Интернеты æндæвдад

Ныры дуджы адӕмӕн сӕ фылдӕр хай пайда кӕнынц интернетӕй. Ахӕм рӕстӕг ӕркодта, ӕмӕ ӕнӕ интернеты бастдзинадӕй уӕвӕн нӕй. Стырӕй, чысылӕй – иууылдӕр дзы пайда кӕнынц алы ӕмӕ алы хуызты: чи – телефонӕй, чи – компьютерӕй, чи – планшетӕй, кӕмӕн куыд гӕнӕн кӕны, афтӕмӕй. Бирӕтӕ та сӕ хӕдзӕрттӕм бауагътой интернет ӕмӕ пайда кӕнынц Wi-Fi роутертӕй, зӕгъгӕ. Уыдон та сӕ куыст кӕнынц ӕнӕхъӕн суткӕйы дӕргъы ӕнӕрлӕугӕйӕ.

Кӕй зӕгъын ӕй хъӕуы, исты информаци йӕ «тӕвдыл» базонын хорз у, стӕй дӕ тынгдӕр цы информаци цымыдис кӕны, уый дӕр уайтагъд ссарӕн ис интернеты руаджы. Фӕлӕ алцӕмӕн дӕр йӕ бӕрц зонын хъӕуы.

Куыд сбӕлвырд чындӕуыд, уымӕ гӕсгӕ ацы роутертӕ адӕймагыл хорзӕрдӕм не ‘ндавынц, ома, ӕппынӕдзух кӕй кусынц, уымӕ гӕсгӕ сты электромагнитон, ома, радиацийы гуырӕнтӕ.

Wi-Fi роутертӕ систы бирӕ популярондӕр, кабелон интернетимӕ абаргӕйӕ. Фӕлӕ Wi-Fi-имӕ абаргӕйӕ, кабелон интернет ницы зиан хӕссы адӕймаджы организмӕн.

Ахуыргӕндтӕ амонынц, роутер фынӕйы размӕ кӕй хъӕуы алы хатт дӕр ахуыссын кӕнын ӕмӕ та райсомӕй куы райхъал уат, уӕд та йӕ уӕ бон у баиу кӕнат. Уымӕ гӕсгӕ гӕнӕн ис ӕмӕ организм уӕлдай радиацийӕ йӕхи бахиза, стӕй ма уын уӕлдай электроэнерги дӕр ӕнӕхъӕн ӕхсӕвы нӕ банымайдзӕн.

Ныры роутертӕн сӕ фылдӕрӕн ис ахӕм функци, кӕцыйы руаджы уӕ бон у ӕмӕ йӕ сывӕрат иу цахӕмдӕр бӕрӕг рӕстӕгыл, уӕхимӕ цахӕм рӕстӕг кӕсы ӕнцондӕр, ахӕмыл, ӕмӕ уӕ роутер хицӕн кӕндзӕн ӕмӕ-иу баиу уыдзӕн йӕхӕдӕг автоматикон ӕгъдауӕй. Кӕд ӕмӕ йыл ахӕм функци нӕ уа, уӕд та йӕ хъӕуы хицӕнӕй балхӕнын ӕмӕ йӕ баиу кӕнын роутермӕ.

Кӕй зӕгъын ӕй хъӕуы, ацы интернеты бастдзинад афтӕ тынг не ‘ндавы ор-ганизмыл, фӕлӕ дзы уӕддӕр минималон ӕмӕ негативон ӕндӕвдад ис. Эксперименттӕ ауадзыны фӕстӕ роутерӕй активонӕй пайдакӕнынад уӕддӕр ӕркӕны цахӕмдӕр негативон фӕстиуджытӕм. Куыд рабӕрӕг, уымӕ гӕсгӕ роутерӕй арӕх пайда кӕнын ӕркӕны тугдадзинты ӕлхъывдадмӕ, фӕзынын кӕны тромбтӕ ӕмӕ схизын кӕны туджы артериалон ӕлхъывдад. Уымӕ гӕсгӕ тӕссаг у инсульт райсынӕн дӕр.

Ног технологитӕй пайда кӕныны иртасджытӕ ма сбӕрӕг кодтой, роутер нуӕртты системӕйыл дӕр кӕй ӕндавы, уый. Бирӕ экспериментты фӕстиуӕгӕн рабӕрӕг, ома, роутерӕй арӕх куы пайда кӕнат,  уӕд уын уый фӕзынын кӕндзӕн депресси, апати, фӕзындзӕн уын лӕмӕгъдзинад ӕмӕ уын уый фӕстиуӕгӕн, фӕкъаддӕр кӕндзӕн уӕ куыстхъомдзинад уӕ организмӕн.

