Зæгъгæ, гæды ныхæстæ, фæлывд æмæ цæстмæмитæ кæнынæй æнæхъæн дунейы конкурс расидтысты, уæд 1-аг бынатыл ацæуиккой «нæ хорзмæбæллæг» сыхæгтæ – гуырдзиæгтæ. Уыдон сæ мады æхсыримæ рахæссынц куыд ацы æппæрццаг миниуджытæ, афтæ ирæттæм æнæуынондзинад дæр. Фæлæ, гуырдзиæгтæй бирæтæ се ‘нæуынондзинад æмбæхсгæйæ, ирæттæм ахасты ахæм æнæбауырнинаг ныхæстæ фæдзурынц, фæфыссынц æмæ сæ адæймаг дисгæнгæйæ фæхъусы æмæ фæкæсы.
Ацы бонты «Грузинформ»-ы сæйраг редактор Арно Хидирбегишвили йæ фейсбук-фарсыл фыссы: «Ирæттæ сты не ‘фсымæртæ, кæцытимæ нæ фæхыл кæнын кодтой уырыссаг оккупанттæ!»- ацы мæнгдзинад гуырдзиæгтæн уырнын кæны нæ хицауад Советон Цæдисы ныппырхы фæстæ, ирæттæ сæхæдæг се ‘фсымæртыл уырыссæгты кæй нымайынц, уымæ нæкæсгæйæ, кæцытæ сæ фервæзын кодтой гуырдзиæгтæй. Фæлæ ныр ууыл нæ дзурдзыстæм, ахсджиаг æндæр хъуыддаг у: кæд ирæттæ не ‘фсымæртæ сты, кæцытимæ мах хъуамæ бафидауæм æмæ цæрæм сабырæй, куыд Советон Цæдисы рæстæджы, афтæ, уæд мах ирæттæм комкоммæ цæмæннæ бахатæм дохтыр Гаприндашвилийы ссæрибар кæныны куырдиатимæ. Ау, Тбилисæй Цхинвалмæ дарддæр у Мæскуы, Брюссель æмæ Вашингтонæй? Тбилисæй Цхинвалмæ уæлдæфы у 90 километры æмæ автотрассæйыл та – 120 километры. Цæмæннæ ис гæнæн æмæ Цхинвалмæ премьер Гахария атæха вертолетыл кæнæ та ацæуа автомобилыл æмæ уырдæгæй Важа Гаприндашвилиимæ æрæздæха? Гæнæн ис, уый суа гуырдзиаг-ирон æнæформалон диалогы райдиан. Уый бæсты мах цæмæн хъаст кæнæм Уæрæсе, Европæйы Советы Парламентон Ассамблеямæ æмæ ИНО-мæ?! Мах æндæр паддзахадтæм кæй бахатæм ирон хицауадимæ баныхас кæныны тыххæй, уымæй уайы афтæ æмæ мах сусæгæй кæй банымадтой Хуссар Ирыстоны! Кæд афтæ у, уæд Гуырдзыстон Абхаз æмæ Хуссар Ирыстонимæ йæ къух цæмæннæ фыссы, кæй сæм нæ бабырсдзæн, уый тыххæй бадзырдыл, кæм ис логикæ? Мах, гуырдзиæгты афтæ чи ралгъыста æмæ нал дæр хæцын зонæм æмæ нал дæр баныхæстæ уадзын?!
«Мах æппæт тыхтæй дæр спайда кæндзыстæм, фæлæ куыд зонут, афтæмæй Хуссар Ирыстон у хæдбар республикæ…», – сдзуапп кæнынц Мæскуыйы гуырдзиаг официалон адæймæгтæн (Абашидзе) æмæ æнæофициалон бархионтæн (Бурджанадзе).
Мах æууæндæм уырыссæгты ацы ныхæстыл, кæд Хуссар Ирыстон æмæ Абхаз Мæскуыйы ныхмæ никуы ницы сдзурдзысты, йæ ныхмæ нæ рацæудзысты уæддæр! Уæдæ нæхи цæмæн дæлдзиныг кæнæм?! Кæдæй нырмæ нал зонæм комкоммæ ирæттæ æмæ абхазæгтимæ ныхас кæнын, нæ хæстæджытимæ æмæ æмбæстæгтимæ, кæцытæ цæрынц æрмæст Хуссар Ирыстоны æмæ Абхазы нæ, фæлæ æппæт Гуырдзыстоны территорийыл. Æмæ цалынмæ Мæскуы кæй уарзы, уыцы гуырдзиаг политиктæ, кæцытæ абон сног кодтой сæ хæлардзинад ирæтты марæг Саакашвилиимæ, тырнынц сæхицæн очкотæ бакусынмæ. Æмæ кæд нæ радон домæны фæстæ Цхинвалы сфæнд кæнынц Гаприндашвилийы 10 боны фæстæ ссæрибар кæнын, уæддæр цæмæй ма равдисой, зæгъгæ, байхъуыстой Мæскуымæ кæнæ фæтарстысты Брюссель æмæ Вашингтоны домæнтæй, уый тыххæй йæ нал радтынц. Хъуыды ма кæнут? Афтæ уыд Татунашвилийы мард буар радтыны тыххæй дæр, фæлæ, куыд зыны, афтæмæй Тбилисы нæма бамбæрстой «хъазты уагæвæрдтæ»…
Æппæт бæрндзинадимæ хъусын кæнын: куыддæр мын хицауад бар радта, афтæ æз гуырдзиаг хæдбар журналист, «Грузинформ»-ы сæйраг редактор Арно Хидирбегишвили ацæудзынæн Цхинвалмæ æмæ мæ коллегæты-журналистты фæрцы бацархайдзынæн Гаприндашвилийы фарсты æмæ, гæнæн ис, æндæр проблемæты фæдыл дæр цхинвайлаг къухдариуæгадимæ æнæформалон диалог райдайыныл. Цæмæдæр гæсгæ мæм афтæ кæсы æмæ мæ мисси уыдзæн æнтыстджын, фæлæ мæ мыййаг камерæйы куы бакæной Гаприндашвилийы фарсмæ, уæд Тбилисы курæг дæн алкæмæй дæр, цæмæй ме ссæрибар кæныны тыххæй ма бахатой нæдæр Мæскуымæ, нæдæр Брюсселмæ æмæ нæдæр Вашингтонмæ!», – фыссы йæ фейсбук-фарсыл Арно Хидирбегишвили.
