РХИ-йы Траспорт, сæудæджерад æмæ экономикæйы комитеты уагъд æрцыд хыгъдон æмбырд 2019 азы бакæнгæ куысты фæдыл. Æмбырды хайад райста Хицауады Сæрдары хæдивæг – Экономикон рæзты министр Бекъойты Геннади.
Комитеты Сæрдары хæстæ æххæстгæнæг Коцты Петр йæ раныхасы куыд банысан кодта, афтæмæй хыгъдон рæстæджы куыст цыдис дæлведомствæйон сæудæджерадон куыстуæтты финансон-хæдзарадон архайды сæйрагдæр бæрæггæнæнты æмбырд кæнын æмæ сын анализ аразыны фæдыл. Уыцы куыстуæттæ сæйраджыдæр хауынц хæл-цадон, сæудæджерадон, арæзтадон, транспортон æмæ энергетикон къабæзтæм.
Комитеты дæлбар куыстуæттæй аивгъуыйгæ азы активондæр финансон-хæдзарадон архайд кодтой фондз куыстуаты. Уыдон сты паддзахадон унитарон куыстуат «Бæгъиаты суаруадзæн завод», завод «Электровибромашинæ», «Арæзтадон æрмæджыты завод», Хуссар Ирыстоны дзулфыцæн куыстуат» æмæ «Цхинвалы хъæдкуысты комбинат».
Докладгæнæджы ныхæстæм гæсгæ дæлведомствæйон сæудæджерадон куыст-уæтты цæттæ продукцийы рауагъдады иумæйаг гуырахст æхцатæм ракæнгæйæ уыдис 183 милуан 961 мин сомы. Ивгъуыд азы цæттæ продукцийы рауагъды гуырахст, уый размæ азимæ абаргæйæ фæфылдæр Бæгъиаты суаруадзæн заводæн. 2018 азы ацы бæрæггæнæн куыстуатæн уыдис рекордон – 45 милуан 437 мин сомы. Уый та у, уыйразмæ азимæ абаргæйæ ,12 проценты фылдæр.
Хыгъдон рæстæджы куыстуат республикæйы бюджетмæ æдæппæтæй бахаста 6 милуан 560 мин сомы æмæ уый та 18 проценты фылдæр у 2018 азимæ абаргæйæ.
Аивгъуыйгæ азы йæ кондадон бæрæггæнæнтæ хуыздæр кодта паддзахадон унитарон куыстуат «Хуссар Ирыстоны дзулфыцæн куыстуат». Рауадзгæ продукцийы иумæйаг гуырахст уыдис 96 милуан 657 мин сомы аргъ. Æмæ уый та у йæ размæ азимæ абаргæйæ 1,57 проценты фылдæр. Продукцийы рауагъд, фыццаджыдæр, фылдæр кодта, цæттæ продукцийы ассортимент кæй фылдæр кодта, афтæ ма сæкæр æмæ ссад кæй реализаци кодта, уый руаджы. Куыстуат уадзы æмæ реализаци кæны 56 хуызы дзул, дзул-булкæйон æмæ кондитерон хæринæгтæ.
Паддзахадон унитарон куыстуат «Арæзтадон æрмæджыты завод» цæттæ продукци рауагъта 38 милуан 756 мин сомы аргъ æмæ йæ сыгъдæг æфтиæгтæ та хыгъдон рæстæджы уыдысты 2 милуан 967 мин сомы.
Комитеты сæрдары хæстæ æххæстгæнæг куыд банысан кодта, афтæмæй цæттæ продукцийы рауагъды гуырахсттæ кæй фæфылдæр сты, уый, сæйраджыдæр, баст у республикæйы территорийыл арæзтадон-æндидзынгæнæн процессмæ куыстуат активонæй баконд кæй æрцыд, уыимæ. Цы арæзтадон æрмæджытæ уадзы, уыдонæй фылдæр гуырахсты пайда кæнынц арæзтадон организацитæ. Дарддæр куыстуат план кæны къорд мадзæлттæ сæххæст кæнын рауадзгæ продукцийы гъæд фæхуыздæр кæныны æмæ фылдæр æлхæнджыты химæ раздахыны фæдыл.
Сæудæджерадон кондады гуырахстытæ рæзын кæныны, сæ конкурентхъомдзинад сын куыд бынæттон, афтæ уæрæсейаг базæртты хуыздæр кæнын, афтæ ма цæрджыты куыстæй ифтонг кæныны æмвæзад рæзын кæныны нысæнттæн, Коцты Петр куыд загъта, афтæмæй бакуыст æрцæудзæн Рæзты программæ.
«Дæлведомствæйон сæудæджерадон, транспортон æмæ энергетикон куыстуæтты къухдариуæггæнджытимæ иумæ бакуыстам æмæ республикæйы хицауадмæ бавдыстам дæлведомствæйон сæудæджерады куыстуæтты Рæзты программæ. Уый хауы паддзахадон унитарон куыстуæттæм, ахæмтæм, куыд «Цхинвалы хъæдкуысты комбинат» æмæ «Бæгъиаты суаруадзæн заводмæ», – загъта Коцты Петр.
БЕСТАУТЫ Валя
Comments are closed, but trackbacks and pingbacks are open.