альбион», 10-æм æмæ 11-æм астæуккаг скъолаты, Дзауы районы Кировы хъæуы скъола, горæт Къуайсайы астæуккаг скъола æмæ нæ горæты сывæллæтты 10-æм рæвдауæндон, сывæллæтты иуæй-иу рæвдауæндæтты та  æхгæд æрцæудзысты хицæн къордтæ. Ацы ахуыргæнæндæтты  гриппæй рынчын ахуыргæнинæгты нымæц 20 проценты бæрц кæй уыд æмæ цæмæй иннæ ахуыргæнинæгтæ дæр ма фæрынчын уой, уый нысанæн аскъуыддзаг кодтам,  цæмæй сæ рæстæгмæ сæхгæнæм. Уымæн æмæ скъоламæ кæнæ сывæл-лæтты рæвдауæндонмæ рынчын сывæллон куы цæуа, уæд, кæй зæгъын æй хъæуы, фæрынчын уыдзысты æнæниз сывæллæттæ дæр», – банысан кодта Коцты Маринæ.

Йæ рады ма уый æрсидт, цæмæй рынчын сывæллæтты ныййарджытæ æнгом куыст кæной сæ фадыгон дохтыртимæ æмæ сæ сывæллæттæн ма хос кæной хæдзарон уавæрты, гриппæй рынчын сывæллæтты ма кæной ахуыргæнæн уагдæттæм, афтæ ма ахуыргæнджытæй æмæ ныййарджытæй чи у рынчын, уыдон дæр ма цæуой сæ куыстуæттæм. «Бирæ ныййарæг фæзæгъы, ома, мæхæдæг хæдзарон уавæрты схос кæндзынæн мæ сывæллонæн æмæ специалисттæм нæ бахатынц, цалынмæ уавæр фæкарздæр вæййы æмæ рынчындонмæ бахауы сывæллон, уæдмæ. Алы аз дæр фæззæджы æрсидæм нæ æмбæстæгтæм, цæмæй сæ сывæллæттæн æмæ сæхицæн дæр гриппы ныхмæ саразой вакцинæ. Хъыгагæн, бирæтæ серьезон ахаст нæ равдисынц  ацы  хъуыддагмæ.  Афтæмæй та нæ республикæйы медицинон кусджытæ тынг бæрнон ахаст æв-дисынц ацы фарстмæ. Хъыгагæн, бирæ ныййарджытæ нæ саразынц вакцинæ сæ сывæл-лæттæн æмæ стæй куы фæрынчын вæййынц, уæд сын схос кæнын зындæр вæййы, вакцинæ цы сывæллонæн арæзт æрцæуы, уымæй. Уый тыххæй хатын нæ республикæйы цæрджытæм, цæмæй гриппы ныхмæ вакцинæ аразыны компанимæ серьезондæр цæстæй кæсой, афтæ ма æндæр низты хуызты ныхмæ вакцинæтæ аразыны хъуыддагмæ  дæр. Ныртæккæ нæ медицинон уагдæтты арæзт цæуы вакцинæ фадынæджы ныхмæ. Арæзт цæуы ахæм сывæллæттæн æмæ хистæр кары адæймæгтæн, кæ-цытæ йæ афоныл нæ сарæзтой. Фадынæджы вирус сывæллон æнцондæрæй сфæразы, хистæр кары адæймæгтæм   абаргæйæ. Фæнды мæ зæгъын уый, æмæ абоны онг фадынæджы вирусæй нæ республикæйы регистраци кæй не ‘рцыд иу цау дæр. Фадынæджы вакцинæтæ ма арæзт цæуы республикæйы арæнгæрон цæрæг æмбæстæгтæн дæр», – загъта Коцты Маринæ.

Фæстаг бонты нæ республикæйы рабæрæг вирусон грипп H1N1-æй рынчын. Коцты Маринæ куыд загъта, афтæмæй нæ республикæйы æмбæстагæн лабораторон æгъдауæй фидар æр-цыд ахæм диагноз. Уый афоныл бацыд нæ республикæйы инфекцион рынчындонмæ, цыран ын бакодтой æмбæлон æххуыс æмæ йæ тагъд рафысдзысты. Сæ рады комитеты кусджыты къорд ауагъта æмбæлон мадзæлттæ, H1N1-æй цы æмбæстаг фæрынчын, уый æввахс хиуæттæн  арæзт æрцыд химиопрофилактикæ. Рынчындоны ма цы дыууæ уæззау рынчыны ис, уыдонæн та сбæрæг кодтой пневмония, уы-донæн дæр сæ уавæр фæхуыз-дæр. Коцты Маринæ куыд фехъусын кодта, афтæмæй вирусон грипп H1N1 Уæрæсейы цалдæр регионы, стæй Гуырдзыстоны дæр кæй ис, уæлдæфы руаджы кæй бахæцы, уымæ гæсгæ, ис зæгъæн, æмæ нæм кæй æрбахаудта нæ сыхаг паддзахадæй. Комитеты сæргълæууæг ма куыд загъта, афтæмæй Æнæниздзинады дунеон организаци æмæ «Роспотребнадзор» эпидеомиологон сезоны райдианы куыд фехъусын кодта, афтæмæй ацы аз циркуляци цæудзæн грипп «А» æмæ «Б»-йы къордтæ. Фыццаг къордмæ хауынц грипп H1N1 æмæ гонконгаг грипп. Ацы гриппты симптомтæ сты æмхуызон, фæлæ гриппы къорд «А» тæссагдæр уымæй у, æмæ адæймаджы организмы тагъддæр рæзынц йæ вирусон симптомтæ æмæ низы скарз вæййы.

Комитеты сæргълæууæг æр-сидт республикæйы цæрджытæм, цæмæй стыр хъусдард здахой сæрмагонд гигиенæмæ, уæлдайдæр та, æхсæнадон бынæттæй хæдзармæ куы бацæуынц, уæд æмæ æнæмæнгдæр хос кæнын хъæуы дохтырты амындмæ гæсгæ.

Танделаты Вилена

Comments are closed, but trackbacks and pingbacks are open.