Интернеты фæзындис ирон æвзагыл «Авд сау гæххæтты» («Семь черных бумаг»), зæгъгæ, ахæм сæргондимæ кинонывы трейлер. Кино номинацигонд æрцыдис престижон кинопремимæ.
Йæ премьерон равдыст уыдзæн 2024 азы 9 майы. Йæ трейлер та арæзт у уырыссаг æвзагыл.
Раздæр информацион агентад Ossetia News хъусын кодта, зæгъгæ, киноныв «Авд сау гæххæтты» бацыдис Мæскуыйаг Æхсæнадæмон кинофестивалы номинантты номхыгъдмæ. Бавдыст æрцыдис номинаци «Русские премьеры»-йы категоримæ. Æдæппæт уыцы категоримæ бахаудтой авд кинонывы.
Булкъаты Михалы уацауы бындурыл арæзт «Авд сау гæххæтты»-йы сценари конд у аивадон кинонывы домæнтæм гæсгæ. Сюжетмæ гæсгæ дыууæ æфсымæры сæ фыды фронтæй æрыздæхтмæ æнхъæлмæ кæсынц. Æрвылбон постхæссæг хъæуы цæрджытæн байуары фыдохы хабархæссæг сау гæххæттытæ. Æфсымæртæ уынынц, цас цæстысыг æмæ маст хæссынц уыцы гæххæттытæ æмæ постхæссæгимæ баныхас кодтой, цæмæй фыдохы гæххæттытæ мауал хæццæ кæна сæ адресаттæм, хæсты кæронмæ сæ бамбæхса.
Проектыл бакуыстой цæгатирыстойнæгтæ: генералон продюсер Сохъуырты Аслан, режиссер Колыты Анатоли æмæ сценарист Колыты Алан. Киноныв систой Дыгургомы хъæутæ Къæмунтæ, Гæлиат, Махческ æмæ Дзинагъайы, афтæ ма Зæрæмæджы æмæ Дзæуджыхъæуы. Сæйраг ролтæ сæххæст кодтой Тæбæхсæуты Балойы номыл Ирон драмон театр æмæ театр «Саби»-йы актертæ Лацойты Зитæ, Хъараты Максим, Абойты Заур, Дзуццаты Дзамболат, Хъараты Максим æмæ Гуыбиаты Хъазбег.
