Ивгъуыд къуырийы кæрон нæ республикæйы Æнæниздзинад хъахъхъæнын æмæ социалон рæзты министрад æмæ Федералон медицинон-биологион агентады оториноларингологийы национ медицинон иртасынæдты центримæ сарæзтой бадзырд æмгуыстады фæдыл. Бадзырдыл сæ къухтæ æрфыстой Джыгкайты Томас æмæ Дмитрий Липсон. Уыдонæн ма сæрмагондæй фембæлд уыдис республикон медицинон бирæпрофилон центры дохтыртимæ æмæ уым бæстонæй æрдзырдтой бадзырды пайда æмæ гæнæнты тыххæй.
Ацы бадзырды фæлгæтты хуссарирыстойнаг пациенттæн сæ бон уыдзæн бæрзондтехнологион медицинон æххуыс райсын. Медицинæ размæ кæй цæуы, уымæ гæсгæ ныртæккæйы дуджы Уæрæсейы Федерацийы ис уыцы фадæттæ æмæ рынчынтæн федералон медицинон уагдæтты рæстæгыл схос кæнынц.
Уымæй дарддæр ма бадзырды фæлгæтты нæ республикæйы медицинон кусджытæн уæлдæрбанысангонд федералон медицинон уагдоны базæйыл фадат уыдзæнис сæ квалификаци фæбæрзонддæр кæнынæн, цæмæй хуыздæр сахуыр кæной ног технологитимæ кусын, уый æмрæнхъ телемедицинæйы сусæгдзинæдтæ базонын æмæ æндæр ахæмтæ.
Æнæниздзинад хъахъхъæнын æмæ социалон рæзты министр Джыгкайты Томас йæ раныхасы банысан кодта йæ уæрæсейаг коллегæтимæ æмгуыстады фæдыл бадзырд бафыссыны стыр нысаниуæг æмæ сын раарфæ кодта.
«Махæн медицинæйы фадыджы ацы бадзырд бафыссыны хъуыддаг у тынг стыр æххуыс. Нæ республикæйы æрыгон дохтырты тынг фæнды, цæмæй медицинæ дарддæр дæр ахуыр кæной. Уымæн æмæ медицинæ иуран нæ лæууы. Тынг хорз хъуыддаг у æмæ дохтыр дарддæр куы тырна ахуыр кæнынмæ, цæмæй йæ професси ноджы арфдæр сахуыр кæна нырыккон медицинæйы æнтыстыты руаджы. Ныр нæ дохтыртæн уыцы фадат фæзынд æмæ дзы æнæмæнг хъæуы спайда кæнын», – банысан кодта министр.
Бæрзондквалификацион медицинон æххуыс бакæнын æмæ комплексон æгъдауæй рынчынтæн хос кæныны тыххæй Федералон медицинон-биологион агентады оториноларингологийы национ медицинон иртасынæдты центры арæзт æрцыд 14 зонадон-клиникон хайады стационарон хайадтимæ, ЛОР органты онкологион хайад, офтальмологи, фониатри, отоневрологи æмæ вестибулологи, æфсæр-цæсгомы æмæ пластикон хирурги æмæ æндæртæ.
Ацы федералон медицинон уагдоны дæсны специалисттæ æрвылаз дæр саразынц 12 мин бæрзондтехнологион операцийы. Медицинон центры кадрон потенциал у егъау. Ам рынчынтæн хос кæнынц 600 зонадон æмæ клиникон медицинон кусæгæй фылдæр. Уыдоны ‘хсæн ис Уæрæсейы зонæдты академийы академик, Уæрæсейы зонæдты академийы уæнгтæ-корреспонденттæ, профессортæ, медицинон зонæдты доктортæ – 35, медицинон зонæдты кандидаттæ – 55, Уæрæсейы Федерацийы сгуыхт дохтыртæ – 6 æмæ Уæрæсейы Федерацийы зонады сгуыхт архайджытæ – 2.
КОЦТЫ Еленæ