Фарстæуы, цы цæсгомæй дзуры Хидирбегишвили ацы ныхæстæ. Куыд хъуамæ æрбацæуа Хуссар Ирыстонмæ? Ау, къутуйы бын конд уыд 2008 азы гуырдзиаг тыхæйисджытæ Хуссар Ирыстоны зæххыл туджы зæйтæ куы рауагътой, уыцы тугуарæн бонты. Саакашвилийы ирæтты марæг куы хоны, уæд цыма йæхæдæг цæмæй хуыздæр у сæ раздæры сæрхъæн президентæй. Кæд уыдон хуыздæр сты, уæд ын цæмæн бауагътой ахæм æбуалгъы фыдракæнд саразын. Кæд 11 азы рацыд августы хæстæй, уæддæр нырма Хуссар Ирыстон йæ туджы мæцгæйæ хъæдгæмттæй куы хъæрзы, нырма дæр ирон мæдты хъарæг се ‘дзард хъæбулты уæлмæрдтæй куы хъуысы, абон дæр сæ цæссыгтæ сæ рустыл куынæ ма басур сты, уæд? Куыд хонынц ирæтты се ‘фсымæртæ, кæд æмæ ирæттæн иу æнусы дæргъы цалдæр геноциды сарæзтой, уæд? Æмæ та сын ныр дæр гæнæн куы фæуаид, уæд та сæ марæн кард нæ раздахиккой ирон адæмæй. Гуырдзиæгтæ чысылæй стырæй сты иу зондыл хæст: ирæттæ сты се знæгтæ æмæ сæ хъæуы сæ зæххæй фæсурын. Ирон адæм-иу сæ цæрæнбонты цыфыддæр знæгты – гуырдзиæгты сайæн ныхæстыл куы баууæндыдысты, уыцы рæстæджытæ фесты, нал фæсайды уыдзысты. Зонд-зонæн сын фесты æмæ уыдзысты 1989-2008 тугхъулон азтæ.
Фарстæуы, цымæ йæ кæцы ирон журналисттæй ис ныфс хуссарирыстойнаг хицауадимæ диалог райдайынæй, чи йын баххуыс кæндзæн,ирон журналисттæй абон сæ марджытимæ ныхас кæнынмæ æппындæр цæттæ куы ничи у, уæд? Цæмæннæ йæ æмбары Хидирбегишвили Хуссар Ирыстон Гуырдзыстоны сконд-мæ кæй никуыуал баздæхдзæн, хæларæй кæй никуыуал цæрдзыстæм, уый. Иннæ ахæм, кæд афтæ раст æмæ зондджын журналист у, кæд ирæтты хорзмæбæллæг у, уæд ма дзыллон æгъдауæй хатыр ракурæт ирон адæмæй йе ‘мтуг гуырдзиаг адæмы фыдракæндты тыххæй.
Цы хъуыддаг уыд Гаприндашвилийы Ирыстоны зæххыл, цæмæн фехæлдта Хуссар Ирыстоны арæн. Уымæй дæр йæхи дардта тынг агрессивонæй, зæгъгæ, дам, ацы зæхх у Гуырдзыстоны æмæ, дам, æз никæцы бæстæйы арæны сæрты ахызтæн. Ныр ахæстоны абадыны фæстæ кæд бамбарид Гуырдзыстоны территори кæм фæуд кæны æмæ хæдбар, нымад паддзахад Хуссар Ирыстоны арæныл ахизыны фæтк кæй фехæлдта, уый. Хидирбегишвилийы та кæд æрфæндыд ахæстоны Гаприндашвилийы фарсмæ абадын, уæд табуафси, фехалæд Хуссар Ирыстоны арæныл ахизыны фæтк, æмæ…
Джиоты Екатерина
Comments are closed, but trackbacks and pingbacks are open.