12-ӕм июны Гуырдзыстоны меньшевикты хицауад стыр ӕфсад рарвыста Хуссар Ирыстоны растадонты ныхмӕ.
Партизанты командæкӕнынад ӕруагъта рӕдыд, 8-ӕм июны митинджы фӕстӕ партизанты фылдӕр хайы сӕ хӕдзӕрттӕм кӕй ауагъта сӕ бинонтӕ фенынмӕ, уымӕй. Меньшевикты ӕфсады ныхмӕ 13-ӕм июны Цхинвалӕй Уанатмӕ ӕмӕ Цъунармӕ схизӕнты знӕгты ныхмӕ лӕууыд ӕрмӕстдӕр 600 хӕстоны. Меньшевикты ӕфсӕдтӕн сармадзанты руаджы бантыстис уыдон позицитӕ ныппырх кӕнын.
13-ӕм июны цъӕх пиллон скалдтой меньшевикты зынгӕй Сарабукъ, Къохат, Сатихъар, Цъунар, Прис, Додот ӕмӕ иннӕ хъӕутӕ. 23-ӕм июнмӕ Хуссар Ирыстоны хъӕутӕ сыгъдысты ӕнӕрынцойӕ. Меньшевикты гвардийы раздзог В. Джугъели йӕ бонӕджы фыста: «Теперь ночь. И всюду видны огни!.. это горят дома повстанцев. Я со спокойной душой и с чистой совестью смотрю на пепелища и клумбы дыма… Я совершенно спокоен… Джава – Южно-Осетинская столица. Это очень большая и живописная деревня. Она сердце Южной Осетии. Виновница… Всех востаний. И это сердце надо вырвать!»
Нӕ бантыстис знӕгтӕн уыцы уæззау бонты дӕр дзауӕгты тох ӕруромын. 80-аздзыд зӕрӕдтӕ Цхуырбаты Писыр, Тотрадз, Къокъо ӕмӕ ӕндӕртӕ знӕгтæм систой се ‘хсаргӕрдтӕ ӕмӕ тохы быдыры хъайтары мард фесты. 1920 азы знӕгты ныхмӕ тохы бонты мард фесты 13 коммунары – 13 удгоймаджы Цхинвалы ӕнӕхӕцӕг адӕмӕй. Ӕдӕппӕт мидхӕсты заманы Хуссар Ирыстоны растадонтӕй фӕмард 5500 адӕймаджы. Меньшевиктӕ мӕлӕтдзаг над фӕкодтой 499 лӕджы. Басыгътой цалдӕр адӕймаджы, тыхмитӕ фæкодтой бирӕ сылгоймӕгтӕн, тыллӕгӕй сæфт ӕрцыдис 167,06 мин сомы аргъ. Областы цӕрджыты фосӕй меньшевиктӕ атардтой ӕмӕ аргӕвстой 80 проценты.
ЦХУЫРБАТЫ Иван
Comments are closed, but trackbacks and pingbacks are open.