Улæфт бонты нæм æрыхъуыст, нæ республикæйы сывæллæтты хореографион ансамбль «Сæрмæт» горæт Казаны кæфтыты фестиваль «Алые паруса»-йы призон бынæттæ кæй бацахста, уыцы æхсызгон хабар. Ансамблы ацы стыр æнтыстыл æхсызгонæй сæмбæлдысты нæ республикæйы, уæлдайдæр та – сывæллæттæн сæ ныййарджытæ.
Сывæллæтты хореографион ансамбль «Сæрмæт»-ы аивадон къухдариуæггæнæг Тедеты Ацæмæз нын бынатæй куыд фехъусын кодта, афтæмæй ансамбль ссис фестивалы фыццаг æмæ дыккаг къæпхæнты лауреат.
«Фестиваль «Алые паруса» фæцæуы алы аз дæр æмæ нæм хонæн æрæрвыстой декабры мæйы. Равзæрстам æмæ бацæттæ кодтам цыппар кафты: «Симд», «Хæххон кафт», «Чызджыты кафт» æмæ «Авайраг кафт». Фестиваль цыдис цалдæр боны дæргъы æмæ дзы хайад райстой 24 сфæлдыстадон коллективы. Мах иттæг хорз сæххæст кодтам нæ кæфтыты. Бацахстам дыууæ фыццаг æмæ дыууæ та – дыккаг бынæттæ. Сывæллæттæ сæхæдæг дæр райгондæй баззадысты æмæ ныр цин кæнынц сæ гастролон балцы тыххæй. Ныр дарддæр цæуыл бакусон, уый зонын. Фæнды мæ, цæмæй фидæны та райсæм фестивалы Гран-при.
Бузныг мæ фæнды зæгъын, нæ гастролон балц кæй æххуысæй ацыд, æппæт уыдонæн», – банысан кодта ансамблы аивадон къухдариуæггæнæг.
Ансамблы кафæг чызг Гаглойты Алисæ нын куыд загъта, афтæмæй фыццаг хатт уыдис ахæм стыр фестивалы æмæ йыл æнæферохкæнинаг тæлмæнтæ ныууагъта. «Куы ныххæццæ стæм, уыцы бонæй фæстæмæ ныл нæ фысымтæ афтæ узæлыдысты æмæ мæ никуы ферох уыдзæн. Фестивалы организатортæ нын сарæзтой Казаныл эксурси æмæ горæт тынг фæцыдис мæ зæрдæмæ. Нæ кæфтытæн нын тынг æмдзæгъд кодтой æмæ нын иттæг хорз аргъ скодтой. Иудзырдæй, тынг райгондæй баззадтæн мæ балцæй Казаны горæтмæ. Мæ бæллиц у, цæмæй арæхдæр цæуæм ахæм фестивалтæм, уымæн æмæ нын уый дæтдзæн стимул нæ кафты æмвæзадæн дæр æмæ ма базонгæ уыдзыстæм Уæрæсейы адæмты аивадимæ дæр», – банысан кодта Гаглойты Алисæ.
ЦХУЫРБАТЫ Ларисæ
