Бæрæг куыд у, афтæмæй Республикæ Хуссар Ирыстоны Фæсарæйнаг хъуыддæгты министрад Сидт арвыста фæсарæйнаг бæстæты хицауадтæм, 1920 азы ирон адæмæн гуырдзы кæй расидтысты, уыцы геноцид банымайыны тыххæй. Уыцы геноцид нын чи сарæзта, уыдонæн абон бирæ фарсхæцджытæ ис уыцы фæсарæйнаг паддзахадтæй. Уый тыххæй нæ, æмæ бирæ уарзынц Гуырдзыстон æмæ гуырдзиаг адæмы? Нæ, пайда сын сты æмæ уый тыххæй. Уыцы паддзахадтæй нын ацы æввахс рæстæджы исчи нæ геноцид банымайа, нырма уый зын зæгъæн у абоны дунейы политикон æмахастытæ хынцгæйæ, фæлæ куыд фæзæгъынц, ныфс амæлы фæстагмæ. Стæй махыл æмбæлы сидын æмæ домын, уымæн æмæ нæ уый домы нæ хъысмæт, нæ историон рæстдзинад.
Уæддæр æмæ уæддæр æхсызгон хъуыддаг у, нæ Фæсарæйнаг хъуыддæгты министрады сидтæн Донецкы Адæмон Республикæ дзуапп кæй радта, уый. 26 июны Донецкы Адæмон Республикæйы Адæмон Совет (Парламент) рахаста уынаффæ, ирон адæмы геноцид банымайыны тыххæй. Адæмон Советы рахæсгæ уынаффæйы дзырдæуы, Донбассы адæм æфсымæрон ирон адæмимæ иумæ кæй дих кæнынц гуырдзиаг агрессийы амæттæгты рыст.
«Мах фидарæй уырны, Гуырдзыстон Хуссар Ирыстоны ныхмæ цы фыдракæндтæ сарæзта, уыдонæн кæй нæй, цас рæстæг рацыд, уымæ гæсгæ сын аргъ кæнæн, æмæ истори кæй рахæсдзæн йæ рæстаг тæрхон. Мах сидæм дунеон æмæхсæнад æмæ æхсæнадæмон организацитæм, цæмæй балæууой ацы хъæппæрисы фарс æмæ рахæцой ирон адæмы закъонон бары фарс растæрхонад æмæ ракæнгæ зиан бафидыны фæдыл», – дзырдæуы Адæмон Советы райстæрцæуæг документы.
Дæ мады мард, дам, йæ мад кæмæн амард, ахæмæн зæгъ, цæмæй дæ бамбара. Абон Донбасс дæр ис, мах бирæ хæттыты цы уавæры уыдысты, ахæм уавæры. Фæлæ сæ уæззау уавæры фыццаг мах балæууыдыстæм сæ фарсмæ, мах сын банымадтам сæ хæдбардзинад. Æмæ нын уæлдай æхсызгон уый у, нæ хорз нын кæй бафыстой хорзæй!
Comments are closed, but trackbacks and pingbacks are open.