Хуыцаубон уыд æмæ мын фæзындис, сфæлдыстадæн кæй радтон, ахæм рæстæг. Æддейæ хур касти, гом рудзгуытæй уалдзæджы тæфæй зæрдæ хъуамæ рухс кодтаид, фæлæ цæмæдæр хъуыды кодтон царды æнахуыр диссæгтыл æмæ-иу хатгай уд уынгæг кодта. Цæмæй æмæ цæй фæдыл,  куы бафæрсат, уæд, зæгъæм, социалон хызæгты иуæй-иуты «сфæлдыстадæй». Кæй зæгъын æй хъæуы, фыццаджыдæр нæхион интернет-фысджыты кой кæнын, мæнæ нæм цы клавиатурæйы дæснытæ сбирæ ис – чи йæхи хъæппæрисæй, кæмæндæр та йæ професси журналистикæ у – уыдоны постингтæ æмæ сæ быны ком-ментариты кой. Нæмттæ нымайынæй æмæ дæнцæгтæ хæссынæй уæ нæ бафæллайын кæндзынæн, ахæм «коллегæтæн» дзуаппы сæрæн дæр нæ фыссын мæ хъуыдытæ.

Дам-думтæ чи мысы æмæ сæ социалон хызæгты чи мыхуыр кæны, уыдон æрмæстдæр «ныхмæдзыды æвзаг» æмбарынц æмæ ахæм æвзаг та бафæзминаг нæу. Иуæрдыгæй, æлгъаг æмæ тæппуд удты хицæуттæ сæ хонын, уымæн æмæ се ‘цæг нæмттæ æмбæхсынц. Иннæрдыгæй та уæддæр нæхи сты – куыд фæзæгъынц, «нæ хорзы никæмæн ратдзыстæм, не ‘взæр та никæйы хъæуы». Фæлæ æвæлмасæй сыл къух ауигъын дæр раст нæ уыдзæн, уымæн æмæ сын æнтысы æхсæнад кæрæдзи ныхмæ кæнын, æхсæнады æмдых æмгуыстад халын. Æппынфæстаг, исчи сын хъуамæ паддзахадон газеты фæрцы сæ зæрдæтыл æрлæууын кæна, мæнг ныхæстæй фæлыст кæй у зындонмæ фæндаг. Уæлæуыл зындонмæ.

Цæмæн систы уæддæр популярон, цæмæн ис уыйбæрц рафысджытæ тæппуд змæнтджыты интернет-контенттæн, цæмæн æууæндынц нæ куырыхон ирон адæм æцæгдзинад æмæ æргом мæнгæй быд информацион винегретыл? Разы дæн, хицауады уарзын æмæ йын йæ алы уынаффæ дæр Хуыцауы фæдзæхст хонынæй хæсджын нæ ничи у. Конституци дæр æмæ нæ историон æхсæнадон уагæвæрд дæр нын не нæразыдзинад равдисыны бар дæттынц. Æппынфæстаг, бæстæйы сæргълæууæджы æмæ депутатты нæхæдæг æвзарæм.

Кæд, мыййаг, ирон æгъдауæй ма нæм æрмæст йæ декораци, æрмæст йæ ритуалтæ баззадысты. Æви дæсгай азты дæргъы паддзахадон идеологи  кæй нæ уыдис, уый аххос у?

Хъуыдыгæнæг æмæ куырыхон адæмæй арæх фехъусæн ис, зæгъгæ, идеологи хъуамæ уа – хъуамæ алы адæймаг дæр зона æмæ æмбара, цы у йæ царды бындурон мидис æмæ нысан. Цас фæнды куы дзурæм, царды нысан агурынæй ницы пайда ис, уæддæр æй не ссардзынæ, зæгъгæ, фæзæгъынц иннæтæ.

Советон идеологийыл кæддæр коллективон ныгуылæны идеологи фæуæлахиз. Сæхицæн æй уым раджы сбæлвырд кодтой – ома, царды мидис у иугæндзонæй æхсызгондзинад исын. Æмæ уыцы æхсызгондзинæдтæм, зæгъæм, цот скæнын нæ хауы, уымæн æмæ цотыл мæт  кæнын, тыхтæ æмæ æхца хардз кæнын хъæуы. «Ӕхсызгондзинад»-ы идеологи æнцонтæй хизы туджы. Кæй нæ фæнды йæ уд барæвдауын? Уæлдайдæр та дын алырдыгæй куы дзурой, зæгъгæ, ды сæрибар адæймаг дæ æмæ дын бартæ ис. Хуыцау æмæ æрдзæй лæвæрд дын цы ис, уыдон дæр ма нымай. Бафæн-дыдис дæ  æмæ физонæг бахæр, фæнды дæ – ирхæфсæн балцы дæ уд барæвдау.  Де ‘рдзон хуыз фæивын дæ фæнды? Табуафси, æхца нæм æрбаппар æмæ æрдзон нæлгоймагæй сылгоймаг фестдзынæ. Дæ депресси та дын хостæй сдзæбæх кæндзыстæм. Æмæ йæ куыст кæны уыцы идеологи – йæ фæстиуджыты нымæц бонæй-бонмæ рæзы. Уымæн æмæ дæсæм уæладзыгмæ æнæ лифтæй тыхдзыд кæнынæй асинтыл бынмæ æруайын æнцондæр у.

