Завод «Ирон сæн» фæнд кæны йæ продукци 20 мин авджы бæрц Уæрæсейы Федерацийы базары среализаци кæнын.
Куыстуаты генералон директор Алексей Цапаев куыд зæгъы, афтæмæй ног азмæ завод рауаддзæн æмæ æрцæттæ кæндзæн 200 мин авджы сæн «Аланский резерв», зæгъгæ, ахæм номимæ. Уыдонæй 20 мин арвитдзысты Уæрæсемæ, иннæтæ реализаци æрцæудзысты бынаты. Кæй арвитдзысты, уыцы сæн арæзт æрцыд «Шираз», «Каберне», «Мерло» æмæ «Совиньон» сорт сæнæфсиртæй. Уыцы сæнтæ се ‘ппæт дæр сты хæрзгъæд æмæ дызæрдыггаг нæу, ног азмæ сæ фæлхасгæнæг кæй æрцагурдзæн.
«Цалдæр мæйы размæ Уæрæсемæ аластам 50 мин авджы. Мæйы æмгъуыдмæ уыдон иууылдæр ауæй сты», – зæгъы Алексей Цапаев.
Уæ зæрдыл уын лæууын кæнæм, Хуссар Ирыстоны территорийыл сæны продукцийы райрæзты нысаниуæгæн 10 гектар сæнæфсиртæ кæй ныккалдтой. Уый тыххæй Инвестицион программæйы фæлгæтты хицæн æрцыд æхцайы бæрæг фæрæзтæ. Уымæй дарддæр ма Хицауад сиды нæ республикæйы цæрджытæм, цæмæй сæ хъусдард аздахой сæнгуыстмæ.
Алы ног куыстуаты фæзынд дæр æхсызгон цау у. Уымæн æмæ уый баст у кусæн бынæтты фæзындимæ, иннæмæй та дзурæг у нæ царды размæцыдыл. Нæ республикæйы алы ног куыстуаты æрбакондимæ баст у нæ экономикæйы, адæмы фæрныгады рæзт æмæ пад-дзахадон бюджеты баххæст дæр.
Завод «Ирон сæн»-ы къухдариуæгад куыд зæгъы, афтæмæй нырмæ уыдон кæд æрласæггаг продукцийæ архайдтой, уæддæр, 2020 азы сæнæфсир исдзысты бынæттон цæрджытæй дæр.
УАЗÆГТЫ Марфа
Comments are closed, but trackbacks and pingbacks are open.