Банысан кӕнын ма хъӕуы уый дӕр, ӕмӕ роутер кӕй ӕндавы сывӕллӕттыл, чысыл сабиты организмыл дӕр, уымӕн ӕмӕ сабиты организм нырма вæййы хом, ома, кӕны рӕзгӕ. Ныртӕккӕ ахӕм дуг ӕркодта, ӕмӕ сывӕллӕттӕ сӕ чысылӕй фӕстӕмӕ тынг размӕцыд сты ног технологиты хъуыддӕгты. Стӕй уӕ рох дӕр ма уӕд, алы хӕдзарон, цардуагон мигӕнӕн дӕр кӕй аразы йӕхи электромагнитон тыгъдад ӕмӕ ахӕм радиацийы ӕндӕвдад канд роутертӕй нӕ фӕисӕм, фӕлӕ ма алыгъуызон электронон мигӕнӕнтӕй дӕр, кӕцытӕй арӕх фӕпайда кӕнӕм ӕрвылбон дӕр.

Уымӕ гӕсгӕ алы ахӕм электронон мигӕнӕнты пайдакӕнынад хъӕуы ӕркӕнын минималоны онг, ома уын куыд гӕнӕн кӕны, афтӕ сӕ къаддӕрӕй пайда кӕнут: телевизор, мобилон телефон, ноутбук, планшет, электроны пец ӕмӕ бирӕ ӕндӕр цардуагон мигӕнӕнтӕй. Кӕд уӕ хӕдзары уыйас тынг нӕ пайда кӕнут интернетӕй, уӕддӕр дзы фӕпайда кӕнут куысты, уынджы, хӕрӕндӕтты, ресторанты, кафеты, кӕмдӕриддӕр ис Wi-fi, уым алы ран дӕр уӕ бон у ӕмӕ йӕ баиу кӕнат уӕ телефонмӕ. Уымӕ гӕсгӕ дзы бынтон «фервӕзӕн» дӕр нӕй. Уымӕн ӕмӕ ныры дуджы уӕддӕр хъӕуы интернет бастдзинад.

Ис цалдӕр уынаффӕйы, цӕмӕй роутеры ӕндӕвдад фӕкъаддӕр кӕнат уӕ организмыл:

1. Фӕкъаддӕр ын кӕнут йе ‘нӕмӕнгхъӕуындзинад, ома дзы куы спайда кӕнат, уӕд ӕй рахицӕн кӕнут. Пайдакӕнынады процесс куы ӕрлӕууа, уӕд ын ахуыссын кӕнут йӕ сигналы рацӕ-уӕн дӕр.

2. Кӕд ӕмӕ уын гӕнӕн ис равзарын, ӕдтӕмӕ хи арихӕфсынмӕ ахизын кӕнӕ интернеты бадын, уӕд равзарут фыццаг. Ахизут ӕдтӕмӕ, атезгъо кӕнут, сатӕг уӕлдӕф аныхъуырут, уый уын ахъаз уӕддӕр фӕуыдзӕн уӕ организ-мӕн, уӕ организм уын «бузныг зӕгъдзӕн».

3. Уӕ бон у «нӕйы» зӕгъын хӕдзарон мигӕнӕнӕн, куыд электроны пецӕн. Кӕд ӕмӕ дзы арӕх нӕ пайда кӕнут, уӕд уӕ хъӕугӕ дӕр нӕ кӕны.

4. Ма ӕвӕрут иу хӕдзары мидӕг иу Wi-fi роутерӕй фылдӕр. Ницы пайда у ӕмӕ уӕ къуымтӕ «байдзаг» уой интернеты сигналӕй. Иу роутер дӕр ыл аххӕсдзӕн.

Фӕлӕ куыд фӕзӕгъынц, афтӕмӕй алкӕмӕн дӕр йӕ бар – йӕхи. Алчи дӕр сӕ пайда кӕны йӕхи хъуыдымӕ гӕсгӕ. Раст у, ӕнӕ электронон мигӕнӕнтӕй ныры дуджы ӕнӕспайдагӕнӕн нӕй, фӕлӕ уӕддӕр хъӕуы тырнын уымӕ, цӕмӕй сын се ‘ндӕвдад фӕкъаддӕр кӕнат.

Исты ӕппӕрццаг ӕндӕвдад хӕссы Wi-fi-йы ӕндӕвдад организмыл? Кӕй зӕгъын ӕй хъӕуы. Кӕд ӕмӕ нырма кӕронмӕ куыстгонд нӕу йе ‘ппӕрццаг ӕндӕвдад адӕймагыл, нӕй йын зонадон ӕгъдауӕй бӕлвырдгӕнӕн факттӕ, уӕддӕр дзы хи бахизын хъӕуы ӕмӕ дзы парахатӕй нӕ хъӕуы пайда кӕнын. Фӕлӕ уый нӕ нысан кӕны, ӕмӕ паникӕйы хай фӕкӕнат уӕхи. Адӕймагӕн йе сконд афтӕ у, ӕмӕ йæм цас фылдӕр  ӕфта, уыйас ӕй ноджы фылдӕр хъӕуы. Фӕлӕ уӕддӕр нӕ къухты ис нӕма ацы уӕлдӕр технологион бастдзинады процесс ӕмӕ нӕ бон у фӕкъаддӕр ын кӕнӕм йе ‘ндӕвдад. 

Ӕрмӕг бацӕттӕ кодта  ДЫГЪУЫЗТЫ Зӕринӕ