Фæлæ æхсызгондзинæдтæ æмæ æгæрон сæрибарты карна-валы фæстиуджытæ стыр тæссагдзинад хæссынц. Иухатт, дам, радон эксперименты рæстæджы лабораторон уырыйæн йе ‘хсызгондзинады зонæйы электрод бакодтой. Мæгуыр уыры хæргæ дæр нал кодта, æрмæст æй фæндыд æдзухдæр æхсызгондзинад исын. Æмæ цыбыр рæстæгмæ ныххæдмæл ис.

Кæй зæгъын æй хъæуы, Хурыскæсæны цивилизацийы дæр дзæвгар сси ацы идеологийы табугæнджыты нымæц. Зæгъæм, алыхуызон хъæлдзæггæнæг химикон препараттæ чи уарзы. Се ‘хсæн президенттæ дæр ма куы ис. Чысыл æмæ хъæлдзæг цард равзæрстой сæдæ азы фæллойæ æмыдзаг царды бæсты.

Фæлæ ис æндæр адæм. Уыдоны хъæуы «царды идеологи», эволюцийы идеологи. Цы нысан кæны уый та? Уый та нысан кæны талынг инстинкты цагъар суæвын нæ, фæлæ курдиаты, лæджыхъæды миниуджыты рæзтыл бакусын. Бауырнæд уæ, алы адæймаджы дæр фæнды æхсæнады кадджын бынат ахсын, хорз хъуыддæгтæ фæлдисæг, зæрдæскъæфты æнкъарæнты аккаг уæвын. Æндæрхуызы ныхæстæ чи кæны, уый сайы йæхи дæр æмæ йе ‘ввахс адæмы дæр, уымæн æмæ никæй фæнды ницæййаджы ном хæссын.

Уарзон хъуыддаг адæймагæн йæ професси куы свæййы, æхсæнады хъæугæ куысты йæ фæллойæ пайда куы фæхæссы, адæмы фарнæн куы фæкусы, уæд æрмæст йæ уындæй дæр зæрдæтæ барухс кæны. Ахæм адæймаг кæддæриддæр рæсугъд у, цыфæнды фыдцъылыс куы уа, уæддæр. Хæлæг, уæнгмард, магуса та цард æнадгæнæг у. Ӕддагон знаджы ныхмæ æргом тохгæнæг, йæ бæстæ æмæ йæ бинонты сæрыл хæцæг кæддæриддæр ирон адæмы æхсæн уыдис идеологон фæндагамонæг. Æууæнчы аккаг фæндагамонæг. Ахæмты фæрцы нæ фесæфтысты историон æнусон фæндæгтыл ирон адæм. Æмæ нын абон нæхи паддзахад ис, нæ фидæн аразыны фадат дæр ис.

Раздæхæм уæдæ нæ нырыккон «клавиатурæйы дæснытæм». Уыдон дæр сæхи рæстдзинадыл тохгæнджытæ хонынц. Хахуыртæ æцæгдзинадимæ «хæрын» кæнынц нæ фæллад адæмæн, ома, махмæ хъусут, официалон информацийыл ма æууæндут. Æмæ сæм хъусынц, æмæ сыл æууæндынц. Уæ бар уæхи, фæлæ мæм цæмæдæр афтæ кæсы, цыма хъуыдыгæнæг адæймаг, исты хабарыл уайтагъд баууæндыны бæсты, уæлæмхас информаци бацагуры æмæ афтæмæй йæхи зондæй хатдзæгтæ скæны.

Алы адæймагæн дæр хъуамæ уа æрдзон курдиæтты фæрцы æхсæнады кадджын бынат æрцахсыны фадæттæ. Хицауад æмæ депутатты хæс та у уыцы фадæттæй æхсæнады ифтонг кæнын. Алкæмæн дæр ис  хицауиуæггæнджыты  æрфæрсыны бар.

Æхсæнадон æнæуынондзинад тауæг æмбæстæгтæ сæхицæн, æвæццæгæн, хицæн закъæттæ ныффыстой æмæ хипайдайæн змæнтынц нæ адæмы. Сæхæдæг сæхицæн ахæм бар радтой. Раргом уæвынæй тæрсгæ дæр куыннæ хъуамæ кæной. Фæсномыгты аууоны бамбæхсыны ныфс сæ ис?  Дзæгъæлы.  Бауырнæд уæ, кæмæ æмбæлы, уыдонмæ номгай фыст сты æмæ куыддæр рæстæг æрцæуа, афтæ иууылдæр æнæмæнг раргом уыдзысты. Махæн, æхсæнадæн, та нæ хæс у нæ зонды фæрцы ахæмты амæттаг суæвынæй нæхи бахъахъхъæнын. Уымæн æмæ нæ цавæрдæр сæрмагонд идеологи мысын нал хъæуы. Нæ туджы ис. Ирон æгъдау у йæ ном.

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.